Tali ki Fesili Mai te Tusi Tapu
E aoga pefea te mate o Iesu ki a tatou?
I te taimi ne faite ei ne te Atua a tino, ne manako a ia ke ōla latou ki te se-gata-mai i te lalolagi e aunoa mo logo‵maega io me ko te mate. Kae ko te tagata muamua, ko Atamu, ne seki fakalogo ki te Mafuaga kae ne galo atu tena fakamoemoega ke ola ki te se-gata-mai. E pelā me ne tino kolā ne ‵tupu mai i a Atamu, ne maua ne tatou te mate mai i a ia. (Loma 5:8, 12; 6:23) A te Atua tonu, ko Ieova, ne uga mai ne ia tena Tama, ko Iesu, ki te lalolagi ke mate kae toe faka‵foki mai a mea kolā ne ‵galo i a Atamu.—Faitau te Ioane 3:16.
Ne mate a Iesu ke mafai a tino o ola ki te se-gata-mai. E fakaataata pefea ne koe te olaga telā e seai se gatamaiga i te lalolagi?
Ne fai ne te mate o Iesu ke mafai o fakamagalo ‵tou agasala kae ke maua foki ne tatou te ola telā e seai sena gatamaiga. E tuku mai ne te Tusi Tapu ki a tatou se ata o te olaga i te lalolagi i te taimi ko se toe ai ei se olaga matua, masaki, mo te mate.—Faitau te Isaia 25:8; 33:24; Fakaasiga 21:4, 5.
E ‵tau o masaua pefea ne tatou te mate o Iesu?
A te afiafi mai mua o mate a ia, ne fai atu a Iesu ki ana soko ke masaua tena mate e auala i se fakamanatuga faigofie. A te fakamanatuga o te mate o Iesu i te auala tenā i tausaga katoa e tuku mai i ei se avanoaga ke mafaufau ‵loto tatou ki te lasi o te alofa o Iesu mo Ieova ki tino.—Faitau te Luka 22:19, 20; 1 Ioane 4:9, 10.
I te tausaga tenei, ka pakū eiloa te Fakamanatuga o te mate o Iesu ki te Aso Gafua, Apelila 14, māfai ko tō te mata o te la. E ‵kami atu eiloa koe ke kau atu ki Molimau a Ieova i tou fa‵kai.—Faitau te Loma 1:11, 12.