Ne Iloa ne Koe?

Ne mafai pefea ne te soko ko Setefano o tumau i te nofo filemu i te taimi ne fakasauagina ei a ia?

Ko Setefano e tumau i te filemu i te taimi ne fakafesagai atu a ia ki te kau Sanetulini

NE FAKAFESAGAI atu eiloa a Setefano ki se potukau o tāgata ‵teke. E pelā me ne sui o te fono maluga i Isalaelu ko te Sanetulini, ne aofia a famasino e toko 71 i toe tāgata ma‵losi i te fenua. Ne fakamaopoopo latou ne te Faitaulaga Sili ko Kaiafa, telā ne takitaki ne ia te fono i se fia o masina mai mua o fakasala a Iesu ki te mate. (Mata. 26:57, 59; Galu. 6:8-12) I te taimi ne aumai ei ne latou a molimau ‵pelo, ne lavea ne latou se mea ‵kese e uiga ki a Setefano—ana mata “e pelā eiloa mo mata o se agelu.”—Galu. 6:13-15.

Ne mafai pefea ne Setefano o tumau i te filemu kae sē logoa i se vaegā tulaga fakamataku penā? A koi tuai o avatu a ia ki loto i te Sanetulini, ko leva eiloa ne aofia katoatoa a Setefano i tena galuega talai mai lalo i te takitakiga malosi a te agaga o te Atua. (Galu. 6:3-7) I te taimi ne tu atu a ia i mua o te fono, ne galue eiloa a te agaga tenā i loto i a ia, e pelā me se fesoasoani mo se faiakoga. (Ioa. 14:16) I te taimi ne fai atu ei ne Setefano mo te loto toa ana manatu kolā ne fakamau i te Galuega mataupu e 7, ne fai ne te agaga tapu ke masaua ne ia a fuaiupu kāti e 20 io me uke atu mai te Tusitusiga Tapu i te ‵gana Epelu. (Ioa. 14:26) Kae ne toe fakamalosi aka te fakatuanaki o Setefano i te taimi ne maua i ei ne ia se fakaasiga e uiga ki a Iesu e tu i te feitu fakaatamai o te Atua.—Galu. 7:54-56, 59, 60.

E mafai foki o fe‵paki tatou i se taimi e tasi mo fakamatakutakuga mo fakasauaga. (Ioa. 15:20) Mai te ‵kai i aso katoa ki te Muna a te Atua kae ga‵lue malosi i te galuega talai, ko talia i ei ne tatou a te agaga o Ieova ke galue i loto i a tatou. Ka maua foki ne tatou a te malosi ke fakafesagai atu ki ‵tekemaiga i te taimi e fakatumau i ei ne tatou a te filemu i loto.—1 Pe. 4:12-14.