Fesili 2: Se a te Mea ka Tupu Māfai au e Mate?

A ROMAN koi tamaliki i te taimi ne mate ei a tena taugasoa pili i se fakalavelave tupu fakafuasei. “Ne pokotia masei au i te mate o toku taugasoa,” ko ana pati. “I te fia tausaga mai tua ifo o te fakalavelave, ne mafaufau faeloa au me se a te mea e tupu ki a tatou māfai e ‵mate tatou.”

Kaia e ‵tau ei o ‵sili a te fesili tenā? E foliga mai me i te ‵mate o tino e sē se mea masani. Faitalia me pefea te ma‵tua o tatou, e se ma‵nako sāle tatou ke ‵mate. E ma‵taku a tino e tokouke i mea kolā e ‵tupu mai tua o te mate.

Ne a pati a nisi tino me se a te tali? E tali‵tonu a tino e tokouke me e isi ne vaega o te tino e ola i te taimi e mate ei. E tali‵tonu latou me ka maua a te taui o tino ‵lei i te lagi, kae ko tino ma‵sei ka fakasala ki te se-gata-mai ona ko olotou agasala. E mafau‵fau a nisi tino me ko sē toe ola eiloa te tino māfai ko mate kae ka puli katoatoa atu.

Se a te mea e fakauiga ki ei a tali konā? E manatu aka te tali muamua me i te tino e se mate tonu i te taimi e mate i ei. E fakauiga loa te lua o tali me e seai se aoga o te olaga. Kāti ko maua ne latou kolā e mafau‵fau me e seai se aoga o te olaga a te kilokiloga tenei: “Ke na ‵kai kae inu tatou me ka taeao ko ‵mate ei tatou.”​—1 Kolinito 15:32.

Se a te mea e akoako mai i te Tusi Tapu? E se akoako mai i te Tusi Tapu me e isi ne vaega o te tino e ola i te taimi e mate ei. Ne fakaosofia ne te Atua a te tupu ko Solomona ke tusi mai penei: “E iloa ne tino ola i a latou e ‵mate, ka ko tino ‵mate e seai se mea a latou e iloa.” (Failauga 9:5) A tino kolā “e seai se mea a latou e iloa” e se iloa lele ne latou a mea i olotou tafa. E se mafai ne latou o fai so se mea. Tela la, e se mafai ne tino ‵mate o fesoasoani io me faka‵mae atu ki tino ola.

E ‵kese mai i te talitonuga o tino e tokouke, ne seki fuafua ne te Atua ko tino ke ‵mate. Ne faite ne ia te tagata muamua, ko Atamu, mo te fakamoemoega ke ola ki te se-gata-mai i te lalolagi. A te taimi fua e tasi telā ne taku mai ei ne te Atua a te mate, ko te taimi telā ne fai atu ne ia ki a Atamu a te fakasalaga o te sē fakalogo. Ne fakatapu ne ia a Atamu ma kai ki te fuaga o se lakau kae fakailoa atu ki tou tagata me kafai e kai a ia ki ei, a ia e “mate eiloa.” (Kenese 2:17) Moi ne tumau a Atamu mo Eva i te faka‵logo, penei la, ne tumau eiloa lāua mo la fanau katoa kolā ne a‵lofa fakamaoni ki te Atua i te ola i luga i te lalolagi ki te se-gata-mai.

Ne fakaiku aka ne Atamu ke ‵teke atu a ia ki te faka‵pulaga a te Atua. Ne agasala tou tagata i te taimi ne seki fakalogo ei ki te Atua, tenā ne mate ei a ia. (Loma 6:23) Ne seai se vaega o Atamu ne ola i tena matega. Ne seki toe ola a Atamu i te taimi ne mate i ei. Ne fai atu te Atua ki a Atamu: “A koe ka galue malosi kae tauta, kae faatoa maua ne au meakai mai te laukele, ke oko eiloa ki te taimi e toe foki ei koe ki te laukele tela ne mafua mai ei koe. A koe ne faite mai te laukele kae ka toe foki eiloa koe ki te laukele.” (Kenese 3:19) Ona ko tino katoa ne o‵mai i te gafa o Atamu, ko maua ne tatou a te agasala mo te mate mai i a ia.​—Loma 5:12.

Faitalia te masei o te fakaikuga a Atamu, ka fakataunu eiloa ne te Atua a Tena fuafuaga ke faka‵fonu te lalolagi ki fanau a Atamu. (Kenese 1:28; Isaia 55:11) Ko pili fua o toe faka‵tu aka ne Ieova a te tokoukega o tino kolā ko oti ne ‵mate. E uiga ki te taimi tenā, ne fai mai te apositolo ko Paulo: “Ka toe‵tu mai a tino amio‵tonu mo tino amio sē ‵tonu.”​—Galuega 24:15.

Ke maua a fakamatalaga e uke atu e uiga ki mea e ‵tupu i te taimi e mate ei te tino, onoono ki te mataupu e 6 o te tusi ko te Ne a Mea e Akoako ‵Tonu Mai i te Tusi Tapu? Ko mafai foki o maua i te www.jw.org

[Ata i te itulau e 7]

Ne a Pati a Iesu e Uiga ki te Mate?

Ne seki lotomalie a Iesu ki pati a nisi takitaki lotu i ana aso kolā ne fai mai me e seai se toe‵tuga o tino ‵mate. (Luka 20:27) Ne seki akoako foki ne ia me e isi ne vaega o te tino e ola i te taimi e mate i ei. I lō te fai penā, ne akoako mai ne Iesu a mea kolā e ‵soko mai.

Te mate e ‵pau mo te moe. I te taimi ne mate ei a tena taugasoa ko Lasalo, ne fai mai a Iesu: “A Lasalo te ‵tou taugasoa ko moe, kae ka malaga atu au o ‵fagu aka a ia.” Ne seki malamalama a soko o Iesu i te mea ne fakauiga a ia ki ei. Ne tali mai latou: “Te Aliki, kafai a ia e moe, ka toe ‵lei a ia.” E fakamatala mai te tala i te Tusi Tapu: “Ne faipati a Iesu e uiga ki tena mate. Kae ne leake latou me ne faipati a ia e uiga ki te moe o malōlō. Ne fai ‵tonu atu ei a Iesu ki a latou i te taimi tenā: ‘A Lasalo ko oti ne mate.’ ”​—Ioane 11:​11-14.

A tino ‵mate ka toe faka‵tu aka. I te okoatuga a Iesu ki te fa‵kai o Lasalo, ne fakamafanafana atu a ia ki te tuagane o Lasalo, ko Maleta, penei: “Ka toetu mai tou tuagane.” Tenā ne fai ei ne Iesu te tautoga tāua tenei: “Au ko te toetu mo te ola. Ko te tino telā e fakatuanaki mai ki a au, e tiga eiloa e mate, kae ka toe ola mai.” A te tautoga a Iesu e se ne pati fua ne sonafai. Ne toe fakatu aka ne Iesu a Lasalo i mata o tino e tokouke, faitalia me ko fa aso ne mate ei a ia.​—Ioane 11:​23, 25, 38-45.

I te fakaasiga telā ne tuku atu ne ia ki te apositolo ko Ioane, ne toe tauto atu a Iesu me i tino ‵mate ka toe faka‵tu mai. Ne fakamatala mai ne ia me e isi se taimi mai mua nei telā ka fakasaoloto mai ei ne te mate a tino katoa kolā ne tausi fakapagota ne ia i se auala fakatusa.​—Fakaasiga 20:13.