TALI KI FESILI MAI TE TUSI TAPU

E gata eiloa i konei te olaga?

Kai mafaufau aka eiloa koe me e uke atu a mea e aofia i te olaga i lō te ta‵fao, galue, avaga, puti aka se kāiga, mo te gasolo aka fua o matua? (Iopu 14:1, 2) E fakaasi mai i te Tusi Tapu me ke oko foki eiloa ki toe tino ‵poto, ne fia iloa foki ne latou a te tali ki te fesili tenei.—Faitau te Failauga 2:11.

E mata, e isi se aoga o te olaga? Muamua la, e ‵tau o fesili atu tatou, Ne kamata pefea te olaga? Mai tua o te iloiloga o te faitega fakaofoofogia o ‵tou mafaufau mo ‵tou foitino kātoa, ko oti ne fakaiku aka ne tino e tokouke me ne faite eiloa a tatou katoa ne te Mafuaga poto. (Faitau te Salamo 139:14.) Kafai e penā loa, ko tena uiga, e isi se pogai ne faite ei ne ia tatou! A te iloa atu o te pogai tenā e mafai o momea aka te aoga o ‵tou olaga.

Kaia ne faite ei a tino?

Ne fakamanuia ne te Atua a te tauavaga muamua kae ne tuku atu ki a lāua se galuega fakafiafia. A tena fuafuaga mō lāua ke faka‵fonu te lalolagi, ke fai mo fai te palataiso, kae ke ola ki te se-gata-mai.—Faitau te Kenese 1:28, 31.

Ne taofi aka te fuafuaga a te Atua i te taimi ne ‵teke atu ei a tino ki tena pulega. Kae ne seki fakaseaoga ne te Atua a tatou—io me ko tena fuafuaga. E fakatalitonu mai te Tusi Tapu me ne galue malosi a te Atua ke faka‵sao a tino fakamaoni kae ke fakataunu foki tena fuafuaga mō te lalolagi! Tela la, e manako te Atua ke ola i te olaga e ‵tusa mo te mea ne manako a ia ki ei! (Faitau te Salamo 37:29.) Ke na sukesuke ki te Tusi Tapu ke iloa aka ei a te auala e mafai o maua ne koe a mea aoga mai te fuafuaga a te Atua.