100 Tausaga o te Pulega a te Malo—E Pokotia Pefea Koe i ei?

1, 2. Ne a mea ka fakataunu ne te Malo o te Atua, kae kaia e tali‵tonu ei tatou me ka oko mai eiloa te Malo?

I LUGA i se mauga i tafa o Kapanaumi i te ‵tau e ‵somo ei a lau o lakau i te 31 T.A., ne akoako ne Iesu Keliso ana soko ke ‵talo, penei: “Ke oko mai tou Malo.” (Mata. 6:10) I aso nei, e fakalotolotolua a te tokoukega o tino ki te oko mai o te Malo. E ui i ei, e tali‵tonu tatou me ka tali mai eiloa ‵tou ‵talo kolā e fai atu mo te fakamaoni ke oko mai te Malo o te Atua.

² Ka fakaaoga ne Ieova a te Malo ke tuku fakatasi a tena kāiga i te lagi mo te lalolagi. Ka fakataunu eiloa te fuafuaga tenā a te Atua. (Isa. 55:10, 11) A te tonuga loa, ko leva ne fai a Ieova mo fai te Tupu i ‵tou aso nei! A mea fakaofoofogia kolā ne ‵tupu i te 100 tausaga ko ‵teka ne fakamaoniga o te mea tenei. E fai ne te Atua a galuega ‵lasi kae fakaofoofogia mō te fia miliona o tino a‵lofa fakamaoni. (Saka. 14:9; Faka. 15:3) Kae e ui i ei, a te fai o Ieova mo fai te Tupu e se ‵pau mo te oko mai o te Malo o te Atua telā ne akoako tatou ne Iesu ke ‵talo ki ei. E ‵kese pefea a mea ‵tupu konei, kae e pokotia pefea tatou i ei?

KO GASUESUE A TE TUPU TELĀ NE FAKASOPO NE IEOVA

3. (a) Ko te taimi fea ne fakasopo ei a Iesu mo fai te Tupu, kae i fea? (e) Ka fakatalitonu mai pefea ne koe i te Malo ne fakatu i te 1914? (Ke onoono ki te fakamatalaga mai lalo.)

³ Ko pilipili atu ki te fakaotiga o te 19 senitenali, ne kamata ei o maua te mainaga ki te valoaga telā ne tusi ne Tanielu i te 2,500 tausaga ko ‵teka: “I te taimi o takitaki konā, kae ka fakatu ne te Atua o te lagi a te malo telā ka sē toe gata mai.” (Tani. 2:44) Ne fakamāumāu ne Tino A‵koga i te Tusi Tapu a te fia sefulu tausaga o fakaasi mai i te 1914 se tausaga tāua ‵ki. A te tokoukega o tino i te taimi tenā ne isi ne olotou fakamoemoega. E fai mai se tino tusitala e tokotasi, penei: “A te lalolagi i te 1914 ne ‵fonu i fakamoemoega mo tautoga.” Ne taunu eiloa te valoaga i te Tusi Tapu i te taimi ne kamata ei te Taua Muamua a te Lalolagi i se taimi fakamuli ifo i te tausaga eiloa tenā. Ne fakatalitonu mai ne mea kolā ne ‵tupu fakamuli ifo, pelā mo ogega mea‵kai, mafuie, mo famai e penā mo te fakataunuga o nisi valoaga i te Tusi Tapu, me ko oti ne kamata o pule a Iesu Keliso i te lagi e pelā me ko te Tupu o te Malo o te Atua i te 1914.a Mai te fakasopoga o te tena Tama e pelā me ko te Tupu faka-Mesia, ne fai eiloa a Ieova mo Tupu i se mainaga fou!

4. Se a te galuega muamua ne fai ne te Tupu fou telā ne fatoa fakasopo aka, kae ko oi a nisi tino ne saga atu a ia ki ei?

⁴ A te galuega muamua a te Tupu fou telā ne fakasopo aka ne te Atua ko te taua atu ki te Fili Sili o tena Tamana, ko Satani. Ne ‵pei ifo ne Iesu mo ana agelu a te Tiapolo mo ana temoni mai te lagi. Ne fai ne te mea tenei ke maua te fiafia lasi i te lagi, kae se taimi o fakalavelave sē fuafuagina ki te lalolagi. (Faitau te Fakaasiga 12:7-9, 12.) Tafa atu ki ei, ne saga ifo te Tupu ki ana tino i te lalolagi nei o faka‵ma, akoako, kae fakatoka ke fai ne latou te loto o te Atua. Ke mafau‵fau tatou ki te auala e tuku mai ei se fakaakoakoga ‵lei mō tatou i aso nei, ne te ‵saga tonu atu o latou ki galuega konei e tolu o te Malo.

E FAKA‵MA NE TE TUPU FAKA-MESIA ANA TINO A‵LOFA FAKAMAONI

5. Se a te faka‵maga ne fai i te va o te 1914 mo te kamataga o te 1919?

⁵ Mai tua o te ‵fulu faka‵maga o te lagi mai i fakamalosiga ma‵sei a Satani mo ana temoni, ne fakatonu atu a Ieova ki a Iesu ke āsi kae faka‵ma aka a te tulaga faka-te-agaga o ana soko i te lalolagi nei. Ne fakamatala mai ne te pelofeta ko Malaki a te mea tenei e pelā me se faka‵maga faka-te-agaga. (Mala. 3:1-3) E fakaasi mai i tala fakasolopito me ne tupu a te mea tenei i te va o te 1914 mo te kamataga o te 1919.b Ko te mea ke fai tatou mo vaega o te kaukāiga o Ieova i te lagi mo te lalolagi, e ‵tau mo tatou o ‵ma, io me tapu. (1 Pe. 1:15, 16) E ‵tau mo tatou o ‵ma mai so se fakalailaiga a lotu ‵se io me ko mea fakapolitiki o te lalolagi tenei.

6. E tuku mai pefea a mea‵kai faka-te-agaga, kae kaia e tāua ei?

⁶ I te taimi tenā, ne fakaaoga ne Iesu a tena malosi pule o filifili aka se “tavini fakamaoni kae poto.” Ka tuku mai faeloa ne te tavini tenei a mea‵kai faka-te-agaga aoga ki a latou katoa kolā e aofia i te “lafu mamoe e tasi” mai lalo i te tausiga a Iesu. (Mata. 24:45-47; Ioa. 10:16) Talu mai te 1919, ne fakamaoni eiloa se potukau foliki o taina fakaekegina o fakataunu a te tiute ‵mafa ki te fagaiga o “nisi tavini.” A te uke o mea‵kai faka-te-agaga kolā e tuku mai e auala i te fakatokaga tenei e fakamalosi aka ei tatou ko te mea ke ‵tupu aka tatou i te fakatuanaki. E fakamalosi aka foki i ei a ‵tou fakaikuga ke tumau tatou i te ‵ma i te feitu faka-te-agaga, i amioga, te mafaufau, mo te feitu faka-te-foitino. E akoako kae fakatoka foki tatou ne mea‵kai faka-te-agaga konei ko te mea ke ‵kau katoatoa atu tatou ki te ‵toe galuega tāua telā e fai i te lalolagi i aso nei. E mata, e fakaaoga katoatoa ne koe a mea‵kai konei?

E AKOAKO NE TE TUPU ANA TINO KE TALAI I TE LALOLAGI KĀTOA

7. Se a te galuega tāua ne kamata ne Iesu i tena nofoga i te lalolagi, kae ka tumau eiloa ke oko atu ki te taimi fea?

⁷ I te taimi ne kamata ei te galuega talai a Iesu i te lalolagi, ne fai mai a ia: “E ‵tau foki o folafola atu ne au te tala ‵lei o te Malo o te Atua ki nisi fa‵kai, me tenā eiloa te mea ne uga mai ei au.” (Luka 4:43) E tolu mo te āfa tausaga ne fai ei ne Iesu a te galuega tenei mo fai te ‵toe mea tāua i tena olaga. Ne fakatonu atu a ia ki ana soko: “Olo o talai atu penei: ‘A te Malo o te lagi ko pili mai.’” (Mata. 10:7) Mai tua o tena toetuga, ne folafola mai ne Iesu me ka fakasalalau atu ne ana soko a te fekau tenei “ki toe koga ‵mao i te lalolagi.” (Galu. 1:8) Ne tauto atu a ia ki a latou me ka aofia eiloa a ia i te galuega tāua tenei ke oko mai ki ‵tou aso nei.​—Mata. 28:19, 20.

8. Ne fakamalosi aka pefea ne te Tupu ana tino i te lalolagi ke gasue‵sue?

⁸ Mai te 1919, ne gasolo aka o aoga malosi a te “tala ‵lei tenei o te Malo.” (Mata. 24:14) Ko pule a te Tupu i te lagi, kae ko oti ne fakamaopoopo ne ia se potukau foliki o tino kolā ko oti ne faka‵ma i te lalolagi nei. Ne fai eiloa ne latou mo te loto finafinau a fakatonuga fakamalosi loto a Iesu: Folafola atu te tala ‵lei o te Malo o te Atua telā ne fakatu aka ki te lalolagi kātoa! (Galu. 10:42) Pelā me se fakaakoakoga, e pilipili ki te 20,000 tino kolā e ‵lago atu ki te Malo ne maopoopo i se fono i te atufenua i Cedar Point, Ohio, U.S.A., i a Setema 1922. Ke fakaataata i te mafaufau a te fia‵fia o latou i te taimi ne fai ei ne te Taina ko Rutherford a te lāuga ko “Te Malo” kae fai atu: “Kiloke, a te Tupu ko pule! A koutou ko ana sui o fakailoa atu ki tino. Tela la, ke fakasalalau, fakasalalau, fakasalalau, te Tupu mo tena malo.” E toko lua afe tino kolā ne ‵kau mai ki te fono ne ‵saga atu ki te kalaga tenā mai te ‵kau atu ki se “Aso Talai” fakapito, kae ne āsi atu ki fale o tino e nofo ki se 45 maila (72 km) te ‵mao mai te koga e fai ei te fono. Ne fai mai se tino e tokotasi telā ne kau atu ki te fono kae fakaosofia tena loto: “Ka sē puli lele i a au a te kalaga ke fakasalalau a te Malo mo te loto finafinau o te vaitino kolā ne maopoopo i konā!” E se ko ia fua tokotasi ne fai ne ia a pati konā.

9, 10. (a) Ne a fakatokaga ne fai ke akoako ei a tino talai o te Malo? (e) Ne aoga totino pefea ki a koe a te akoakoga tenei?

⁹ Mai te 1922, e silia atu i 17,000 tino talai o te Malo ne gasue‵sue malosi i fenua e 58 i te lalolagi. Kae e manakogina ne latou ne akoakoga. I te senitenali muamua, ne tuku atu ne te Tupu telā ne Filifili aka a fakatonuga manino ki ana soko ki mea kolā ka talai atu ne latou, te koga, mo te auala e talai atu ei. (Mata. 10:5-7; Luka 9:1-6; 10:1-11) Mai te tautali i te fakatokaga tenei i aso nei, e onoono a Iesu ke maua ne tino katoa kolā e ‵kau ki te galuega talai o te Malo a fakatonuga mo mea faigaluega kolā e  manakogina ko te mea ke talai atu latou i se auala magoi. (2 Timo. 3:17) E akoako ne Iesu ana tino ki te faiga o te galuega talai e auala i te fakapotopotoga Kelisiano. A te auala e tasi e akoako ei ne ia latou ko te Akoga mō Tino Talai, telā e fai i fakapotopotoga takitasi e silia atu i te 111,000 i te lalolagi kātoa. Mai te fakaaoga faka‵lei o te akoakoga tenei, ko silia atu nei i te fitu miliona a tino talai ko toka o talai kae akoako atu i se auala telā e ‵lei atu ki “vaegā tino kese‵kese katoa.”​—Faitau te 1 Kolinito 9:20-23.

¹⁰ I tafa o te Akoga mō Tino Talai, ko oti foki ne faka‵tu a nisi akoga faka-te-Tusi Tapu ke akoako ei a toeaina o fakapotopotoga, paenia, taina ‵taka, tauavaga Kelisiano, Komiti o te Ofisa Lagolago mo olotou avaga, ovasia faima‵laga mo olotou avaga, mo misionale.c Ne fakaasi mai ne tino a‵koga i te vasega e tasi o te Akoga faka-te-Tusi Tapu mō Tauavaga Kelisiano a te lotou loto fakafetai mō te akoga i te auala tenei: “A te akoakoga fakapito ne maua ne matou ne fakamalosi aka i ei a te motou a‵lofa ki a Ieova kae fakatoka faka‵lei i ei matou ke fesoasoani atu ki nisi tino.”

11. Ne mafai pefea a tino talai o te Malo o kufaki faitalia a ‵tekemaiga?

¹¹ E lavea ne te fili ko Satani a te lasi o te talaiga o te Malo mo te faiga o akoakoga tenei e fai. E oso tonu atu a ia ki te fekau o te Malo mo tino kolā e talai ne latou kae fakaaoga auala e se laveagofie ke taofi aka te galuega. Kae ne seki aoga a taumafaiga a te fili. Ko oti ne fakanofo ne Ieova a tena Tama “ke sili ‵mao atu i malo mo pulega mo malosi pule mo pulega a aliki.” (Efe. 1:20-22) E pelā me ko te Tupu, e fakaaoga ne Iesu a tena malosi pule ke puipui kae takitaki atu ana soko ke mautinoa me e fai eiloa te loto o tena Tamana.d Koi tumau eiloa te talaiga o te tala ‵lei, kae lau i miliona a tino loto fakamaoni ne akoakogina ki auala o Ieova. Mafāga o tauliaga e maua ne tatou ke ‵kau atu ki te galuega tāua tenei!

E FAKATOKA NE TE TUPU ANA TINO MŌ GALUEGA E ‵LASI ATU

12. Fakamatala mai a nisi ‵fuliga ne fai i te fakapotopotoga talu mai te taimi ne fakatu ei te Malo.

¹² Talu mai te taimi ne fakatu ei te Malo i te 1914, ne faka‵lei ne te Tupu a te auala e fakatoka ei a tavini a te Atua ke fai te loto o tena Tamana. (Faitau te Isaia 60:17.) I te 1919, ne filifili aka se takitaki o te galuega talai ke takitaki ne ia te faiga o te galuega talai i fakapotopotoga takitasi. I te 1927, ne fakatoka a te galuega talai masani mai fale ki fale i Aso Sa. I te 1931, ne fakamalosi aka a tino kolā e ‵lago ki te Malo ke fakauke olotou mea e fai i te taimi ne fakaaoga ei a te igoa faka-te-Tusi Tapu ko Molimau a Ieova. (Isa. 43:10-12) I te 1938, ne sui a te palotaga o tāgata taulia i te fakapotopotoga ki te filifiliga e ‵tusa mo manakoga mai te Tusi Tapu. I te 1972, ne tuku atu a te tausiga o te fakapotopotoga ki se potukau o toeaina i lō te ovasia fua e tokotasi i te fakapotopotoga. Ne fakamalosi atu ki tāgata katoa kolā e fetaui ‵lei ke taumafai o ‘tausi faka‵lei atu ki te lafu mamoe a te Atua.’ (1 Pe. 5:2) I te 1976, ne fakatoka a te Potukau Pule ki komiti e ono ke onoono ki te faiga o galuega o te Malo i te lalolagi kātoa. Talu mai te taimi tenā, ne tumau eiloa a te Tupu fakaekegina a Ieova o fakatoka a tino o te Malo i auala o te Atua.

13. Ne pokotia pefea tou olaga i mea ko oti ne fai i te 100 tausaga o te pulega a te Malo?

¹³ Ke mafaufau ki mea ne fai ne te Tupu faka-Mesia i te 100 tausaga muamua o tena pulega. Ko oti ne faka‵ma ne ia se potukau o tino mō te igoa o Ieova. Ko oti ne fakatonutonu ne ia a te talaiga o te tala ‵lei o te Malo i fenua e 239 kae akoako a te fia miliona o tino ki auala o Ieova. Ko oti ne fai ne ia ke ‵kau fakatasi a tino a‵lofa fakamaoni e silia atu i te fitu miliona, kolā e loto fia‵fia o fai te loto o tena Tamana. (Sala. 110:3) E tonu, e ‵lasi kae fakaofoofogia a galuega a Ieova e auala i te Malo faka-Mesia. Kae koi uke a mea fakaofoofogia ka ‵tupu i te taimi mai mua!

FAKAMANUIAGA A TE MALO FAKA-MESIA I TE TAIMI MAI MUA

14. (a) Se a te mea e fakamolemole atu tatou ki te Atua ke fai i te taimi e ‵talo atu ei tatou: “Ke oko mai tou Malo”? (e) Se a te ‵tou tusi siki mō te tausaga e 2014, kae kaia e fetaui ‵lei ei?

¹⁴ Faitalia me ne fakasopo ne Ieova a tena Tama ko Iesu Keliso, e pelā me ko te Tupu faka-Mesia i te 1914, e se tenei te tali katoatoa ki ‵tou ‵talo “ke oko mai tou Malo.” (Mata. 6:10) Ko leva ne ‵valo mai i te Tusi Tapu i a Iesu ka fanatu o ‘pule i ana fili.’ (Sala. 110:2) Koi tumau eiloa a malo o tāgata mai lalo i te pule a Satani o ‵teke atu ki te Malo. Kafai e ‵talo atu tatou ke oko mai te Malo o te Atua, e fakamolemole atu tatou ki te Atua ke uga mai a te Tupu faka-Mesia mo ana tupu lagolago o fakagata aka a pulega a tāgata kae tapale kea‵tea a tino ‵teke o te Malo mai te lalolagi. A te faifaiga tenei ka fakataunu i ei a pati i te Tanielu 2:44 i te Malo o te Atua “ka fakatakavale ne ia a malo katoa konā.” Ka fakaseai i ei a fili fakapolitiki o te Malo. (Faka. 6:1, 2; 13:1-18; 19:11-21) Ko pili ‵ki mai te taimi e tupu ei te mea tenei. Kae ko oko eiloa i te fetaui ‵lei o ‵tou tusi siki mō te tausaga e 2014, te katoaga o te 100 tausaga ne fakatu ei te Malo o te Atua i te lagi, telā ko te Mataio 6:10: “Ke oko mai tou Malo”!

15, 16. (a) Ne a mea fakaofoofogia ka ‵tupu i te vaitaimi o te Pulega i te Afe Tausaga? (e) Se a te ‵toe mea ka fai ne Iesu e pelā me ko te Tupu faka-Mesia, kae ka aoga pefea a te mea tenā ki te fuafuaga a Ieova mō ana mea katoa ne faite?

¹⁵ Kafai ko oti ne fakaseai ne te Tupu faka-Mesia a fili o te Atua, ko ‵pei ei ne ia a Satani mo ana temoni ki loto i te lua ‵poko mō te afe tausaga. (Faka. 20:1-3) Ona ko fakamalosiga ma‵sei ko seai, ka gasue eiloa te Malo o fakagalue a mea aoga o te taulaga togiola a Iesu ke fakaseai a ikuga o te agasala a Atamu. Ka toe faka‵tu aka ne te Tupu a te fia miliona kolā e ‵moe i tanuga kae fakatoka se polokalame lasi o akoakoga ke akoako latou e uiga ki a Ieova. (Faka. 20:12, 13) Ka lavea atu i te lalolagi kātoa a tulaga o te palataiso e pelā mo te fatoaga o Etena. A tino fakamaoni katoa ka gasolo aka ki luga i te tulaga ‵lei katoatoa.

¹⁶ I te fakaotiga o te Pulega a Keliso i te Afe Tausaga, ko taunu ei a te fuafuaga telā ne fakataunu ne te Malo faka-Mesia. I te taimi tenā, ka toe fakafoki atu ne Iesu a te Malo ki tena Tamana. (Faitau te 1 Kolinito 15:24-28.) Ka sē manakogina se sokoga i te va o Ieova mo ana fanau i te lalolagi. A tama katoa a te Atua i te lagi mo ana fanau i te lalolagi ka ‵kau fakatasi mo te lotou Tamana faka-te-lagi e pelā me ne vaega o tena kaukāiga i te lagi mo te lalolagi.

17. Se a te mea e fakaiku aka ne koe ke fai e uiga ki te Malo?

¹⁷ A mea fakaofoofogia kolā ne ‵tupu i te 100 tausaga o te pulega a te Malo e fakatalitonu mai ki a tatou i a Ieova e pule kae ko tena fuafuaga mō te lalolagi ka fakataunu eiloa. Ke tumau tatou i te fai mo ana tino a‵lofa fakamaoni kae fakasalalau atu te Tupu mo tena Malo. E fai ne tatou a te mea tenei mo te talitonu katoatoa me ko pili o tali mai a Ieova ki ‵tou ‵talo: “Ke oko mai tou Malo”!