E Mata, ko ‵Tau Nei Au o Talai?
1. Kaia e se ‵tau ei mo tatou o mafau‵fau me se lava te ‵tou iloa ke talai atu?
1 Kafai e seki ‵sili aka eiloa ne koe se vaegā fesili penā, ke sa manavase ki ei! E se ko akoakoga io me ko atamai fakapito e fai ei ke mafai o fai tatou e pelā me ne faifeau. Ne taku a nisi soko muamua e pelā me ne tino e ‘seki a‵koga kae ma‵lalo.’ E tiga eiloa te feitu tenā, ne fai latou mo fai ne tino talai ma‵goi o te tala ‵lei, me ne tau‵tali latou ki te fakaakoakoga ne tuku mai ne Iesu.—Galu. 4:13; 1 Pe. 2:21.
2. Ne a nisi auala kese‵kese kolā ne fakaaoga ne Iesu i ana akoakoga?
2 Te Auala ne Akoako Atu ei a Iesu: Ne faigofie, aoga, kae malamalama vave a tino i ana akoakoga. Ne fai ne ana fesili, tala fakatusa mo fakatomuaga faigofie ke ‵saga tonu atu a tino fakalogo‵logo. (Mata. 6: 26) Ne fakaasi atu ne ia a te fiafia tonu ki tino. (Mata. 14:14) E se gata i ei, ne faipati atu eiloa a Iesu i te loto talitonu mo te pule, mai i te iloa atu me ne uga mai eiloa a ia ne Ieova ke fai a te galuega tenei.—Luka 4:18.
3. E fesoasoani mai pefea a Ieova ke fakataunu ne tatou te faiga o te galuega talai?
3 E Fesoasoani Mai a Ieova ki a Tatou: E auala i tena Muna mo tena fakapotopotoga, e tuku mai ne te ‵tou Faiakoga Sili a te fakaakoakoga telā e manakogina ne tatou ke mafai o talai atu faka‵lei a te tala ‵lei. (Isa. 54:13) Ona ko te mea ne tausi faka‵lei ne Ieova se fakamaoniga ki te auala ne talai atu ei a Iesu, ko mafai ne tatou o fakaaoga kae fakaakoako atu ki auala kolā ne fakaaoga ne ia. E tuku mai ne Ieova a tena agaga tapu kae akoako ne ia tatou e auala i fakatasiga a te fakapotopotoga. (Ioane 14:26) E se gata i ei, e tuku mai ne ia a tino talai apo kolā e mafai o fesoasoani mai ke fai tatou e pelā me ne tino talai ma‵goi.
4. Kaia e isi ei se loto talitonu me e toka tatou o talai atu te tala ‵lei ki nisi tino?
4 E isi eiloa ne pogai e fai ei ke toka tatou o talai, me i te “mafai o fai te galuega, e mai te Atua.” (2 Koli. 3:5) Kafai e fakalagolago tatou ki a Ieova kae fakaaoga faka‵lei mo te fakamaoni a ana fakatokaga alofa, ka maua ei ne tatou a ‘fakamaoniga, ke lava te uta e fai ei tatou so se galuega lei.’—2 Timo. 3:17.