Tali ki Fesili Mai te Tusi Tapu
E mata, e fakaaloalo atu a lotu katoa ki te Atua?
Mai te fakalogologo ki tala o te lalolagi, kāti e mafai o lavea atu ne koe me e fai sāle i nisi taimi a mea ma‵sei i te igoa o lotu. Kae se ko lotu katoa e mafua mai i te Atua tonu. (Mataio 7:15) Tela la, ne takitaki ‵se ei a tino e tokouke.—Faitau 1 Ioane 5:19.
Kae ko te Atua e lavea eiloa ne ia a tino kolā e a‵lofa fakamaoni ki mea ‵lei kae ‵tonu. (Ioane 4:23) E ‵kami mai eiloa ne te Atua a vaegā tino penā ke tauloto ki te munatonu mai tena Muna, ko te Tusi Tapu.—Faitau 1 Timoteo 2:3-5.
E mafai pefea o lavea ne koe te lotu tonu?
Ko fai nei ne Ieova te Atua ke ‵kau fakatasi a tino mai lotu kese‵kese mai te akoako atu ki a latou te munatonu mo te akoako atu ke alofa te suā tino ki te suā tino. (Mika 4:2, 3) E mafai eiloa o lavea atu a latou i te lotu tonu i te auala e fakatau a‵lofa te suā tino ki te suā tino.—Faitau te Ioane 13:35.
Ka fai ne Ieova ke ‵kau fakatasi a tino mai koga kese‵kese ona ko te tapuakiga tonu.—Salamo 133:1
A tino tapuaki ‵tonu e fakavae te lotou fakatuanaki mo olotou olaga ki te Tusi Tapu. (2 Timoteo 3:16) Kae e fakaaloalo atu foki latou ki te igoa o te Atua. (Salamo 83:18) Kae e fakasalalau atu ne latou me i te Malo o te Atua ko te fakamoemoega e tasi fua mō tino. (Tanielu 2:44) E fakaakoako latou ki a Iesu mai te fakamaina atu o te lotou “mainaga,” mai te faiga o mea ‵lei ki olotou tuakoi. (Mataio 5:16) E mafai foki o lavea atu a Kelisiano ‵tonu, mai te āsi atu ki tino i olotou fale ke fakaasi atu te tala ‵lei o te Malo o te Atua.—Faitau te Mataio 24:14; Galuega 5:42; 20:20.