Te Munatonu e Uiga ki Aso Mai Mua
E mata, kai mafaufau aka eiloa koe me ne a mea ka ‵tupu i aso mai mua? E fakaasi mai i te Tusi Tapu me i mea kolā ka ‵tupu i aso mai mua, ka pokotia i ei a tino katoa i te lalolagi.
Ne fakamatala mai ne Iesu te auala ka iloa i ei ne tatou “me ko pili mai te Malo o te Atua.” (Luka 21:31) Ne ‵valo mai a ia, me mai tafa o nisi mea, ka uke a taua, mafuie fakama‵taku, ogega mea‵kai, mo ma‵saki—ko mea loa kolā ko molimau nei ne tatou i aso nei.—Luka 21:10-17.
E fakaasi mai foki i te Tusi Tapu me i “aso fakaoti” o pulega a tāgata ka lavea faka‵lei atu e auala i amioga ma‵sei a tino. E mafai o faitau koe ki ei i te 2 Timoteo 3:1-5. Kafai ko lavea nei ne koe a amioga mo faifaiga konā i aso nei, e seai se fakalotolotolua me ka talitonu loa koe ki te valoaga tenei i te Tusi Tapu, ko mea foki loa kolā e ‵tupu i aso nei.
Se a te mea e fakauiga ki ei? Ko pili te taimi ka fai ei ne te Malo o te Atua a fakama‵fuliga ‵lasi kolā ka faka‵lei ei a tulaga o te olaga i te lalolagi kātoa. (Luka 21:36) I te Tusi Tapu, e folafola mai ne te Atua a mea ‵gali mō te lalolagi mo ana tino kolā ka ola i luga i ei. Konei a nāi fakaakoakoga.
SE PULEGA ‵LEI
“Kae ne tuku atu ki a ia [Iesu] a te pulega, te fakaaloalo mo te malo, kae e ‵tau mo tino, atufenua mo ‵gana katoa o tavini atu ki a ia. A tena pulega se pulega ki te se-gata-mai telā ka se mafai o galo atu, kae ko tena malo ka se fakaseai atu.”—TANIELU 7:14.
Tena uiga: Ka fiafia koe ke ola mai lalo i se malo e maluga kae pule ki te lalolagi kātoa telā ne fakatu aka ne te Atua mo tena Tama e pelā me ko te Tupu i ei.
OLA ‵LEI
“Kae ka seai se tino e fai aka: ‛Au ko masaki.’”—ISAIA 33:24.
Tena uiga: Ka se toe masaki io me sē katoatoa koe i te feitu faka-te-foitino; ka ola kae ka sē toe mate eiloa koe.
FILEMU KATOATOA
“E aumai ne ia te gataga ki taua i te lalolagi kātoa.”—SALAMO 46:9.
Tena uiga: Ka seai ne taua fakama‵taku mo logo‵maega katoa.
KA ‵FONU TE LALOLAGI I TINO AMIO ‵LEI
“Ka ‵galo atu a tino amio ma‵sei . . . Ko tino agamalu ka fai mō latou te lalolagi.”—SALAMO 37:10, 11.
Tena uiga: Ka seai ne tino amio ma‵sei, kae ko tino fua kolā e ma‵nako o faka‵logo ki te Atua.
KA FAI TE LALOLAGI KĀTOA MO FAI SE PALATAISO
“Ka faite ne latou olotou fale kae ‵nofo i ei, kae ka ‵toki ne latou a togavine kae ‵kai ki olotou fuataga.”—ISAIA 65:21, 22.
Tena uiga: Ka foliga gali te lalolagi kātoa. Ka fakataunu ne te Atua a te ‵tou ‵talo me ka fai tena loto “i te lalolagi nei.”—Mataio 6:10.