Te Auala e Mafai ei Tatou o Fesoasoani ki Manakoga Tonu o Nisi Tino
“FAKASAUĀGA kolā ne māfua mai i se palota ne fai, ne faimālō ei a te fia afe o Molimau a Ieova ke tiakina olotou fale,” ko pati a François, se toeaina i se fenua koi ati aka. “Ko sē maua gofie a meakai mo vailakau kae ko oko foki eiloa i te ‵togi ‵mafa. A pagike ko ‵pono, kae ko masini tata tupe ko seai ne sene i ei io me ko sē ga‵lue.”
Se mea vave eiloa a taina mai te ofisa lagolago o ave a fesoasoani ki Molimau kolā ne tiakina olotou fale kae maopoopo i Kingdom Halls i te fenua. E ‵pono ne potukau faitaua a auala, kae ko te motoka mai te ofisa lagolago ne talia ke tele sāle me iloa ne potukau e lua i Molimau e tumau eiloa i te sē ‵kau ki se feitu.
“I te motou auala ki te Kingdom Hall e tasi, ne fanafana ei te motou motoka,” ko pati a François. “Kae ‵lei i polofana ne seke‵seke mo matou. I te laveaga ne matou a te sotia e tele mai mo te fana ki luga i a matou, se mea vave eiloa o fakatele ki tua a te motoka, ‵pale fakavave kae tele makini o toe foki ki te ofisa lagolago. Ko oko eiloa te fakafetai o matou ki a Ieova i a matou ne ola. I te suā aso, ne taunu atu eiloa a taina e toko 130 i te Kingdom Hall tenā ki se koga e saogalēmū ei latou. Ne o‵mai a nisi tino ki te ofisa lagolago kae ne tausi atu matou ki a latou i te feitu faka-te-agaga mo mea e ma‵nako ki ei ke oko ki te taimi ko seai ei se fakalavelave.”
“Fakamuli ifo, ne maua ne te ofisa lagolago a tusi e uke mai taina i konā e fakaasi mai i ei a te ‵poko o te lotou loto fakafetai,” ko muna a François. “Ne momea aka te lotou tali‵tonu ki a Ieova ona ko te auala ne fesoasoani atu ei olotou taina i nisi koga ki a latou.”
I taimi o fakalavelave o te natula mo fakalavelave ne fai ne tino, e se fai atu tatou ki taina mo tuagane kolā e ma‵nako ki se fesoasoani “ke mafanafana kae ke ‵kai ke ma‵kona.” (Iako. 2:15, 16) I lō te fai penā, e tuku atu ne tatou a mea kolā e manakogina ne latou i te feitu faka-te-foitino. I se auala tai ‵pau, i te otiga ne maua ne latou se faka‵pulaga i te senitenali muamua e uiga ki se oge meakai telā ka oko mai, “ne fakaiku aka ne soko katoa ke avatu se fesoasoani ki taina kolā e ‵nofo i Iuta, e ‵tusa mo te mea e mafai ne latou taki tokotasi o tuku atu.”—Galu. 11:28-30.
E pelā me ne tavini a Ieova, e loto fia‵fia eiloa tatou o fesoasoani ki tino taki tokotasi kolā e ma‵nako ki se fesoasoani i te feitu faka-te-foitino. E isi foki se manakoga faka-te-agaga i tino. (Mata. 5:3) Ke fesoasoani atu ke iloa ne latou olotou manakoga faka-te-agaga kae fakamalie aka te manakoga tenei, ne fakatonu atu a Iesu ki ana soko ke fai a soko. (Mata. 28:19, 20) Ne tuku katoatoa atu ne tatou taki tokotasi a te ukega o ‵tou taimi, malosi mo mea e maua ke fakataunu te fakatonuga tenā. E pelā me se fakapotopotoga, e fakaaoga ne tatou a nisi meaalofa tupe ke fesoasoani atu i te feitu faka-te-foitino, kae ko meaalofa tupe e fakaaoga fakapitoa eiloa ke ‵lago atu ki mea o te Malo mo te fakasalalauga o te tala ‵lei. E fakaasi atu ne tatou i ei a ‵tou a‵lofa ki te Atua mo tuakoi.—Mata. 22:37-39.
E tali‵tonu a tino kolā e ‵lago atu ki te galuega a Molimau a Ieova i te lalolagi kātoa i olotou meaalofa e fakaaoga faka‵lei i te ‵toe auala ‵lei. E mata, e mafai ne koe o avatu a meaalofa fesoasoani ki ou taina kolā e ma‵nako ki ei? E mata, e loto fiafia koe o ‵lago ki te faiga o soko? Kafai e fiafia koe, ke “fai a faiga ‵lei ki tino fakaa‵lofa i so se taimi e toka ei koe.”—Faata. 3:27.
[Ata i te itulau e 8]
[Pokisi i te itulau e 9]
[Ata i te itulau e 9]
Te Auala E Filifili Ei A Nisi Tino Ke Fai Meaalofa Ki Te Galuega I Te Lalolagi Kātoa
E pelā mo aso o te apositolo ko Paulo, a te tokoukega o tino e “tuku fakaa‵tea” ne latou se aofaki tupe kae faulu ki loto i te pokisi meaalofa telā e fakamailoga “Galuega i te Lalolagi Kātoa.” (1 Koli. 16:2) I masina takitasi, e avatu ne te fakapotopotoga a meaalofa konei ki te ofisa o Molimau a Ieova i te atufenua tenā. E mafai foki o avatu tonu au meaalofa ki se koga telā e fakaaoga ne Molimau a Ieova i tou fenua. Ko te mea ke iloa ne koe te igoa o te koga telā e fakaaoga ne Molimau a Ieova i tou fenua, fakamolemole, fesokotaki atu ki te ofisa lagolago telā e tausi mai ki tou fenua. E mafai o maua ne koe a te fakatuatusi o te ofisa lagolago i te www.pr2711.com. A vaegā meaalofa kolā e mafai o avatu tonu ne koe, konā eiloa e fakasolo atu mai lalo:
MEAALOFA KOLĀ E TUKU KATOATOA ATU
• Ko meaalofa tupe, fatu tāua, io me ko nisi kope totino kolā e tāua.
• E aofia i ei se tusi telā e fakaasi atu ei a tupe mo nisi mea aka se meaalofa telā e tuku katoatoa atu.
MEAALOFA KOLĀ E ISI NE FAKATOKAGA KI EI
• A meaalofa tupe kolā e isi ne fakatokaga ki ei e mafai o toe faka‵foki mai māfai e manako ki ei a te tino i a ia te meaalofa.
• E aofia i ei se tusi e fakaasi atu ei i te meaalofa e isi se fakatokaga ki ei.
AOFAGA KI TE FAIGA O MEAALOFA
I tafa o meaalofa tupe mo kope totino kolā e tāua, e isi ne nisi auala e fai ei a meaalofa ke aoga ki te galuega o te Malo i te lalolagi kātoa. A mea konei e fakasolo atu mai lalo. Faitalia me se a te auala e fakaaoga ne koe, fesokotaki muamua ki te ofisa lagolago telā e nofo tou fenua mai lalo i ei me ne a auala e mafai o fakaaoga i tou fenua. Ona ko te kese‵kese o manakoga o te tulafono mo tulafono i mea tau lafoga, se mea tāua ke fai‵pati muamua mo tino o te tulafono a koi tuai o filifili a te ‵toe auala ‵lei ke fai ei a meaalofa.
Tupe Fakaleoleo: Se meaalofa e tuku fakapitoa ke aoga ki se kope e fakaaoga ne Molimau a Ieova i te olaga kātoa io me se palani i te taimi e li‵taea ei mai te galuega.
Akauni i te Pagike: E fakatoka a akauni i te pagike, io me ko akauni o tupe li‵taea a tino taki tokotasi e pelā me se tupe faka‵na io me fai ke ‵togi atu i te taimi e mate ei ki se kope telā e fakaaoga ne Molimau a Ieova e ‵tusa mo manakoga o te pagike i te koga telā e nofo koe i ei.
Fakavae mo Feagaiga: A fakavae mo tupe fakafeagaiga e fakameaalofa atu ki se kope o Molimau a Ieova e pelā me se meaalofa e tuku katoatoa atu io me fai se feagaiga ke ‵togi atu i te taimi e mate ei.
Kope Totino: A kope totino kolā e mafai o ‵togi ki tua e fakameaalofa atu ki se kope telā e fakaaoga ne Molimau a Ieova, mai te fai pelā me se meaalofa e tuku katoatoa atu io me kafai se fale e ‵nofo i ei a tino, e ‵nofo fua i ei te tino telā ne fakameaalofa atu te koga tenā ke oko ki te taimi e mate ei.
Meaalofa Mai se Tupe ‵Teu: Tupe kolā e fakameaalofa atu ki se kope telā e fakaaoga ne Molimau a Ieova mai lalo i se fakatokaga e fai ne te tino ke maua ne te kope a te aofaki tupe tumau mai te tupe ‵teu i te tausaga i te olaga kātoa. E toese a te lafoga o te tino telā ne fakameaalofa ana tupe maua mai te tupe ‵teu.
Togi mo Māvaega: Ko kope totino io me ko tupe kolā e mafai o togi mate atu ki te kope telā e fakaaoga ne Molimau a Ieova mai te faiga o se togi mai lalo i te tulafono io me e auala i te fakaasi fakapitoa atu a te kope telā e fai ki ei a te māvaega. Kāti e isi ne lafoga mautinoa e manakogina ke ‵togi i te fakatokaga tenei.
E pelā mo te uiga o te tugāpati tenei “aofaga ki te faiga o meaalofa,” a vaegā meaalofa konei e manakogina i ei se palani a te tino telā e fai tena meaalofa. Ke fesoasoani atu ki tino taki tokotasi kolā e ma‵nako o fai meaalofa ki te galuega a Molimau a Ieova i te lalolagi kātoa, ko oti ne fakatoka a te polosiua ko te Charitable Planning to Benefit Kingdom Service Worldwide i te ‵gana Palagi mo te ‵gana Sepania. Ne tusi a te polosiua tenei ke tuku mai i ei a fakamatalaga ki auala kese‵kese e mafai ei o fai a meaalofa i te taimi nei mo te taimi mai mua, e pelā me se togi mate. Kāti e se fakaaoga katoa a fakamatalaga i te polosiua tenei ki a koe ona ko lafoga mo nisi tulafono i tou fenua. Tela la, kafai ko oti koe ne faitau ki te polosiua, e ‵tau o fesokotaki koe ki tau tino fakatonutonu i mea tau tulafono io me ko lafoga. Mai te fakaaogaga o auala penā e tuku atu ei a meaalofa, ko oti ne fesoasoani atu a tino e tokouke ke ‵lago mai ki ‵tou galuega fakalotu mo galuega fesoasoani i te lalolagi kātoa kae maua a mea aoga e uke mai i olotou lafoga. Kafai e isi i tou fenua, e mafai o maua a te polosiua mai te fakamolemole atu ki te failautusi o te fakapotopotoga.
Ke maua a fakamatalaga e uke atu, e mafai koe o fesokotaki ki te Charitable Planning Office, i te telefoni io me tusi atu ki ei i fakatuatusi kolā e fakasolo mai lalo, io me fesokotaki atu ki te ofisa lagolago telā e galue ki tou fenua.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive
Patterson, New York 12563-9204
Telefoni: (845) 306-0707