“Se Galuega Tafasili i te Lasi”

SE TAIMI ke fai ei te fono tāua i Ielusalema. Ne fai ne te tupu ko Tavita se fakapu‵laga ki ana pelenise katoa, a ofisa a te tupu mo tagata malosi ke maopoopo mai katoa. Ne fia‵fia malosi latou o aumai o fakalogologo ki se fakapu‵laga fakapito. Ne ‵tofi ne Ieova a te tama a Tavita ko Solomona ke faite se fale fakaofoofogia ke fai ei te tapuakiga ki te Atua tonu. Ne maua ne te tupu matua o Isalaelu a te palani o te fale e auala i te agaga kae ne tuku ne ia ki a Solomona. “Se galuega tafasili i te lasi,” ko pati a Tavita, ‘me i te mea tenei e sē se palesi mō tagata, kae se fale mō Ieova te Atua.’—1 Nofo. 28:1, 2, 6, 11, 12; 29:1.

Ne toe fesili a Tavita: “I te taimi nei, ko oi foki se tino e loto o avatu sena taulaga mo tena lotomalie ki te Aliki?” (1 Nofo. 29:5) Moi ne kau atu koe ki te fono tenā, e pefea tau tali? E mata, ka ‵lago atu koe ki te galuega lasi tenā? Ne gasue fakava‵vave te kau Isalaelu. E tonu ‘ko oko eiloa te lotou fia‵fia me ko uke a mea ne tuku atu ne latou . . . ne avatu eiloa ne tino a olotou mea mo te lotomalie ki a Ieova mo te loto kātoa.’— 1 Nofo. 29:9.

I senitenali fakamuli, ne fai foki ne Ieova se galuega lasi atu ki te faletapu. Ne faite ne ia se faletapu faka-te-agaga, se fakatokaga mo tino katoa ke olo atu ki a ia i te tapuakiga e auala i te taulaga a Iesu. (Epe. 9:11, 12) Te auala fea e fesoasoani atu ei a Ieova ki tino ke faka‵lei mo Ia i aso nei? I te galuega ko te faiga o ‵soko. (Mata. 28: 19, 20) A te ikuga o te galuega tenei, i tausaga takitasi e lau i miliona o tino e fai olotou akoga faka-te-Tusi Tapu, lau i afe e papatiso, kae e lau i afe foki a fakapotopotoga fou e faka‵tu.

Se gata i ei, a te gasolo ki mua o te galuega ne manakogina ke uke a tusi faka-te-Tusi Tapu e ‵lomi, a te faite mo te tausi o Fale Tapuaki, mo koga ke fai ei a fono fo‵liki mo fono ‵lasi. E mata, e talitonu koe i tau galuega ki te fakasalalau atu te tala ‵lei e lasi ‵ki kae e isi se taui i ei?—Mata. 24:14.

A te alofa ki te Atua, ‵tou tuakoi mo te fakavave o talai atu a te Malo e fakamalosi ei ke avatu ne tino a olotou “taulaga mo te lotomalie ki a Ieova mo te loto kātoa” mai te tuku atu olotou meaalofa. Se mea fakafiafia ke ‘avatu ki a Ieova te fua tafasili i te lei o au mea tāua’ kae ka lavea ne koe i ou kope tāua konā ka fakaaoga i se auala poto ke fai te galuega tafasili i te tāua i tala fakasolopito o tino!—Faata. 3:9.

Auala E Fai Ei Ne Nisi Tino Olotou Meaalofa Ki Te Galuega I Te Lalolagi Kātoa

A te tokoukega o tino i aso nei e “tuku fakaa‵tea” ne latou se aofaki tupe, kae faulu ki loto i te pokisi meaalofa telā e fakamailoga “Galuega i te Lalolagi Kātoa.” (1 Koli. 16:2) I masina takitasi, e avatu ne fakapotopotoga a meaalofa konei ki te ofisa o Molimau a Ieova i te atufenua tenā. E mafai foki o avatu ‵tonu au meaalofa ki se koga tonu telā e fakaaoga ne Molimau a Ieova i tou fenua. Ko te mea ke iloa ne koe te igoa o te koga tonu telā e fakaaoga ne Molimau a Ieova i tou fenua, fakamolemole, fesokotaki atu ki te ofisa lagolago telā e tausi mai ki tou fenua. E mafai o maua ne koe a te fakatuatusi o te ofisa lagolago i te www.pr2711.com. A vaegā meaalofa kolā e mafai o avatu tonu ne koe, konā eiloa e fakasolo atu mai lalo:

MEAALOFA KOLĀ E TUKU ATU

Ko meaalofa pelā mo bank transfer, debit mo credit card. I nisi ofisa lagolago, e mafai o fakaaoga ne koe te jw.org mo nisi website.
Ko meaalofa tupe, fatu tāua, io me ko nisi kope totino kolā e tāua. Ke tusi se tusi telā e fakaasi atu ei a tupe mo nisi mea aka kolā e aofia i se meaalofa telā e tuku atu.

MEAALOFA KOLĀ E ISI NE FAKATOKAGA KI EI

A meaalofa tupe kolā e isi ne fakatokaga ki ei e mafai o toe faka‵foki mai māfai e manako ki ei a te tino i a ia te meaalofa.
E aofia i ei se tusi e fakaasi atu ei i te meaalofa e isi se fakatokaga ki ei.

AOFAGA KI TE FAIGA O MEAALOFA

I tafa o meaalofa tupe mo kope totino kolā e tāua, e isi ne nisi auala e fai ei a meaalofa ke aoga ki te galuega o te Malo i te lalolagi kātoa. A mea konei e fakasolo atu mai lalo. Faitalia me se a te auala e fakaaoga ne koe, fesokotaki muamua ki te ofisa lagolago telā e nofo tou fenua mai lalo i ei me ne a auala e mafai o fakaaoga i tou fenua. Ona ko te kese‵kese o manakoga o te tulafono mo tulafono i mea tau lafoga, se mea tāua ke fai‵pati muamua mo te tino e poto i mea tau lafoga mo tino i mea tau tulafono a koi tuai o filifili a te ‵toe auala ‵lei ke fai ei a meaalofa.

Tupe Fakaleoleo: Se meaalofa e tuku fakapitoa ke aoga ki se kope e fakaaoga ne Molimau a Ieova i te olaga kātoa io me se palani i te taimi e li‵taea ei mai te galuega.

Akauni i te Pagike: E fakatoka a akauni i te pagike, io me ko akauni o tupe li‵taea a tino taki tokotasi e pelā me se tupe faka‵na io me tuku atu i te taimi e mate ei a ia ki Molimau a Ieova e ‵tusa mo manakoga o te pagike i te koga telā e nofo koe i ei.

Fakavae mo Feagaiga: A tupe kolā e isi se fakavae ne fai ki ei mo tupe fakafeagaiga e fakameaalofa atu ki Molimau a Ieova e pelā me se meaalofa e tuku katoatoa atu io me e pelā me se feagaiga i te taimi e mate ei te tino.

Kope Totino: A kope totino kolā e mafai o ‵togi ki tua e fakameaalofa atu ki se kope telā e fakaaoga ne Molimau a Ieova, mai te fai pelā me se meaalofa e tuku katoatoa atu io me kafai se fale e ‵nofo i ei a tino, e nofo fua i ei te tino telā ne fakameaalofa atu ne ia te koga tenā ke oko ki te taimi e mate ei.

Meaalofa Mai se Tupe ‵Teu: Tupe kolā e fakameaalofa atu ki Molimau a Ieova mai lalo i se fakatokaga e fai ne te tino ke tuku atu te aofaki tupe tenā e maua i tausaga takitasi ki Molimau a Ieova. E toese a te lafoga o te tino telā ne fakameaalofa ana tupe maua mai te tupe ‵teu.

Togi mo Māvaega: Ko kope totino io me ko tupe kolā e mafai o togi ki Molimau a Ieova mai te faiga o se togi telā ne fakatulafono io me ko te fakapotopotoga telā e fakasino tonu ki ei te māvaega. Kāti e isi ne lafoga e mafai o ‵togi i te fakatokaga tenei.

E pelā mo te uiga o te tugāpati tenei “aofaga ki te faiga o meaalofa,” a vaegā meaalofa konei e manakogina i ei se palani a te tino telā e fai tena meaalofa. Ke fesoasoani atu ki tino taki tokotasi kolā e ma‵nako o fai meaalofa ki te galuega a Molimau a Ieova i te lalolagi kātoa, ko oti ne fakatoka a te polosiua ko te Charitable Planning to Benefit Kingdom Service World-wide i te ‵gana Palagi mo te ‵gana Sepania. Ne tusi a te polosiua tenei ke tuku mai i ei a fakamatalaga ki auala kese‵kese e mafai ei o fai a meaalofa i te taimi nei mo te taimi mai mua, e pelā me se togi mate. Kāti e se fakaaoga katoa a fakamatalaga i te polosiua tenei ki a koe ona ko lafoga mo nisi tulafono i tou fenua. Mai te fakaaogaga o auala penā e tuku atu ei a meaalofa, ko oti ne fesoasoani atu a tino e tokouke ke ‵lago mai ki ‵tou galuega fakalotu mo galuega fesoasoani i te lalolagi kātoa kae maua a mea aoga e uke mai i olotou lafoga. Kafai e isi se fakatokaga penā i tou fenua, e mafai o maua a te polosiua mai te fakamolemole atu ki te failautusi o te fakapotopotoga.

Ke maua a fakamatalaga e uke atu, e mafai ne koe o fili te ulutala tenei “Make a Donation to Our Worldwide Work” telā e maua i te fakatuatusi i te feitu ki lalo o te itulau kamata o te jw.org, io me fesokotaki atu ki te ofisa lagolago telā e tausi mai ki tou fenua.