MATAUPU I TE ‵KAVA | TE TAUA TELĀ NE ‵FULI EI TE LALOLAGI

Te Māfuaga Tonu o Taua mo Logo‵maega

I a Novema 11, 1918, ne gata atu ei te Taua Muamua a te Lalolagi. Ne ‵pono a fale pisinisi, kae ne ‵saka a tino i auala. Kae ne seki tumau te lotou saka‵saka fiafia tenā. E isi aka foki se mea tai fakamataku—ko sili atu eiloa i te fakamataku i lō masini-kani—telā ne ‵soko atu mai tua o te taua a te lalolagi.

A te masaki tamate tino telā ne lauiloa e pelā me ko te fulū faka-Sepania ne oso atu ki te koga taua i Falani i a Iuni 1918. Ne malosi ‵ki eiloa te manu o te masaki tenei. Ne tamate atu i ei a sotia Amelika e uke atu i Falani i lō tino ne ‵mate i fana a te fili i nai masina fua. Kae ne ‵pisi fakavave atu a te fulū me ne olo tasi atu mo tino i kautau kola ne ‵foki atu ki olotou fenua i te taimi ne oti atu ei te taua.

Ne fakamailoga a tausaga o taua konā ki te fiakai mo tulaga faiga‵ta i mea tau tupe. Ne fia‵kai a te ukega o fenua i Eulopa i te taimi ne gata ei te taua i te 1918. I te 1923, ne seai eiloa se aoga o te malosi o te tupe Siamani. I te ono tausaga mai tua ifo, ne pakū ei te malosi o te tupe i te lalolagi kātoa. Kae i te 1939, ne kamata ei te taua i te lua a te lalolagi—ne fai eiloa pelā me se faka‵sokoga o te taua muamua a te lalolagi i nisi auala. Se a te māfuaga o fakalavelave faiga‵ta katoa konei?

TE FAKAILOGA O ASO FAKAOTI

E fesoasoani mai a valoaga i te Tusi Tapu ke iloa ne tatou a pogai mai tua o mea ‵tonu kolā ne ‵tupu, kae maise eiloa i te Taua Muamua a te Lalolagi. Ne ‵valo mai ne Iesu Keliso se taimi telā ka “fai taua te suā atufenua ki te suā atufenua” mo ogegā meakai mo masaki kolā ka pokotia ei te lalolagi kātoa. (Mataio 24:3, 7; Luka 21:10, 11) Ne fai atu a ia ki ana soko me ka fai a vaegā fakalavelave faiga‵ta penā mo fai se fakailoga o aso fakaoti. E tuku mai a fakamatalaga tai uke atu i te tusi o Fakaasiga, telā e isi se sokoga o fakalavelave i te lalolagi ki se taua i te lagi.—Ke onoono ki te pokisi “Te Taua i te Lalolagi mo te Taua i te Lagi.”

I te tusi foki eiloa tenei i te Tusi Tapu e fakamatala mai i ei a tino e tokofa e ‵tele atu i luga i solofanua, telā e taku i nisi taimi ki tino ‵tele i solofanua e tokofa o te Apokalifa. E fakaata mai i tino e tokotolu i luga i solofanua a fakalavelave kolā e ‵pau mo mea kolā ne ‵valo mai muamua ne Iesu—taua, ogegā meakai, mo masaki. (Ke onoono ki te pokisi “E Mata, Koi ‵Tele Mai Eiloa a Tino Tokofa i Luga i Solofanua?”) E manino ‵lei, me ne fakamāfua aka ne te taua muamua se taimi o puapuaga telā e gasolo aka faeloa o masei. Kae e fakaasi mai i te Tusi Tapu me i a Satani ko te tino telā ne kamata eiloa ne ia. (1 Ioane 5:19) E mata, e mafai eiloa o fakagata atu tena malosi?

E fakatalitonu mai foki te tusi o Fakaasiga me “ko toetoe” fua te taimi o Satani. (Fakaasiga 12:12) Tenā eiloa te pogai e kaitaua malosi ‵ki ei kae fakamāfua aka ne ia a fakalavelave e uke i te lalolagi. Kae e se gata i ei, e fakamaoni mai ne fakalavelave kolā e lavea atu ne tatou me ko pili o palele atu a te taimi o Satani.

TE FAKAMAOFAGA O GALUEGA A TE TIAPOLO

Ne ‵fuli eiloa te tulaga i tala fakasolopito i te Taua Muamua a te Lalolagi. Ne aumai i ei se vaitaimi o taua ‵lasi, e fakamalosi aka ei a ‵tekeatuga mo te sē fakatalitonugina o takitaki pule. E tuku mai foki i ei se fakamaoniga matea o te ‵peiifoga o Satani mai te lagi. (Fakaasiga 12:9) Kae e fai eiloa a te pule sē matea tenei o te lalolagi e pelā me se pule fakasaua telā e iloa ne ia me ko pili o palele atu ana aso. Kafai ko oko mai tena gataga, ka gata atu foki ei a taimi o fakalavelave kolā ne fakamāfua aka ne te Taua Muamua a te Lalolagi.

E ‵tusa mo valoaga i te Tusi Tapu, e maua eiloa ne koe a pogai ke talitonu me i a Iesu Keliso, te ‵tou Tupu faka-te-lagi, ka “lepe ne ia a galuega a te Tiapolo.” (1 Ioane 3:8) E ‵talo atu a te fia miliona o tino ke oko mai te Malo o te Atua. E penā foki koe? E fakafetai tatou ki te Malo tenā, me ka lavea faka‵lei atu ne tino fakamaoni a te faiga o te loto o te Atua—kae e se ko te loto o Satani i te lalolagi nei. (Mataio 6:9, 10) Mai lalo i te Malo o te Atua, ka se toe ai eiloa se taua a te lalolagi—io me ko so se vaegā taua! (Salamo 46:9) Ke tauloto e uiga ki te Malo tenā, kae ka tumau ei koe i te ola ke lavea atu a te taimi ka ‵fonu ei te lalolagi i te filemu!—Isaia 9:6, 7.

Te Taua i te Lalolagi mo te Taua i te Lagi

I se 19 senitenali mai mua o te kamataga o te Taua Muamua a te Lalolagi, ne ofo atu ei ne Satani ki a Iesu a “malo katoa o te lalolagi.” (Mataio 4:8, 9) Ne ‵teke ne Iesu te fakaosoosoga tenā, kae ne taku fakamuli ne ia a te Tiapolo ki “te pule o te lalolagi.” (Ioane 14:30) Ne tusi mai foki te apositolo ko Ioane me i “te lalolagi kātoa ko nofo mai lalo i te pule a te tino masei.”—1 Ioane 5:19.

Moi ne lasi ‵ki te malosi o Satani te Tiapolo ki te lalolagi, e a, e sē se manatu ‵lei ke fakaiku aka me ne aofia a ia i te taua muamua a te lalolagi mo mea katoa ne iku mai i ei? E mautinoa eiloa, me e fakasino atu te tusi o Fakaasiga ki a Satani e pelā me ko te pogai o fakalavelave faiga‵ta kolā ne logo‵mae ei te lalolagi talu mai te 1914. Tenei te fakamatalaga toetoe o mea ‵tupu i te Fakaasiga mataupu e 12:

Fuaiupu e 7 Ne kamata te taua i te lagi i te va o Mikaele (Iesu Keliso) mo te talako (Satani).
Fuaiupu e 9 A te Tiapolo “telā e takitaki ‵se ne ia te lalolagi,” ko oti ne ‵pei ifo ki te lalolagi.
Fuaiupu e 12 “Kae ko malaia eiloa te lalolagi mo te tai, me ko oti ne fanaifo te Tiapolo ki a koulua, kae ko oko eiloa i te kaitaua me e iloa ne ia i tena taimi ko toetoe.”

E fakaasi mai ne te fakasologa o mea ‵tupu i te Tusi Tapu mo te lalolagi me ne tupu te taua tenei i te lagi mai tua o te fakatuakaga o te Malo o te Atua i te lagi i te 1914.a Tela la, ko te tausaga tāua foki eiloa tenā ne tupu i ei te taua a te lalolagi mo te taua i te lagi.

a Ke onoono ki te mataupu e 8 o te tusi ko te Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.

E Mata, Koi ‵Tele Mai Eiloa a Tino Tokofa i Luga i Solofanua?

A te solofanua ‵kena, telā te tino i luga i ei ko te tupu faka-te-lagi A te Tupu, ko Iesu Keliso eiloa, ko te tino telā e tele mai i te amiotonu. (Salamo 45:4) Tena galuega muamua ko te faka‵maga o te lagi mai i a Satani mo ana temoni.—Fakaasiga 6:2; 12:9.

A te solofanua ‵kula, te tino i luga i ei e maua ne ia te malosi ke “ave keatea” ne ia “a te filemu mai i te lalolagi.” (Fakaasiga 6:4) Talu mai te 1914, ko oti eiloa ne fakamalaia atu a taua ki tino. I se 21 fua tausaga mai tua ifo o te Taua Muamua a te Lalolagi, ne toe kamata aka ei te taua i te lua a te lalolagi telā ne tamate atu foki i ei a tino e tokouke atu. E fai mai se fakatautauga e tasi me ne ‵mate atu a tino e toko 60 miliona tupu i te Taua i te Lua a te Lalolagi. Talu mai te 1945, ne ‵tupu sāle a taua i nai fenua kae lasi foki eiloa te tamatega o tino i ei. E fakatautau mai ne tino tusitala me kāti e silia atu i te selau miliona o tino ne ‵mate atu i taua ne ‵tupu i te 20 senitenali.

A te solofanua uli, a te tino e sopo i ei e puke i tena lima se fua mea ‵mafa ke fakaata mai i ei a te ogegā meakai. (Fakaasiga 6:5, 6) I te taua muamua a te lalolagi, e isi se mea ne ‵pono aka ei te auala o Kautau telā ne ‵mate ei a tino kāti e toko 750,000 i Siamani ona ko te fia‵kai. E sili atu i te lua miliona o tino Lusia ne ‵mate i te fia‵kai i te 1921, kae ne toe ‵tupu a fakalavelave tai ‵pau i nisi koga. I mea katoa konei, e nofo loa ki te 70 miliona o tino ne ‵mate i te ogegā meakai i te 20 senitenali. I tausaga katoa, kāti e sili atu i te tolu miliona o tama‵liki mai lalo i te lima tausaga koi ‵mate eiloa i te sē paleni o meakai.

A te solofanua lanu kenakena, telā e aumai ne te tino i ei a te mate ona ko masaki ‵pisi. (Fakaasiga 6:8) A te ‵toe masaki sili muamua i te 20 senitenali ko te fulū faka-Sepania. E kese‵kese a aofaki i koga katoa, kae e fai mai se fakatautauga e tasi me ne ‵mate a tino e toko 50 miliona i te fulū. “A te mea tenei ko te ‵toe fakalavelave matagā eiloa ne tupu i tala fakasolopito,” ko muna i te tusi ko te Man and Microbes. “Ke oko foki eiloa ki masaki ‵pisi kolā e seki ‵mate vave ei a tino e tokouke.” Masaki o te kili, malalia, mo te sega, ko nisi masaki ‵pisi kolā ne ‵mate i ei te fia selau miliona o tino i te 20 senitenali.