MATAUPU I TE ‵KAVA | E MAFAI O PILI ATU KOE KI TE ATUA
E Mata, e Pili Atu Koe ki te Atua?
“A te mauaga o se fesokotakiga pili mo te Atua e maua ei ne koe se lagonaga tokagamalie, katoatoa kae ‵mautakitaki. E fai pelā me e onoono mai faeloa a te Atua ke fai ne ia a te ‵toe mea ‵lei mō koe.”—CHRISTOPHER, SE TALAVOU TAGATA MAI I GHANA.
“E lavea ne te Atua ou logo‵maega katoa, kae ne fakaasi atu ne Ia te alofa mo te atafai i se auala telā e sili atu i lō te mea ne akai atu koe ki ei.”—HANNAH, TELĀ KO 13 ANA TAUSAGA MAI I ALASKA, AMELIKA.
“Ko te ‵toe lagonaga tāua kae gali ‵ki eiloa ke iloa atu me e maua ne koe se fesokotakiga pili mo te Atua!”—GINA, SE FAFINE MAI I JAMAICA, TELĀ KO 40 TUPU ANA TAUSAGA.
E se ko Christopher fua mo Gina ne maua ne lāua a lagonaga penā. E tokouke ‵ki eiloa a tino i te lalolagi kātoa e tali‵tonu me e kilo atu te Atua ki a latou e pelā me ne ana taugasoa. Kae e a koe? E mata, e mafaufau koe me e pili atu koe ki te Atua? Io me manako koe ke pili io me tai fakapilipili atu koe ki a Ia? Kāti e mafai o mafaufau koe penei: ‘E mata, e mafai eiloa o maua ne se tino fatauva penei se fesokotakiga pili mo te Atua Malosi Katoatoa? Kafai e mafai, ne a mea e ‵tau o fai?’
E MAFAI EILOA O PILI KOE KI TE ATUA
E ‵tusa mo pati i te Tusi Tapu, e mafai eiloa o maua se fesokotakiga pili mo te Atua. E fai mai i te Tusi Tapu, me ne taku ne te Atua a te tagata Epelu ko Apelaamo, ki “toku taugasoa.” (Isaia 41:8) Ke mafaufau foki ki te ‵kamiga alofa telā ne fakamau i te Iakopo 4:8: “Fakapilipili atu ki te Atua, kae ka fakapilipili mai a ia ki a koutou.” Tela la, e manino ‵lei i ei me e mafai eiloa o maua se fesokotakiga pili—va fakataugasoa—mo te Atua. Kae ona ko te mea e se mafai o lavea ne tatou a te Atua, e mafai la pefea o “fakapilipili atu” kae maua ne koe se fesokotakiga ‵lei mo Ia?’
Ke tali aka te fesili tenā, ke mafaufau ki te atiakaga o se va fakataugasoa o tino e tokolua. E masani eiloa o kamata ki te iloaga ne lāua o lā igoa. Tela la, i te taimi e tumau ei lāua i te fesokotaki atu, fakatau fakaasi atu lā mafaufauga mo lā lagonaga, ko gasolo aka ei o pili te lā va fakataugasoa. Kae i te taimi e taumafai ei lāua o fakatau fesoasoani atu, e gasolo aka ei o malosi te lā va fakataugasoa. E penā foki eiloa te atiakaga o se fesokotakiga pili mo te Atua. Ke onoono aka nei tatou ki te auala e fai ei te mea tenei.