‘Ke Fai a te Mea Tenei mo Fakamasauaga ki a Au’

1, 2. Ne a mea ne mafai o mafau‵fau te kau apositolo ki ei i te taimi o se malaga ki Ielusalema?

‘KO SEAI ne kaumana, kae ko mafai o lavea ne tatou a te mata o te masina ko kamata o sae aka. I te afiafi po ko teka, kāti ne lavea ne tāgata leoleo i Ielusalema a te fatoa saeakaga o te masina. Ko te taimi eiloa e iloa ei ne te kau o te Sanetulini a te mea tenā, ko te mea eiloa ko faka‵pula ne latou me ko kamata a te masina fou, ko Nisani. Mai konā, ko fakailoaga eiloa ko ave io me fakasalalau ne avefekau a tala, e oko mai foki eiloa ki konei. E mautinoa ‵lei me ka manako a Iesu o fano ki Ielusalema ke oko a ia ki ei a koi tuai o kamata te Paseka.’

² E se taumate ne oko atu a mafaufauga penā ki mafaufau o nisi tino kolā ne olo fakatasi mo Iesu i Pelea (ki te suā fetiu o te Iolitana) i tena toe malaga ki Ielusalema. (Mata. 19:1; 20:17, 29; Male. 10:1, 32, 46) I te taimi e iloa ei te aso muamua o te masina faka-Iutaia ko Nisani, e ‵tau o fai a te Paseka i te 13 aso mai tua ifo, māfai ko to te mata o te la i a Nisani 14.

3. Kaia e ‵tau ei o iloa ne Kelisiano a te aso o te Paseka?

³ A te aso o te ‵Kaiga a te Aliki i te Afiafi telā e fetaui mo te aso o te Paseka, ko te Apelila 14, 2014 māfai ko to te mata o te la. Ka fai a te aso tenā e pelā me se aso fakapito ki Kelisiano ‵tonu mo tino fia‵fia. Kaia? Ona ko mea kolā e faitau ne tatou i te 1 Kolinito 11:23-25: “Ne puke ne te Aliki ko Iesu te falaoa i te po telā ka fakatogafiti ei a ia kae i te otiga ne fai te fakafetai, ne tofitofi ne ia te falaoa kae fai atu, penei: ‘E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fakamasauaga ki a au.’ E penā foki tena faiga ki te ipu.”

4. (a) Ne a fesili e mafai o ‵sae aka e uiga ki te Fakamanatuga? (e) E iloa pefea a te aso e fai ei te fakamanatuga i tausaga takitasi? (Onoono ki te pokisi “Fakamanatuga i te 2014.”)

⁴ E seai se fakalotolotolua me ka nofo atu koe i te fakamanatuga e tasi telā ne fai mai a Iesu me e ‵tau o fakamanatu ne ana soko i tausaga katoa. A koi tuai o oko ki te aso tenā, ‵sili ifo ki a koutou eiloa: ‘E ‵tau o fakatokatoka pefea au mō te afiafi tenā? Ne a mea ka fakaaoga fakapitoa i ei? Se a te fakasologa o mea ka fai i te taimi o te fakamanatuga? Kae se a te aoga o te fakamanatuga mo mea kolā e fakaaoga i ei ki a au?’

MEA FAKATUSA

5. Ne a mea ne fai atu a Iesu ke fakatoka mō te ‵toe ‵kaiga o te Paseka fakatasi mo te kau apositolo?

⁵ I te taimi ne fai atu ei a Iesu ki te kau apositolo ke fakatoka se potu mo fai te ‵kaiga o te Paseka, ne seki fai atu a ia ke fai ke uke a mea fakagaligali; kae ne manako fua a ia ki se potu ‵lei kae ‵ma kae lava a koga mo ‵nofo a tino kolā e ‵kami mai. (Faitau te Maleko 14:12-16.) E fakatoka ne latou a mea kolā e manakogina mō te ‵kaiga, e aofia i ei te falaoa sē faka‵fete mo te uaina ‵kula. I te otiga o te ‵kaiga o te Paseka, ne faipati a Iesu e uiga ki mea fakatusa e lua konā.

6. (a) Mai tua o te ‵kaiga o te Paseka, ne a pati a Iesu e uiga ki te falaoa? (e) Se vaegā falaoa pefea e fakaaoga i te Fakamanatuga?

⁶ Ne tusi fakamuli mai te apositolo ko Mataio telā ne nofo atu i konā: “Ne puke ne Iesu se falaoa, fai te fakafetai, tofitofi kae tufatufa atu ki ona soko, ana muna, ‘Puke, kai.’” (Mata. 26:26) A te “falaoa” e sefaka‵fete, e pelā mo te fakaaogaga i te Paseka. (Eso. 12:8; Teu. 16:3) E ‵tau o faite te falaoa ki te falaoa mai i kau saito mo te vai, e aunoa mo se mea faka‵fete io me se mea e faopoopo ki ei, pelā mo te masima. E se ‵fete a te falaoa me e seai se mea faka‵fete i ei. E ‵tau o malō kae faigofie o fatifati ki potumea. I aso nei, a koi tuai o oko ki te fakamanatuga, e ‵tau mo toeaina i te fakapotopotoga o fakamolemole atu ki se tino ke fai ne ia se falaoa i falaoa mai kau saito mo te vai, kae tunu i se falai telā e ‵siu malie i sinu. (Kafai e se maua te falaoa mai te kau saito, kāti e mafai o fakaaoga te falaoa mai te laisi, corn, io me se fuaga e tai ‵pau.)

7. Se a te vaegā uaina ne faipati a Iesu ki ei, kae se vaegā uaina pefea e mafai o fakaaoga i te Fakamanatuga i aso nei?

⁷ Ne fai mai foki a Mataio: “Ne puke foki a [Iesu] ki te ipu, fai te fakafetai, tuku atu ki a latou, kae fai atu: ‘Inu katoa koutou ki ei.’” (Mata. 26:27, 28) A te mea telā ne puke i te lima o Iesu se ipu uaina ‵kula. (E sē se sua mai vine ‵mata, i te taukai vine ko leva ne oti.) Ne seki aofia a te uaina i te ‵kaiga muamua o te Paseka i Aikupito, kae ne seki ‵teke a Iesu ki te fakaaogaga o te uaina i te Paseka. Ne fakaaoga foki ne ia a nisi mea i ei i te faiga o te ‵Kaiga a te Aliki i te Afiafi. Tela la, e ‵tau o fakaaoga ne Kelisiano a te uaina i te Fakamanatuga. E pelā mo te toto o Iesu e seai se mea e faopoopo ki ei ko te mea ke tāua malosi atu, a te uaina foki telā e fakaaoga e seai se mea e faopoopo ki ei. Ko te tinā uaina ‵kula loa e fakaaoga, se uaina e faite i te fale io me ko uaina kolā e ‵togi mai pelā mo te Beaujolais, Burgundy, io me ko te Chianti.

TE UIGA O TE FALAOA MO TE UAINA

8. Kaia e fia‵fia ei a Kelisiano ki te fakauigaga o te falaoa mo te uaina?

⁸ Ne fakaasi manino mai ne te apositolo ko Paulo me e ‵tau o fakamanatu ne nisi Kelisiano a te ‵Kaiga a te Aliki i te Afiafi i tafa o te kau apositolo. Ne tusi atu a ia ki taina i Kolinito: “Ne tuku atu ne au ki a koutou a te mea telā ne maua ne au mai te Aliki, me ne puke ne te Aliki ko Iesu te falaoa . . . kae i te otiga ne fai te fakafetai, ne tofitofi ne ia te falaoa kae fai atu, penei: ‘E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fai se fakamasauaga ki a au.’” (1 Koli. 11:23, 24) E ‵tusa mo te fakatonuga tenā, ne fakamanatu faeloa ne Kelisiano a te aso fakapito tenā i tausaga katoa ke oko mai eiloa ki aso nei kae fiafia ‵ki latou ki te fakauigaga o te falaoa mo te uaina.

9. Se a te kilokiloga ‵se ne nofo mo nisi tino e uiga ki te falaoa ne fakaaoga ne Iesu?

⁹ E fai mai a manatu o nisi tino ‵lotu i a Iesu ne fai ‵tonu mai loa: ‘Tenei toku foitino,’ tela la, e tali‵tonu latou me e isi se vavega ne fai kae ne fai te falaoa mo foitino tonu o Iesu. E ui i ei, e se tenā loa te mea ne tupu.a Ne nofo atu eiloa te foitino o Iesu i mua o apositolo fakamaoni konā, kae penā foki a te falaoa sē faka‵fete telā ka ‵kai latou ki ei. E manino ‵lei me ne faipati a Iesu i se auala fakatusa, e pelā mo nisi taimi aka e uke.​—Ioa. 2:19-21; 4:13, 14; 10:7; 15:1.

10. Se a te mea e sui mai ne te falaoa telā e fakaaoga i te ‵Kaiga a te Aliki i te Afiafi?

¹⁰ A te falaoa telā ne matea ne te kau apositolo kae ko pili o ‵kai latou ki ei ne fakauiga ki te foitino o Iesu. Te foitino fea? I te taimi e tasi, ne mafau‵fau a tavini a te Atua me ona ko Iesu ne tofitofi ne ia a te falaoa kae seai sena ivi ne fati, ne fakauiga a te falaoa ki “te foitino o Keliso,” ko te fakapotopotoga o Kelisiano fakaekegina. (Efe. 4:12; Loma 12:4, 5; 1 Koli. 10:​16, 17; 12:27) E ui i ei, ne iloa aka ne latou me ne fakaasi mai i fakamasakoga mo Tusitusiga Tapu i te falaoa ne fakauiga loa ki te foitino faka-te-tagata o Iesu telā ne fakatoka mō ia. A Iesu ne “puapuaga i te foitino,” ke oko ki te fakatautau i luga i te lakau fakasauā. Tela la, i te ‵Kaiga a te Aliki i te Afiafi, e sui ne te falaoa a te foitino faka-te-tagata tenā ne ofo ne Iesu mō “‵tou agasala.”​—1 Pe. 2:21-24; 4:1; Ioa. 19:33-36; Epe. 10:5-7.

11, 12. (a) Ne a pati a Iesu e uiga ki te uaina? (e) Se a te mea e sui mai ne te uaina telā ne fakaaoga i te ‵Kaiga a te Aliki i te Afiafi?

¹¹ E fesoasoani mai a te mea tenā ke malamalama tatou i pati a Iesu kolā ka fai mai e uiga ki te uaina. E fai‵tau tatou, penei: “E penā foki tena faiga ki te ipu i te otiga o te ‵kaiga i te afiafi, ana muna: ‘E fakauiga a te ipu tenei ki te feagaiga fou e auala i toku toto.’” (1 Koli. 11:25) E uke a Tusi Tapu e tai ‵pau a pati i ei mo pati a Robert Young: “A te ipu tenei ko te feagaiga fou i toku toto.” (I a matou a mataimanu ‵kese.) E mata, a te ipu tonu telā ne puke ne Iesu ko te feagaiga fou? Ikai. A te pati  “ipu” ne fakasino atu loa ki mea i loto i ei​—ko te uaina. Ne a pati a Iesu me se a te mea ne fakauiga io me sui mai ne te uaina? Ko tena toto maligi.

¹² E maua ne tatou a pati a Iesu i te Evagelia a Maleko: “Ko tena uiga ko toku ‘toto o te feagaiga,’ telā ka ‵ligi ki tua mō tino e tokouke.” (Male. 14:24) Ao, ko te toto o Iesu telā “ka ‵ligi ki tua mō tino e tokouke ke fakamagalo ei agasala.” (Mata. 26:28) Tela la, e fetaui ‵lei a te fakauigaga o te uaina ‵kula ki te toto tonu o Iesu. E auala i te toto tenā, e mafai ei o fakasaoloto tatou ne te togiola, “ko te fakamagaloga o ‵tou agasala.”​—Faitau te Efeso 1:7.

TE FAKAMANATUGA O TE MATE O KELISO

13. Fakamatala mai te auala e fai ei a te Fakamanatuga o te mate o Keliso i tausaga katoa?

¹³ Kafai e kau atu koe ki te Fakamanatuga fakatasi mo Molimau a Ieova i te taimi muamua, se a te mea e fakamoemoe koe ki ei? A te maopoopoga ka fai i se koga mata ‵lei kae ‵ma telā e ofi a tino katoa kae fia‵fia ki mea e fai i te fakatasiga. Kāti e isi ne teu pulalakau i ei, kae sē teu pelā me se koga e fai ei se pātī. Ka fai ne se toeaina se lāuga telā e fakavae mai te Tusi Tapu e uiga ki te ‵Kaiga a te Aliki i te Afiafi. Ka fesoasoani atu a ia ke loto fakafetai a tino katoa ki te mea ne fai ne Keliso mō tatou. Ne mate a ia e pelā me se togiola ko te mea ke ola tatou. (Faitau te Loma 5:8-10.) Ka fakamatala ne te failauga a fakamoemoega kese‵kese e lua kolā ne fakatoka mō Kelisiano i loto i te Tusi Tapu.

14. I te taimi e fai ei te lāuga o te Fakamanatuga, ne a fakamoemoega e faipati ki ei te failauga?

¹⁴ A te fakamoemoega e tasi ko te pule fakatasi mo Keliso i te lagi, se fakamoemoega telā e maua fua ne se fuainumela foliki o soko o Keliso, e pelā mo apositolo fakamaoni. (Luka 12:32; 22:19, 20; Faka. 14:1) A te suā mea ko te fakamoemoega telā e maua ne Kelisiano e tokouke kolā e tavini atu ki te Atua mo te alofa fakamaoni i ‵tou taimi nei. E maua ne latou a te fakamoemoega ke ola ki te se-gata-mai i se lalolagi palataiso. Kae ka fai a te loto o te Atua i te lalolagi nei e pelā mo te lagi, se mea telā ko leva ne ‵talo a Kelisiano e uiga ki ei. (Mata. 6:10) Kae e fakaasi mai eiloa i te Tusi Tapu a tulaga fakaofoofogia kolā ka maua ne latou ke oko loa ki te se-gata-mai.​—Isa. 11:6-9; 35:5, 6; 65:21-23.

15, 16. Se a te mea ne fai ki te falaoa i te ‵Kaiga a te Aliki i te Afiafi?

¹⁵ Kafai ko tai oti te lāuga, ko fai mai ei te failauga me ko oko mai te taimi ke fai a te mea telā ne fakatonu atu a Iesu ki ana apositolo ke fai. E pelā mo te fakaasiatuga mai luga, e lua a mea fakatusa ka fakaaoga, ko te falaoa sē faka‵fete mo te uaina ‵kula. Kāti e tuku a mea konei i se taipola e pili ki te failauga. Ka faitau a ia ki se tala i te Tusi Tapu telā e fakamatala i ei a pati mo mea ne fai ne Iesu i te kamataga ne ia a te faigāmea tenei. Pelā me se fakaakoakoga, e fai‵tau tatou ki te tala a Mataio: “Ne puke ne Iesu se falaoa, fai te fakafetai, tofitofi kae tufatufa atu ki ana soko, ana muna: ‘Puke kae ‵kai ki ei.’ E fakauiga te mea tenei ki toku foitino.’” (Mata. 26:26) Ne tofitofi ne Iesu a te falaoa sē faka‵fete ko te mea ke mafai ne ia o tufatufa atu a nisi mea ki apositolo i ana feitu. Ka lavea ne koe i te fakatasiga i a Apelila 14 a nisi falaoa sē faka‵fete ko oti ne tofitofi kae tuku i luga i tifa.

¹⁶ E ‵tau o lava a tifa e fakaaoga ko te mea ke tufatufa atu a mea konei ki tino katoa kolā ne ‵kau mai. Ka seai ne mea fakalotu fakapitoa e fai i te mea tenei. Kafai ko oti ne fai te ‵talo, ko tukutuku faka‵lei atu ei a tifa e pelā mo te masani. E tokofia fua (io me seai eiloa) se tino ne kai ki te falaoa, e pelā mo te mea ne fai i te ukega o fakapotopotoga i te taimi ne tufatufa atu ei te falaoa i te fakamanatuga tenei i te 2013.

17. I te Fakamanatuga, ne tau‵tali atu pefea i te fakatonuga a Iesu e uiga ki te uaina?

¹⁷ Mai konā, fakasaga atu ei ki te fakamatalaga a Mataio: “Ne puke foki a [Iesu] ki te ipu, fai te fakafetai, tuku atu ki a latou, kae fai atu: ‘Inu katoa koutou ki ei, ko tena uiga ko toku ‘toto o te feagaiga,’ telā ka ‵ligi ki tua mō tino e tokouke ke fakamagalo ei agasala.’” (Mata. 26:27, 28) Mai te tautali i te fakaakoakoga tenā, fai ei te suā ‵talo kae i te otiga, fakasolo atu ei a ‘ipu’ uaina ‵kula ki tino katoa kolā ne ‵kau mai.

18. Kafai e tokofia fua io me seai se tino e kai kae inu ki mea fakatusa, kaia e tāua ei ke kau eiloa koe ki ei?

¹⁸ Ne seki ‵kai a te tokoukega o tino kolā ne ‵kau me ne fai mai a Iesu me ko latou fua kolā ka pule fakatasi mo ia i tena Malo faka-te-lagi e ‵kai. (Faitau te Luka 22:28-30; 2 Timo. 4:18) A nisi tino katoa kolā ka ‵kau ki ei ka fai pelā me ne tino maimoa. E tāua a te nofo atu i te ‵Kaiga a te Aliki i te Afiafi, me e fakaasi atu i ei a te fakatāua malosi ne latou o te taulaga a Iesu. I te taimi o te Fakamanatuga, e mafai o fakaataata ne latou a fakamanuiaga kolā e mafai o maua ne latou e auala i te taulaga togiola a Iesu. E maua ne latou a te fakamoemoega ke aofia i te “vaitino tokouke” kolā ka ‵sao atu i te “fakalavelave lasi.” A latou ko tino tapuaki kolā ne “‵ta ne latou olotou gatu ke ‵kena i te toto o te Tamā Mamoe.”​—Faka. 7:9, 14-17.

19. Ne a mea e mafai o fai ne koe ke fakatoka mō te ‵Kaiga a te Aliki i te Afiafi kae maua a mea aoga mai i ei?

¹⁹ E fakatokatoka a Molimau a Ieova i te lalolagi kātoa ki te fakatasiga fakapito tenei. I nāi vaiaso mai mua o te aso tenā, ka aofia tatou i te ‵kamiga o tino e tokouke ke ‵kau mai. E se gata i ei, i nāi aso mai mua o te Fakamanatuga, ka fai‵tau tatou ki tala i te Tusi Tapu ki mea ne fai ne Iesu mo mea ne ‵tupu i te aso tenā i te 33 T.A. Ka fai ne tatou ne fakatokaga totino ke ‵kau tatou ki ei. Se mea ‵lei ke oko vave atu tatou mai mua o te pese mo te ‵talo kamata ko te mea ke fakafetaui atu tatou ki tino ‵fou kae maua a mea aoga i te polokalame kātoa. Ka maua ne tatou katoa, tino o te fakapotopotoga mo tino fou, a mea aoga māfai e tau‵tali eiloa tatou i ‵tou Tusi Tapu i te taimi e faitau kae fakamatala ne te failauga se manatu mai te Tusi Tapu. A ko te toe mea tāua, i te ‵kau o tatou ki te Fakamanatuga e fakaasi atu i ei a te ‵poko o ‵tou loto fakafetai ki te taulaga a Iesu kae ka fakaasi atu foki i ei a ‵tou faka‵logo ki tena fakatonuga: “Ke fai faeloa te mea tenei mo fai se fakamasauaga ki a au.”​—1 Koli. 11:24.