E Fesokotaki Sāle Koe mo te Atua?

A taugasoa ‵pili e fesokotaki faeloa faitalia me i telefoni, meli-iti, vitio mo tusi alofa. Ko te mea ke pili tatou ki te Atua e ‵tau o fesokotaki faeloa tatou mo Ia. E mafai pefea o fai te mea tenā?

E mafai o fai‵pati tatou ki a Ieova e auala i ‵talo. A ‵talo ki te Atua e ‵tai ‵kese eiloa mo ‵tou fesokotakiga masani mo ‵tou taugasoa. E ‵tau o masaua ne tatou me i te tino telā e ‵talo tatou ki ei ko te Mafuaga io me ko te ‵Toe Tino Maluga i te iunivesi. E fai ne te mea tenei ke ‵talo atu tatou i se auala āva kae fakaaloalo. Tela la, ko te mea ke talia mai ‵tou ‵talo ne te Atua, e isi ne mea kolā e manakogina ke aofia i ei. Konei a mea e tolu konā.

Muamua la, e ‵tau o fai ‵tonu atu ‵tou ‵talo ki a Ieova te Atua—e se ki a Iesu, “tino ‵malu” io me ne fakatusa. (Esoto 20:4, 5) E fai faka‵lei mai te Tusi Tapu: “Kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.” (Filipi 4:6) A te lua, e ‵tau o fai ‵tou ‵talo e auala i te igoa o te Tama a te Atua ko Iesu Keliso. Ne fakamatala mai penei a Iesu: “E seai se tino e fano ki te Tamana manafai e se ui mai i a au.” (Ioane 14:6) A ko te tolu, e ‵tau o fetaui ‵lei ‵tou ‵talo mo te loto o te Atua. E fai mai te Tusi Tapu: “Me kafai e fakatagi atu tatou ki se mea e ‵tusa mo tena loto, ka fakalogologo mai eiloa a ia ki a tatou.”a—1 Ioane 5:14.

Se mea tonu, me e se mafai o tumau se va fakataugasoa māfai e tokotasi fua te tino e faipati faeloa. E pelā eiloa mo taugasoa masani kolā e fesokotaki sāle, e ‵tau foki mo tatou o talia te Atua ke faipati mai ki a tatou kae ko tatou foki ke toka o fakalogologo i te taimi e faipati mai ei a Ia. E mata, e iloa ne koe te auala e faipati mai ei te Atua?

I aso nei, e “faipati” mai eiloa te Atua ki a tatou e auala i tena Muna ko te Tusi Tapu. (2 Timote 3:16, 17) E iloa pefea ne tatou te mea tenei? Mafaufau la, kafai ko maua ne koe se tusi mai sou taugasoa pili. Kafai e oti ne faitau koe ki ei, kāti ka fai atu koe ki nisi tino, “Au ne fatoa logo fua mai i toku taugasoa!” Tela la, ne fai a te fesokotakiga i konei, e se auala i te fai‵pati, kae e auala i se tusi. E penā foki eiloa māfai e fai‵tau ki te Tusi Tapu, ko talia eiloa ne koe a Ieova ke faipati atu ki a koe. E pelā mo Gina, telā ne fakamatala mai i te mataupu mai mua, ne fai mai tou fafine, “Kafai e manako au ke fai au mo taugasoa o te Atua, e ‵tau mo au o sukesuke faka‵lei ki tena tusi telā ne tuku mai ki a tatou—ko te Tusi Tapu.” Ne toe fai mai a ia, “A te faitau faeloa ki te Tusi Tapu ne fai ei ke fakapilipili atu au ki te Atua.” E mata, e talia ne koe te Atua ke faipati atu faeloa ki a koe i aso katoa, e auala i te faitau faeloa ki tena Muna ko te Tusi Tapu? Kafai e fai koe penā, ka fai ei ke pili atu koe ki te Atua.