E Seai Eiloa se Isi Olaga Tai ‵Lei Atu

Ne a au mea e ‵tau o fai ke pili koe ki te Atua? Ko oti nei ne mafau‵fau tatou ki mea konei mai lalo, kolā e mafai o fai ke ati aka se va fakataugasoa ‵pili mo Ia:

1. Ke iloa kae fakaaoga te igoa o te Atua, ko Ieova.

2. Ke fesokotaki faeloa mo Ia e auala i ‵talo mo te faiga o sukesukega ki tena Muna, ko te Tusi Tapu.

3. Ke tumau te fai o mea kolā e fiafia ki ei a Ieova.

E ‵tusa mo mea konei, e mata e mafai o fai atu koe me ne fai katoa ne koe a mea kolā e manakogina ke pili koe ki te Atua? E mata, e isi ne feitu e mafaufau koe me e ‵tau o momea aka tou ‵lei i ei? E manino ‵lei, me e manakogina a taumafaiga e uke, kae ke mafau‵fau nei tatou ki mea ka iku mai i ei.

“E aoga eiloa a taumafaiga takitasi kolā e fai ki te atiakaga o se fesokotakiga pili mo te Atua,” ko pati a Jennifer mai Amelika. “E tuku mai ne te fesokotakiga tenei a fakamanuiaga e uke: e momea aka te ‵tou tali‵tonu ki te Atua, momea aka te ‵tou malamalama, maina faka‵lei i ana uiga, kae sili atu i ei ko gasolo atu o lasi te ‵tou a‵lofa. E seai eiloa se isi olaga tai ‵lei atu!”

Kafai e manako koe ke ati aka se fesokotakiga pili mo te Atua, e fia‵fia eiloa a Molimau a Ieova o fesoasoani atu ki a koe. E mafai o fakatoka latou ke suke‵suke fakatasi mo koe ki te Tusi Tapu e aunoa mo se ‵togi. E mafai foki o kau atu koe ki olotou fakatasiga faka-te-Tusi Tapu i olotou Kingdom Hall, telā ka fetaui ei koe mo tino kolā e fakatāua malosi ne latou te lotou fesokotakiga mo te Atua.a Kafai e fai koe penā, ka mafai foki o ‵pau ou lagonaga mo te faisalamo telā ne fai mai penei: “Kae ki a au, se mea tafasili i te gali te pili ki te Atua.”—Salamo 73:28.