Ka Fakataunu Eiloa a Fuafuaga a Ieova!

1, 2. (a) Se a te mea ko oti ne fakaasi mai ne Ieova ki a tatou? (e) Se a te fakatalitonuga e maua ne tatou i te Isaia 46:10, 11 mo te 55:11?

NE TUKU mai ne pati kamata konei i te Tusi Tapu se fuaiupu e faigofie kae ‵loto: “I te kamataga ne faite ne te Atua a te lagi mo te lalolagi.” (Kene. 1:1, NW) E tonu, e foliki fua te ‵tou mea e iloa mai mea e uke ne faite ne te Atua, e pelā mo te vanimonimo, te mainaga, te kalaveti, kae ko mea konā ne lavea ne tatou, se vaega foliki fua o te iunivesi. (Fai. 3:11) Kae ne fakaasi mai eiloa ne Ieova ki a tatou a tena fuafuaga mō tino ola. Ne ‵tau o fai te lalolagi mo fai se fale tafasili i te gali mō tāgata mo fafine kolā ne faite ki foliga o te Atua. (Kene. 1:26) Ka fai latou mo ana tama, kae ko Ieova ko te olotou Tamana.

² I te mataupu e tolu o te Kenese, e fakamatala mai ei a taumafaiga ne fai ke fakamasei ei te fuafuaga a Ieova. (Kene. 3:1-7) Kae tiga te feitu tenā, ne seki iku manuia te taumafaiga tenā. E seai eiloa se tino e mafai o ‵pono ne ia a Ieova. (Isa. 46:10, 11; 55:11) Tela la, e mafai o tali‵tonu tatou me ka fakataunu eiloa ne Ieova i te taimi tonu a tena fuafuaga i te kamataga!

3. (a) Ne a muna‵tonu fakavae ki te ‵tou malamalama e uiga ki te fekau mai te Tusi Tapu? (e) Kaia e ‵tau ei mo tatou o toe sau‵tala ki akoakoga konā i te taimi nei? (i) Ne a fesili ka sau‵tala nei tatou ki ei?

³ E seai se fakalotolotolua me e masani ‵lei tatou mo muna‵tonu e uiga ki te fuafuaga a te Atua ki te lalolagi mo tino penā foki mo te tusaga tāua o Iesu Keliso i te fakataunuga o te fuafuaga a te Atua. A mea konā ko akoakoga fakavae tāua kae ko muna‵tonu muamua foki ne tauloto ne tatou i te kamataga o suke‵suke ki te Muna a te Atua. Kae ma‵nako tatou ke fesoasoani ki tino loto ‵lei ke iloa ne latou a akoakoga tāua konei. I te taimi e suke‵suke tatou ki te mataupu tenei e pelā me se fakapotopotoga, e taumafai malosi tatou o ‵kami mai a tino e tokouke ki te Fakamanatuga o te mate o Keliso. (Luka 22:19, 20) Ka tauloto eiloa a tino kolā e ‵kau mai ki mea e uke e uiga ki te fuafuaga a te Atua. Tela la, i nai aso konei mai mua o te Fakamanatuga, se mea ‵lei ke na mafau‵fau tatou ki fesili kolā e fakaalaala aka ei a te fia‵fia i ‵tou akoga faka-te-Tusi Tapu mo tino loto ‵lei i te fakatasiga tāua tenei. Ka sau‵tala nei tatou ki fesili e tolu: Se a te fuafuaga a te Atua i te kamataga e uiga ki te lalolagi mo tino? Se a te fakalavelave ne tupu? Kae kaia e fai ei te taulaga togiola a Iesu e pelā me ko te kī ke ‵tala aka ei te mataloa ke fakataunu ei te fuafuaga a te Atua?

SE A TE FUAFUAGA MUAMUA EILOA A TE ‵TOU MAFUAGA?

4. E fakamatala mai pefea i mea ola ne faite a te ‵malu o Ieova?

⁴ A Ieova se Mafuaga fakaofoofogia. A mea katoa e faite ne ia ko toe mea ‵lei eiloa. (Kene. 1:31; Iele. 10:12) Se a te mea e mafai o tauloto ne tatou mai te gali mo te fakatoka faka‵lei o mea ne faite ne te Atua? Kafai e suke‵suke faka‵lei tatou ki mea ola ne faite, e ofo tatou i te auala e aoga ei a galuega fakaofoofogia a Ieova, mai mea fo‵liki ke oko loa ki mea ‵lasi. Ko oi te tino e se ofo i te uke mo te fakaofoofogia o sela o te foitino, te fakaofoofogia o te pepe fatoa fanau, io me ko te gali o te tōga o te mata o te lā? Ko oko eiloa i te ‵gali o mea konei ki a tatou me ne faite eiloa tatou mo te atamai i loto i a tatou ke iloa ne tatou a tinā mea ‵gali.—Faitau te Salamo 19:1; 104:24.

5. E fakamautinoa pefea ne Ieova i mea ola katoa ne faite e ga‵lue fakatasi?

⁵ E pelā mo te mea e lavea ‵lei atu i mea ne faite, ne tuku mai eiloa ne Ieova mo te alofa a tapulā ki a tatou. Ne faite ne ia a tulafono o te natula mo tulafono i mea tau amioga, ke fakamautinoa aka me i mea katoa e ga‵lue fakatasi. (Sala. 19:7-9) Tela la, a mea katoa ne faite i te iunivesi ko oti loa ne fakatulaga faka‵lei kae ga‵lue e ‵tusa mo olotou tusaga i fuafuaga a te Atua. Ko oti eiloa ne fakatulaga ne Ieova a te auala e ‵tau ei o ga‵lue fakatasi a ana mea ne faite. E pelā mo te tulafono o te kalaveti, e taofi ne ia te vanimonimo ke pili ki te lalolagi, e fakagalue ne ia te gasuesuega o te tai mo te moana, kae fesoasoani foki ke mafai o ola a mea i te lalolagi nei. A mea ola katoa konei ne faite e aofia ei a tino, e ga‵sue kae ga‵lue e ‵tusa mo tapulā konei. E manino ‵lei eiloa, i te auala ne fakatoka ei a mea ne faite e fakamaoni i ei me isi se fuafuaga a te Atua ki te lalolagi mo tino. I te ‵tou galuega talai, e mata e mafai o fesoasoani atu tatou ki tino ke iloa ne latou te Mafuaga o mea fakaofoofogia konei?—Fa. 4:11.

6, 7. Ne a nisi meaalofa ne tuku atu ne Ieova ki a Atamu mo Eva?

⁶ Ko te fuafuaga muamua eiloa a Ieova ko tino ke ola ki te se-gata-mai i te lalolagi nei. (Kene. 1:28; Sala. 37:29) Ne tuku atu ne ia mo te kaimalie ki a Atamu mo Eva a meaalofa ‵gali kese‵kese ke mafai ne laua o fia‵fia i te olaga. (Faitau te Iakopo 1:17.) Ne tuku atu ne Ieova ki a laua te saolotoga ke fai a filifiliga, te atamai ke fakasako‵sako atu, kae ke mafai foki ne laua o a‵lofa kae ke fia‵fia. Ne faipati kae fakatonu atu a te Mafuaga ki a Atamu e uiga ki te auala e mafai o fakalogo atu tou tagata ki a Ia. Ne tauloto foki a Atamu ki te auala e tausi ei ki ana manakoga kae ke tausi atu foki ki manu mo te laukele. (Kene. 2:15-17, 19, 20) Ne faite ne Ieova a Atamu mo Eva ke mafai ne laua o ‵tami, pa‵tele, ‵kilo, lagona kae ‵sogi. Telā ko mafai ei ne laua o fia‵fia i te gali mo te lasi o te lā Palataiso. E pelā mo te tauavaga muamua, ne mafai eiloa o lotoma‵lie ki lā galuega, fakataunu a mea e ma‵nako ki ei, kae tauloto ki mea ‵fou ki te se gata-mai.

⁷ Ne a foki a nisi mea ne aofia i fuafuaga a te Atua? Ne faite ne Ieova a Atamu mo Eva mo te atamai ke mafai o maua ne la tama‵liki ‵lei katoatoa. Ne manako te Atua ko la tamaliki ke fai foki a olotou tama, ke oko loa ki te taimi ko ‵fonu ei te lalolagi i te kāiga o tino. Ne manako a Ieova ko Atamu mo Eva mo mātua katoa mai tua o laua, ke a‵lofa ki olotou tama‵liki e pelā loa mo tena alofa ki ana tama ‵lei katoatoa faka-te-foitino. A te lalolagi mo mea e maua i ei, ne ‵tau o fai mo fai te olotou fale tumau.—Sala. 115:16.

SE A TE FAKALAVELAVE NE TUPU?

8. Se a te pogai ne fai ei te tulafono telā e maua i te Kenese 2:16, 17?

⁸ Ne seki ga‵lue a mea e tusa mo te fuafuaga a te Atua i te taimi eiloa tenā. Kaia? Ne tuku atu ne Ieova ki a Atamu mo Eva se tulafono faigofie ke tofotofo i ei me masaua ne laua te tapulā ki te la saolotoga io me ikai. Ne fai atu a ia: “E mafai ne koe o kai ki fuaga o so se lakau i loto i te fatoaga, kae tapu koe e kai ki fuaga o te lakau tela e fai ne ia te tino ke iloa te lei mo te masei. E se tau eiloa mo koe o kai ki fuaga o te lakau tena, me kafai e kai koe ki ei, a koe e mate eiloa i te taimi tena.” (Kene. 2:16, 17) E se faigata ki a Atamu mo Eva ke malamalama i te tulafono tenei; io me faigata ke faka‵logo ki ei. E uke ‵ki eiloa a mea‵kai e mafai o kai ne laua.

9, 10. (a) Se a te ‵losiga ‵se ne fai ne Satani e uiga ki a Ieova? (e) Se te mea ne fakaiku aka ne Atamu mo Eva? (Ke onoono ki te ata i te kamataga.)

⁹ Ne fakaaoga ne Satani te Tiapolo se gata ke fakaloiloi ki ei a Eva ke se fakalogo ki tena Tamana, ko Ieova. (Faitau te Kenese 3:1-5; Fa. 12:9) Ne fakasae aka ne Satani a te manatu me sē talia a tamaliki faka-te-foitino a te Atua o ‵kai ki “fuaga o so se lakau i te fatoaga.” E pelā eiloa me ko fai atu a ia: ‘Ko tena uiga e se mafai ne koulua o fai a mea e ma‵nako koulua ki ei?’ Tenā, ne fai atu ei ne ia se loi matagā: “A koulua e se ‵mate.” Ne taumafai foki a ia o fai ke se fakalogo a Eva ki te Atua mai te fai atu: ‘E iloa ne te Atua, me i te aso eiloa telā e ‵kai ei koulua ki ei, ka ‵pula oulua mata.’ Ne fakauiga eiloa ne Satani ana pati i a Ieova e se manako ke ‵kai laua ki te fuaga o te lakau, me i te faiga tenā ka fai ei ke malamalama laua. Ne toe fai atu foki ne Satani te tautoga se tonu tenei: “Koulua ka pau mo te Atua, ka iloa foki ei ne koulua te mea lei mo te mea masei.”

¹⁰ Nei la, ko ‵tau o fai ne Atamu mo Eva se filifiliga. Ka faka‵logo laua ki a Ieova, io me faka‵logo laua ki te gata? Ne filifili laua ke se faka‵logo ki te Atua. Mai te faiga tenā, ne ‵kau atu ei laua ki te tekeatuga a Satani. Ne ‵teke ne laua a Ieova e pelā me ko te la Tamana, kae ne ‵vae kea‵tea ei ne laua a laua eiloa mai te puipuiga saogalemū a Ieova.—Kene. 3:6-13.

11. Kaia ne saga malosi atu a Ieova ki te tekeatuga i te fatoaga?

¹¹ Mai te ‵teke atu ki a Ieova, ne galo atu i ei a te tulaga ‵lei katoatoa o Atamu mo Eva. E se gata i ei, ne iku atu foki a te tekeatuga o laua ki te ‵vae kea‵tea mai i a Ieova ona ko ana “mata ko tō ‵ma ke kilo ki se mea matagā.” Tela la, “e se mafai o talia ne [Ia] se amioga masei.” (Sapa. 1:13, NW) Moi fai ne talia ne Ia, penei a te ola ‵lei o mea ola katoa—i te lagi mo te lalolagi—ko tu i se tulaga fakamataku. Kae sili i mea katoa, moi seai se mea a te Atua e fai ki te agasala ne fai i Etena, ne mafai eiloa o fakafesiligina a tena fakatuagagina. Kae ko Ieova e fakamaoni ki ana tulaga amiotonu; e se mafai o fakaseaoga ne ia. (Sala. 119:142) Tela la, e tiga eiloa ne maua ne Atamu mo Eva a te saolotoga ke fai a la filifiliga, e se ko tena uiga me ne fakaseaoga i ei a tulafono a te Atua. E pelā me se ikuga o te tekeatuga ki a Ieova, ne ‵mate laua kae ne toe ‵foki ki te pefu telā ne faite mai ei laua.—Kene. 3:19.

12. Se a te mea ne tupu ki tamaliki a Atamu?

¹² I te taimi ne kai ei ne Atamu mo Eva a te fuaga o te lakau, ne tuku atu ei ne laua a laua eiloa ki se tulaga telā ko se toe talia ke fai mo fai ne tino o te kāiga a te Atua. Ne ‵tuli kea‵tea ne te Atua a laua mai i Etena, kae ne seki toe maua se fakamoemoega ke foki atu ki ei. (Kene. 3:23, 24) I te faiga tenā, ne fai eiloa ne Ieova ke fakafesagai atu laua ki ikuga ‵tau o te la filifiliga. (Faitau te Teutelonome 32:4, 5.) Ne galo atu a te tulaga ‵lei katoatoa, kae ne seki toe mafai ne te tagata o fakaata atu mo te ‵lei katoatoa a uiga o te Atua. E se gata fua i te galo atu i a Atamu a tena fakamoemoega gali mō aso mai mua, ne tuku atu foki ne ia ki ana tamaliki a te tulaga sē ‵lei katoatoa, te agasala, mo te mate. (Loma 5:12) Ne tapale kea‵tea ne ia mai i ana tamaliki a te fakamoemoega ki te ola se-gata-mai. Ne seki mafai foki ne Atamu mo Eva o maua se tamaliki ‵lei katoatoa; ne seki mafai foki ne se tamaliki a laua o fanau mai se tamaliki ‵lei katoatoa. Mai tua o te faiga ke fulitua a Atamu mo Eva ki te Atua, ne tumau eiloa a Satani te Tiapolo i te takitaki ‵se o tino ke oko mai loa ki aso nei.—Ioa. 8:44.

NE FAKA‵LEI NE TE TOGIIOLA A TE FAKALAVELAVE

13. Se a te mea ne manako a Ieova ke maua ne tino katoa?

¹³ A te alofa o Ieova ki tino, e tumau eiloa. Faitalia te tekeatuga a Atamu mo Eva, e manako eiloa a Ieova ke fia‵fia tatou ki te fesokotakiga ‵lei e maua ne tatou mo ia. E se manako a ia ke mate se tino. (2 Pe. 3:9) Tela la, mai tua o te tekeatuga, ne fai ne te Atua se fakatokaga ke mafai ne tino o maua se va fakataugasoa mo Ia, kae tumau foki eiloa a ia i ana tulaga amio‵tonu. Ne fakataunu pefea ne Ieova te mea tenei?

14. (a) I te Ioane 3:16, se a te fakatokaga ne fai ne te Atua ke mafai ne tino o toe maua te ola? (e) Se a te fesili ke mafau‵fau tatou ki ei mo tino fia‵fia?

¹⁴ Faitau te Ioane 3:16. A te tokoukega kolā e ‵kami ne tatou ki te Fakamanatuga e iloa ‵lei ne latou te fuaipu tenei. Kae ko te fesili la, E mafai pefea ne te taulaga a Iesu o aumai te ola se-gata-mai? Te galuega fakapito mō te Fakamanatuga, te Fakamanatuga eiloa, mo te asi atu ki tino kolā ne ‵kau mai, ka tuku mai i ei ki a tatou se avanoaga ke fesoasoani atu ki tino kolā e fia‵fia tonu o ‵sala ke malamalama i te ‵tali ki te ‵toe fesili tāua tenā. E mafai o ofo a vaegā tino penā māfai ko kamata o maina malosi latou i te auala e fakaasi mai ei ne te togiola a te alofa mo te poto o Ieova. Ne a manatu tāua mai i te togiola e mafai o faka‵mafa ne tatou?

15. Ne ‵kese pefea a te tagata ko Iesu mai i te tagata ko Atamu?

¹⁵ Ne tuku mai ne Ieova se tagata ‵lei katoatoa ke fai mo togiola. E ‵tau mo te tagata ‵lei katoatoa tenā o alofa fakamaoni ki a Ieova kae loto fiafia o tuku atu tena ola ke sui i ei a ola o tino kolā ko seai se olotou fakamoemoega. (Loma 5:17-19) Ne tuku ifo ne Ieova a te ola o tena mea muamua ne faite ki te lalolagi. (Ioa. 1:14) Ne fai a Iesu e pelā me se tagata ‵lei katoatoa, e pelā eiloa mo Atamu. Kae ne ‵kese mai i a Atamu, me ne ola a Iesu e tusa mo tulaga kolā ne fakamoemoe a Ieova me ‵tau o maua ne se tagata ‵lei katoatoa. Mai lalo foki loa i tofotofoga faiga‵ta, ne seki agasala io me ne ofa ne Iesu se tulafono a te Atua.

16. Kaia e fai ei te togiola e pelā me se meaalofa tāua?

¹⁶ E pelā me se tagata ‵lei katoatoa, ne fakasao ne Iesu a tino mai i te agasala mo te mate, ke mate mō latou. Ne fai eiloa ne ia a mea katoa kolā ne ‵tau o fai ne Atamu—se tagata ‵lei katoatoa, fakamaoni katoatoa kae fakalogo ki te Atua. (1 Timo. 2:6) Ne fai a Iesu mo taulaga togiola telā ne ‵tala mai ei te auala ki te ola se-gata-mai “mō tino e tokouke”—tāgata, fāfine, mo tama‵liki. (Mata. 20:28) E tonu, ne fai eiloa te togiola e pelā me ko te kī ke ‵tala aka ei te mataloa ke fakataunu te fuafuaga a te Atua. (2 Koli. 1:19, 20) Ne tuku mai ne te togiola a te fakamoemoega ki tino katoa ki te ola se-gata-mai.

NE ‵TALA MAI NE IEOVA TE MATALOA MŌ TATOU KE ‵FOKI ATU

17. Ne mea ka fai ne te togiola?

¹⁷ Ne ‵togi eiloa ne Ieova a te togiola ki se ‵togi e lasi ‵ki. (1 Pe. 1:19) Ona ko te fakatāua malosi ne ia a tino, ne loto fiafia ei a ia o tuku mai a tena Tama fagasele e tokotasi ke mate mō tatou. (1 Ioa. 4:9, 10) Ko tena uiga, ne sui ne Iesu a te tulaga o te ‵tou tamana faka-te-foitino muamua, ko Atamu. (1 Koli. 15:45) I te faiga tenā, ne fakafoki mai ne Iesu se mea telā e tāua atu i te ola; ne tuku mai ne ia te avanoaga ke toe ‵foki fakamuli atu tatou ki te kāiga o te Atua. E tonu, mai te fakavae o te taulaga a Iesu, ko mafai ei ne Ieova o toe talia mai a tino ki tena kāiga e aunoa mo te fakamasei o tena tulaga amiotonu. E mata, e se fakamafanafana loto ke mafaufau ki se taimi telā ka faka‵foki ei a tino fakamaoni katoa ki se tulaga ‵lei katoatoa? Ka mafai foki ei o katoatoa te ‵kaufakatasi o te vaega o tena kāiga i te lagi mo te lalolagi. Ko tena uiga, ka fai a tatou katoa mo tamaliki a te Atua.—Loma 8:21.

18. Ko te taimi fea ka pule katoatoa atu a Ieova “ki ana mea katoa”?

¹⁸ Ne seki taofi ne te tekeatuga a Satani a Ieova mai te fakaasiatuga o Tena alofa ki tino, ne seki mafai foki ne ia o taofi a tino mai te fakamaoni ki a Ieova. E auala i tena fakatokaga ki te togiola, ka fesoasoani atu a Ieova ki ana tamaliki katoa ke fai pelā me ne tino amiotonu katoatoa. Fakaataata i tou mafaufau a te vaegā olaga ka maua ne tino katoa “kolā e lavea ne latou te Tama kae fakatuanaki ki a ia” ka ola ki te se-gata-mai. (Ioa. 6:40) Mai te lasi o tena alofa mo tena poto, ka aumai ne Ieova a tena kaukāiga o tino ki se tulaga ‵lei katoatoa, e pelā loa mo tena fuafuaga i te kamataga. A Ieova te ‵tou Tamana, ka pule katoatoa atu “ki ana mea katoa.”—1 Koli. 15:28.

19. (a) Se a te mea ka fakamalosi aka ke fai ne tatou ona ko te ‵tou loto fakafetai ki te togiola? (Ke onoono ki te pokisi “Ke na ‵Sala Atu Tatou ki Tino Loto ‵Lei.”) (e) Se a te mea ka sukesuke tatou ki ei i te suā mataupu?

¹⁹ A te ‵tou loto fakafetai ki te togiola, ka fakamalosi aka ei tatou ke fai te mea e mafai o fai ke lavea ne nisi tino me mafai foki o aoga ki a latou a te ‵toe meaalofa tāua tenā. E manakogina ke iloa ne tino i te togiola ko te auala telā ne tuku mai ei ne Ieova mo te alofa ki tino, a te fakamoemoega ke ola ki te se-gata-mai. Kae koi uke atu foki a nisi mea ne fakataunu ne te togiola. I te suā mataupu ka suke‵suke tatou ki te auala ne fakatoka ei ne te taulaga a Iesu a te kinauga telā ne fakasae aka ne Satani i te fatoaga o Etena.