AUALA KE MANUMALO I LAGONAGA TAKALIALIA

3 | Tapale Keatea te Takalialia Mai Tou Mafaufau

Akoakoga i te Tusi Tapu:

“Ke ‵fuli otou mafaufau, ko te mea ke fakatalitonu aka ne koutou me se a te loto o te Atua telā e gali, e logomalie, kae e ‵lei katoatoa.”—LOMA 12:2.

Tena Uiga:

E tāua eiloa ki te Atua a mea e mafau‵fau tatou ki ei. (Ielemia 17:10) Kae i tafa o te ‵kalo keatea mai te faipati io me ko te faiga o mea kolā e fakaasi atu ei a lagonaga takalialia, e uke foki a nisi mea e ‵tau o fai. A te lagonaga takalialia e kamata mai i te mafaufau mo te loto. Tela la, e ‵tau o tapale fakavave keatea ne tatou so se tamā lagonaga takalialia e sae aka i ‵tou mafaufau mo ‵tou loto. Tenā fua te auala e mafai ei o “‵fuli” tatou kae manumalo i lagonaga takalialia.

Mea e Mafai o Fai ne Koe:

Ke iloilo ne koe ou mafaufauga mo lagonaga e uiga ki nisi tino—maise ko tino mai nisi itukāiga mo fenua. Fesili ifo: ‘Se a taku kilokiloga ki a latou? E mata, e fakavae taku kilokiloga ki mea e iloa ne au e uiga ki a latou? Io me ki te fakailoga tino?’ Sa onoono ki mea i te neti, vitio, io me ko fakafiafiaga kolā e fakamalosi aka ei a lagonaga takalialia mo amioga fakasaua.

E mafai eiloa o fesoasoani mai te Muna a te Atua ki a tatou ke manumalo i lagonaga takalialia i ‵tou loto mo ‵tou mafaufau

E sē se mea faigofie ke fakatonutonu faka‵lei a ‵tou mafaufauga mo lagonaga. Kae e mafai o fesoasoani mai te Muna a te Atua ke “iloa [ne tatou] a mafaufauga mo manakoga o te loto.” (Epelu 4:12) Tela la, ke sukesuke faeloa ki te Tusi Tapu. Ke faka‵pau ne koe a akoakoga i ei mo ou mafaufauga, kae taumafai malosi ke mafaufau koe e ‵tusa mo mea e akoako mai i te Tusi Tapu. E mafai eiloa o fesoasoani mai te Muna a te Atua ki a tatou ke manumalo i “mea kolā ko leva ne ‵mau olotou aka” i ‵tou mafaufau mo ‵tou loto.—2 Kolinito 10:4, 5.

Tala Tonu—STEPHEN

Ne ‵Fuli Ana Vaegā Mafaufauga

Ne pokotia a Stephen mo tena kāiga i te takalia‵lia o tino ‵kena ki a latou. Ona ko te mea tenā ne fakamalosi aka a ia ne se potukau fakapolitiki telā ne lauiloa i te ‵teke atu ki kinauga e uiga ki saolotoga. Fakamuli ifo, ne kamata o aofia a ia i amioga solitulafono ona ko ana lagonaga takalialia. Ne fai mai a Stephen: “E pelā mo te taimi e tasi, ne onoono matou mo oku taugasoa i se ata i koga tamunei telā ne fakaasi mai i ei a logo‵maega o pologa Afelika i Amelika i aso mua. Ona ko vaegā faifaiga sē fakamaoni konā, ne fakasaua ne matou a talavou ‵kena i te koga eiloa tenā. Tenā ne olo ei matou ki tuakoi o tino ‵kena, o ‵sala atu ki tino e tokouke atu ke ta ne matou.”

Ne fai ne Stephen se ‵fuliga lasi ki tena kilokiloga i te taimi ne kamata ei o sukesuke a ia ki te Tusi Tapu mo Molimau a Ieova. Ne fai mai a ia: “Ona ko te mea ne tuku faka‵sau atu au ki uiga fakailoga tino, ne ofo au i mea ne lavea ne au i te kau Molimau. E pelā mo te taimi ne fanatu ei se Molimau ‵kena ki se isi fenua, kae ne tuku ne ia ana tama‵liki ke tausi ne se kāiga uli. Ne puke mai foki ne se kāiga ‵kena ki te lotou fale se talavou uli telā ne ‵sala ki se koga mo ana nofo.” Ne talitonu a Stephen me i Molimau a Ieova ko te kautaina a‵lofa telā ne ‵valo mai a Iesu me ka lavea atu fua i Kelisiano ‵tonu.—Ioane 13:35.

Ne mafai pefea o tiaki ne Stephen ana lagonaga takalialia? Ne fesoasoani atu ki a ia te Loma 12:2. Ana muna: “Ne kamata o iloa ne au me e ‵tau o ‵fuli oku mafaufauga. Ne ‵tau o ‵fuli toku mafaufau ko te mea ke se fakaasi atu fua ne au a uiga filemu kae ke iloa foki ne au me tenei eiloa te ‵toe auala ‵lei.” Ko 40 tupu nei tausaga ne ola fiafia ei a Stephen e aunoa mo lagonaga takalialia.