MATAUPU I TE ‵KAVA | KE FIAFIA I TAU GALUEGA
Galuega ‵Mafa—Koi Tāua?
E manava fi‵ta a Alex i te taimi ne sau ne ia te suā pokisi ki luga i te motoka tali kope a se kamupane e tasi. Ne fesili ifo tou tagata: ‘Kaia e tumau loa au i te galuega tenei, telā e seai se fakamoemoega ke tai avaka ki luga?’ ‘Māfea ka maua ne au se galuega tai ‵lei atu? E ‵lei fakafia atu toku olaga moi ne se galue au!’
E pelā mo Alex i te tala tenei, e tokouke foki eiloa a tino i aso nei e se fia‵fia ki galuega ‵mafa. “E mafau‵fau a te tokoukega o tino me e se ‵lei ke fai ne latou a galuega ‘fatauva’” ko pati a se tino tausi mea, ko Aaron. “E ma‵natu aka latou: ‘E fai fua ne au te galuega tenei ke oko ki te taimi e maua i ei se galuega tai ‵lei atu.’”
Kaia e mafau‵fau ei, a tino e tokouke me e se ‵tau o fai ne latou a galuega ‵mafa? Kāti e fakamalosi aka latou ne mea fakasalalau tala kolā e fai mai i ei, me i te olaga maumea kae se galue ‵mafa ko te ‵toe olaga “‵lei” eiloa tenā. E fai mai se tino e galue i te ‵teuga mo te faitega o fale ko Matthew: “E mafau‵fau a tino me ko tou galue malosi ko te sē lasi o tou manuia. Tenā foki eiloa te mea ne lavea ne Shane, se tino faite fale kae ‵teu ofisa. Ne fai mai a ia, “A te galue fakamaoni i te aso kātoa, se mea telā ko se fai sāle ne tino.”
Kae e ‵kese mai ei e fia‵fia eiloa a tino manuia e tokouke ki te galue ‵mafa. “I taku faka‵tau e fakafiafia ‵ki eiloa a te galue ‵mafa, maise eiloa māfai e tāua a fakamoemoega e kausaki atu ki ei,” ko pati a se tino galue i galuega fakatū‵tu ko Daniel, telā ko 25 ana tausaga. Ne lotomalie foki a Andre telā ko 23 ana tausaga ki te manatu tenā. Ne fai mai a ia, “E talitonu au me e isi se sokoga o te fiafia mo te fakafiafia ki te faiga o galuega.” “A te mu‵tana o galuega mo mea e fai e sē se galuega telā e takitaki atu ei ki te fiafia tumau—kae se tulaga fakafanoanoa!”
Ne maua pefea ne Daniel mo Andre se kilokiloga ‵lei e uiga ki te galue ‵mafa? E faigofie fua te tali, ne fakagalue aka ne lāua a akoakoga fakavae mai te Tusi Tapu i lā olaga. E ‵kese mai te faka‵tuka atu ki te galue ‵mafa, e fakamalosi aka ne te Tusi Tapu a te loto fiafia mo te tumau i ei. E uke atu a mea e fakamatala mai i te Tusi Tapu i lō te fai mai fua ke ga‵lue. E fakaasi mai foki i ei te auala ke fia‵fia tatou ki ‵tou ga‵luega.
Ne a akoakoga fakavae e mafai o fesoasoani atu ke maua ne koe te lotomalie i tau galuega? E ‵kami atu eiloa ne matou a koe ke mafaufau ki nāi mea konā i te taimi e sau‵tala tatou ki ei i te mataupu telā e ‵soko mai.