Ke Toka Katoatoa e Pelā me ne Faiakoga o te Muna a te Atua
“Te Atua; . . . ne fai ne ia tatou ke mafai o tavini.”—2 KOLINITO 3:5, 6.
KA PEFEA ou lagonaga māfai ko ofo atu ki a koe se galuega telā e iloa ne koe me se mafai ne koe o fai? Ke mafaufau: Ko toka mai i ou mua a mea katoa kolā e manakogina, fakatasi mo mea faigaluega. Kae e seai eiloa sau mea e tasi e iloa i te faiga o te galuega. Kae sili atu i te masei, a te galuega tenā se mea e ‵tau o fai fakavave. Ko fakalago‵lago a tino ki a koe. Ko tafaga la te fakafanoanoa o te mea tenā!
2 A te vaegā fakalavelave tenā e mafai fua o tupu i so se taimi. Ke mafaufau ki se fakaakoakoga. Fakamuli nei, ne taumafai a Lotu Kelisiano ‵Se o talai atu mai fale ki fale. Ne seki manuia eiloa a taumafaiga konei, kae ne fakagata atu te lotou galuega tenā i nāi vaiaso fua fakamuli. Kaia? Ne seki mafai ne Lotu Kelisiano ‵Se o fesoasoani atu ki olotou tino tapuaki ke mafai o fai ne latou a te galuega. Ke oko foki eiloa ki faifeau e se mafai o fai ne latou a te galuega talai, faitalia te fia o tausaga kolā ne a‵koga ei latou. Se a te pogai e fai atu ei penā?
3 E fakamatala mai ne te Muna a te Atua a mea kolā e manakogina ke mafai ne se tino o fai pelā me se tino talai tonu o te tala ‵lei e uiga ki te olaga faka-Kelisiano. Ne fakaosofia a te apositolo ko Paulo ke tusi mai, penei: “Me e seai se mea i a matou e fakatalitonu ei me mafai ne matou o fai te galuega tenei. Ka ko te motou mafai o fai te galuega, e mai te Atua; me ko ia ne fai ne ia tatou ke mafai o tavini.” (2 Kolinito 3:5, 6) Ke masaua a te tugāpati telā e sae fakatolu mai i konei ko te ‘mafai o fai.’ Se a te mea e fakauiga te tugāpati tenei ki ei? E fai mai a te Vine’s Expository Dictionary of Biblical Words, penei: “Kafai e fakasino atu [a te pati Epelu tonu] ki mea sē ola e fakauiga ki te ‘ko lava i ei’ . . . ; kae kafai e fakasino atu i ki tino, e fakauiga ki te ‘lava o te atamai,’ kae ‘e fetaui ‵lei.’ ” Tela la, kafai ko “mafai o fai” ne se tino se galuega ko lava tena atamai kae fetaui ‵lei foki te tino tenā ki ei. E tonu, e mafai ne tavini ‵tonu o te tala ‵lei o fai ne latou te galuega tenei. E lava te lotou atamai, io me e fetaui ‵lei latou ke talai atu.
4 Kae e maua la i fea a te atamai tenā ke fai ne koe a te galuega tenā? Mai taleni totino? Mai tou poto? Mai akoga ma‵luga kolā ne akoga koe i ei? E mautinoa eiloa me ne maua ne te apositolo ko Paulo a mea katoa konā. (Galuega 22:3; Filipi 3:4, 5) Kae ui i ei, ne fakaasi ‵tonu mai ne ia me i te mafai ne ia o fai pelā me se tavini, ne māfua mai i a Ieova kae se mai akoga ma‵luga kolā ne akoga a ia i ei. E mata, e maua ne nāi tino fua a te atamai tenā? Ne tusi atu a Paulo ki te fakapotopotoga i Kolinito e uiga ki “mea e mafai o fai ne tatou.” E fakapa‵tonu mai ne te manatu tenā me e manako eiloa a Ieova ke mafai ne ana tavini katoa o fai te galuega telā ne ‵tofi ke fai ne latou. E tuku atu pefea ne Ieova te atamai ki Kelisiano ‵tonu i aso nei? Ke sau‵tala aka tatou ki auala e tolu kolā e fakaaogā ne ia: (1) tena Muna, (2) tena agaga tapu, mo (3) tena fakapotopotoga i te lalolagi.
E Tuku Mai ne te Muna a te Atua te Atamai ki a Tatou
5 Muamua la, e fesoasoani mai pefea a te Muna a te Atua ke tuku mai te atamai ki a tatou ke fai pelā me ne ana tavini? Ne tusi mai a Paulo, penei: “Me i Tusitusiga Tapu katoa ne aumai mai te Atua, kae aoga ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei, ko te mea, ko te tino tela e tavini ki te Atua, ke maua ne ia te fakamaoniga, ke lava tena uta e fai ei ne ia so se galuega ‵lei.” (2 Timoteo 3:16, 17) Tela la, e fesoasoani mai a te Muna Fakaosofia ke lava ‘‵tou uta e fai ei ne tatou so se galuega ‵lei’ i te akoakoga o tino ki te Muna a te Atua. Kae e pefea la a tino tali‵tonu i Lotu Kelisiano ‵Se? E maua ne latou a te Tusi Tapu. E mafai pefea o fai ne se tusi e tasi ke fai se tino e pelā me se faifeau atamai kae e se fesoasoani atu penā ki nisi tino? E mafai o maua aka te tali ki te mea tenei mai ‵tou kilokiloga ki te Tusi Tapu.
6 Se mea fakafanoanoa, me i te tokoukega o tino kolā e olo atu ki lotu e se talia ne latou a te fekau i te Tusi Tapu e pelā me “ko te talaiga eiloa a te Atua.” (1 Tesalonia 2:13) Se mea fakamasiasi ki Lotu Kelisiano ‵Se a tala fakasolopito e uiga ki olotou faifaiga i te feitu tenei. E tiga eiloa ne a‵koga a takitaki lotu i akoga fakafaifeau i te fia o tausaga, e mata, e mafai ne latou o fai pelā me ne faiakoga o te Muna a te Atua? Ailoga. Se mea fakapoi me ko oti ne kamata ne nisi tino olotou akoakoga i akoga maluga e pelā me ne tino tali‵tonu ki te Tusi Tapu kae iku mai e pelā me ne tino sē tali‵tonu ki ei! Tela la, i lō te talai atu a te Muna a te Atua—telā ko se tali‵tonu ki ei a te tokoukega o latou—ko ‵fuli ei a mea kolā e ma‵nako latou ki ei, e pelā mo te ‵kau atu ki kinauga fakapolitiki, te fakasalalauatuga o te tala ‵lei o faifaiga faka-te-lalolagi, io me ko te fakatāua ne latou a poto o tāgata i olotou lauga. (2 Timoteo 4:3) E ‵kese mai ei, e tau‵tali atu a Kelisiano ‵tonu ki te fakaakoakoga a Iesu.
7 Ne seki talia ne Iesu a takitaki lotu i ona aso ke ‵fuli ne latou ana mafaufauga. Faitalia me ko te akoakoga o se tamā potukau, e pelā mo ana apositolo, io me ko te vaitino tokouke, ne fakaaogā faka‵lei eiloa ne Iesu a tusitusiga tapu. (Mataio 13:10-17; 15:1-11) Ne fai a te mea tenei ke faka‵kese aka ei a ia mai takitaki lotu i aso konā. Ne fakamalosi ne latou a tino ke se sukesuke ki mea ‵loto e uiga ki te Atua. A te ‵tonuga loa, e fai eiloa pelā me se tū a faiakoga i aso konā ke tali‵tonu me ko tō ‵loto katoa a akoakoga i te Tusi Tapu ke fakaasi atu ki nisi tino kae ko nāi tino fua kolā e fia‵fia latou ki ei—kae se gata i ei, e ‵tau o sau‵tala ki ei i se leo malalo kae pulou tena ulu. Ne ma‵taku a takitaki lotu ma sau‵tala ki nisi vaega o te Tusi Tapu e pelā eiloa mo te lotou ma‵taku ma taku atu te igoa o te Atua!
8 Ne seki fai eiloa penā a Keliso. Ne seki talitonu a ia me ko nāi tino fua e ‵tau o fakalogo‵logo ki “muna katoa kola e ‵to mai i te gutu o te Atua” kae ko tino katoa. Ne seki fiafia a Iesu ki te tukuatuga o te iloaga ki nāi tino poto fua kolā ne a‵koga. Ne fai atu a ia ki ana soko: “So se mea e taku atu ne au ki a koutou i te pouliga, e ‵tau mo koutou o toe taku atu i te mainaga, a mea foki ne lagona ne koutou i a koutou eiloa, e ‵tau o taku atu ki tino i luga o tuafale.” (Mataio 4:4; 10:27) Ne loto finafinau malosi eiloa a Iesu ke fakaoko atu a te iloaga e uiga ki te Atua ki so se tino telā e mafai o maua.
9 E ‵tau mo tatou o fakasino atu muamua ki te Muna a te Atua i ‵tou akoakoga. E pelā mo te faiga o se lauga i te Kingdom Hall a Molimau a Ieova, e se lava fua i te faitau ki tusi siki mai loto i te Tusi Tapu. E manakogina ke fakamatala, ke fai se fakaakoakoga, kae ke fakaasi foki te aogā o te tusi siki mo tena uiga. A te ‵tou fakamoemoega ko te pukemaiga ne tatou a te fekau tāua mai loto i te Tusi Tapu kae fai ke ‵goto ifo ki loto o tino fakalogo‵logo. (Neemia 8:8, 12) E ‵tau foki o fakaaogā a te Tusi Tapu māfai ko tuku atu a pati polopoloki io me māfai ko fakatonu atu a te mea ‵se. E ui eiloa e fai‵pati a tino o Ieova ki ‵gana kese‵kese kae aumai foki mai itukāiga kese‵kese, e āva katoa latou ki te ‵toe Tusi aogā—ko te Tusi Tapu.
10 E isi se malosi o te Tusi Tapu māfai ko fakaaogā te tusi tenā mo te āva. (Epelu 4:12) E fakamalosi aka i ei ke fai ne tino a fakamafuli‵fuliga i olotou olaga, e pelā mo te ‵kalo kea‵tea mai faifaiga kolā e se fetaui mo te Tusi Tapu e pelā mo te finalalolagi, mulilua, te ifo ki tupua, te konā, mo te kaisoa. Ko oti ne fesoasoani atu ki te tokoukega o tino ke tiakina olotou faifaiga mua kae ke ‵pei ki te foitino fou. (Efeso 4:20-24) E tonu, kafai e fakatāua ne tatou a te mea tenā i lō manatu o so se tino io me ko tu mo aganū kae fakagalue aka ei mo te fakamaoni, ka fesoasoani mai a te Tusi Tapu ke maua ne tatou te atamai kae ke mafai o fai tatou e pelā me ne faiakoga o te Muna a te Atua.
E Tuku Mai ne te Agaga o Ieova te Atamai ki a Tatou
11 A te lua o mea, ke onoono aka tatou ki te tulaga o te agaga tapu o Ieova, io me ko tena malosi galue, i te faiga ne ia ke toka ‵lei tatou. E se ‵tau o puli i a tatou me i te agaga o Ieova ko te ‵toe malosi sili eiloa. Ne fakamalosi aka ne Ieova tena Tama fagasele ke fakagalue aka ne ia a te ‵mana fakaofoofogina tenā ke fesoasoani atu ki Kelisiano ‵tonu. Ne fetaui ‵lei a pati a Iesu i te taimi ne fakasino atu ei a ia ki te agaga tapu e pelā me ko “te Fesoasoani.” (Ioane 16:7) Ne fakamalosi atu a ia ki ana soko ke akai atu ki a Ieova mō te agaga tenā, kae ke fakatalitonu atu foki ki a latou me ka tuku mai eiloa ne Ieova tena agaga mo te kaimalie.—Luka 11:10-13; Iakopo 1:17.
12 E manakogina ke ‵talo atu tatou ke maua te agaga tapu, maise eiloa ke fesoasoani mai ki te ‵tou galuega talai. Se a te aogā o te ‵mana tenā ki a tatou? E mafai o galue i ‵tou mafaufau mo ‵tou loto, e fesoasoani mai ei ke fai ne tatou a ‵fuliga, ke ola i te feitu faka-te-agaga, kae ke sui a te foitino mua ki te foitino fou. (Kolose 3:9, 10) Ka fesoasoani mai foki ke ati aka a uiga tāua e pelā mo Keliso. A te tokoukega o tatou ko mafai fua o taku atu a pati i te Kalatia 5:22, 23 e pelā me se mea tauloto. E fakasolo mai i fuaiupu konā a fuataga o te agaga o te Atua. A te mea muamua ko te alofa. E tāua ‵ki eiloa a te fuataga tenā ki te ‵tou galuega. Kaia?
13 E fakamalosi ne te alofa a tino ke gasue‵sue. E fakamalosi aka ne te alofa ki a Ieova pelā foki mo tino a Kelisiano ‵tonu ke folafola atu a te tala ‵lei ki nisi tino. (Maleko 12:28-31) Kafai e seai se vaegā alofa penā, e se mafai o fai tatou e pelā me ne faiakoga o te Muna a te Atua. Ke masaua a te ‵kese i te va o Iesu mo te kau Falesaio. E faipati a te Mataio 9:36 e uiga ki a Iesu: “I te laveatuga ne ia i te tokouke o tino, ne tupu ake ei tona loto alofa mō latou, me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi.” Ne a lagonaga o te kau Falesaio ki tino valevale? Ne fai mai latou: “A tino konei, e se iloa ne latou te Tulafono a Mose; tela la, ka malaia latou.” (Ioane 7:49) Ne seki a‵lofa a Falesaio konei ki tino kae ne lasi te manatu fatauvā ki a latou. E mautinoa eiloa me ne seki galue a te agaga o Ieova i a latou.
14 Ne malamalama a Iesu i lagonaga o tino. Ne iloa ne ia a te puapuagā telā ne maua ne latou. Ne iloa ne ia me ne sōnafai valevale fua latou kae ne fai pelā mo mamoe e seai se lotou tino tausi. E fai mai a te Ioane 2:25 me i a Iesu “e iloa ‵lei katoa ne ia loto o tino.” E pelā me se Tagata Poto i te Fakatutu a Ieova, ne ‵poko ‵ki a te iloaga o Iesu i te faitega o mea. (Faataoto 8:30, 31) Ne momea aka tena loto alofa ona ko te iloaga tenā. Ke fai faeloa a te alofa tenā mo fai se mea fakamalosi ki a tatou i te ‵tou galuega talai! Kafai e iloa ne tatou me e ‵tau o tai gasolo atu tatou ki mua i te feitu tenei, ke na ‵talo atu tatou ke maua ne tatou te agaga tapu o Ieova kae ke gasue‵sue tatou e ‵tusa mo ‵tou talo. Ka tali mai eiloa a Ieova. Ka uga mai eiloa ne ia tena malosi-galue telā e se mafai o vāivāi ke fesoasoani mai ko te mea ke fai tatou e pelā mo Keliso, telā ne toka kātoatoa o talai atu a te tala ‵lei.
15 Ne mafai pefea o fai ne Iesu a te galuega tenā? Ne fai mai a ia, “Ko i luga i a au te Agaga o te Aliki.” (Luka 4:17-21) E tonu, ne filifili aka eiloa ne Ieova a Iesu e auala i tena agaga tapu. Ne seki manakogina ne Iesu a nisi fakamaoniga. E mata, ne faitofigina a takitaki lotu i aso nei ne te agaga tapu? Ikai. Ne seki mafai foki ne latou o fakataunu a pati i te Isaia 61:1-3, telā ne faitau atu ne Iesu ki luga kae fakauiga ne ia ki a ia eiloa. Fakamolemole ke na faitau ki fuaiupu konā kae ka iloa ne koe i ei me ne seki fetaui ‵tonu eiloa a faiakoga loi mo Falesaio mo pati konā. E seai se tala ‵lei a latou ke folafola atu ki tino ma‵tiva. E mafai la pefea o talai atu ne latou a te fakasaolotoga o pagota mo te faka‵leiga o tino ‵kivi? Ne ‵kivi eiloa latou i te feitu faka-te-agaga kae ne ‵nofo pologa ki tū mo aganū a tāgata! E ‵kese mai tino konā, e mata, e lava ‵tou atamai ke akoako atu a tino?
16 E tonu, ne seki a‵koga tatou i a‵koga ma‵luga a Lotu Kelisiano ‵Se. E seai ne tofiga fakafaiakoga ne maua ne tatou mai akoga fakafaifeau. E mata, e se lava i ei te ‵tou atamai? E se penā loa! A te ‵tofiga o tatou e pelā me ne ana Molimau ne aumai i a Ieova. (Isaia 43:10-12) Kafai e ‵talo atu tatou mō tena agaga tapu kae galue e ‵tusa mo ‵tou talo, ko maua eiloa ne tatou a te ‵toe atamai maluga. E tonu, e se ‵lei kātoatoa tatou kae e se mafai ne tatou o tau‵tali katoatoa atu ki te fakaakoakoga a te Faiakoga Sili ko Iesu. E tiga eiloa te feitu tenā, e ‵tau o loto fakafetai tatou me e fakaaogā ne Ieova tena agaga tapu ke tuku mai te atamai ke toka ‵lei tatou ke fai pelā me ne faiakoga o tena Muna, i ne?
E Tuku Mai ne te Fakapotopotoga a Ieova te Atamai ki a Tatou
17 Nei la, ke onoono aka tatou ki te tolu o auala telā e fai ei ne Ieova ke toka ‵lei tatou ke fai pelā me ne faiakoga o tena Muna—ko tena fakapotopotoga i te lalolagi, telā e akoako ei tatou ke fai pelā me ne faifeau. E pefea la? Ke mafau‵fau aka ki te polokalame o akoakoga tenei e maua ne tatou! E ‵kau atu tatou ki fakatasiga e lima i te vaiaso e tasi. (Epelu 10: 24, 25) E ‵kau atu tatou i tamā potukau i te Sukesukega a te Fakapotopotoga ki Tusi ke akoakogina ei tatou ki mea e ‵loto atu e uiga ki te Tusi Tapu e auala i se tusi telā ne fakatokagina ne te fakapotopotoga a Ieova. E akoako kae fakatau fakamalosi foki tatou e auala i te fakalogo‵logo mo te faiga o ‵tou tusaga i ei. E maua foki ne tatou taki tokotasi a fakatonutonuga mai te taina telā e fai ne ia a te akoga. E uke atu foki ‵tou mea e maua i te feitu faka-te-agaga i te Lauga mō Tino Katoa e pelā foki mo te Sukesukega ki Te Faleleoleo Maluga.
18 Ne fakatokagina a te Akoga mō Tino Talai ko te mea ke maua ei ne tatou a fakatakitakiga ki te auala e akoako ei ne tatou a tino. Mai te fakatokaga o lauga i te akoga, e tau‵loto tatou ki te auala e fakaaogā ei te Muna a te Atua ke akoako atu a mataupu kese‵kese. (1 Petelu 3:15) E mata, ko oti ne ‵tofi aka koe ke fai se lauga ki se mataupu telā e masani ‵lei koe ki ei, kae maua aka i ei ne koe a mea ‵fou mai ei? E masani loa o tupu te mea tenā. E seai se isi mea aka e fakaopoopo atu ki ‵tou iloaga e uiga ki se mataupu e pelā mo te akoako atu ne tatou ki nisi tino. Faitalia me e seai se tofiga ne tuku mai ke fai ne tatou, e mafai eiloa ne tatou o fakaakoako ke fai pelā me ne faiakoga apo. E mafai ne tatou o iloa a uiga ‵lei mai lauga kolā e fai ne tino taki tokotasi, kae e mafai ne tatou o mafau‵fau ki te auala ke fakaakoako atu tatou ki ei.
19 Ne fakatokagina foki a te Fakatasiga mō te Taviniga ke mafai o fai tatou e pelā me ne faiakoga o te Muna a te Atua. E maua ne tatou a mea tāua mai lauga ‵gali, fakasau‵talaga, mo fakaasiga kolā e fakamalosi mai ki te ‵tou galuega talai i vaiaso katoa. Ne a fakamatalaga ka fakaaogā ne tatou? E mafai pefea o fakafesagai atu tatou ki fakalavelave kolā e fetaui mo tatou i te galuega talai? Ne a avanoaga o te galuega talai e ma‵tala mai ki a tatou telā e manakogina i ei ke ‵sala malosi atu ki ei? Ne a mea ka fesoasoani mai ke momea aka te ‵lei o tatou e pelā me ne faiakoga i te faiga o toe asiga mo akoga faka-te-Tusi Tapu? (1 Kolinito 9:19-22) A vaegā fesili penei e ‵sae aka katoa i te Fakatasiga mō te Taviniga kae sau‵tala foki ki ei. A te ukega o tofiga i te fakatasiga e fakavae katoa ki Te ‵Tou Taviniga ‵Malu mō te Malo telā se mea faigaluega ne fakatoka ke apo tatou i te faiga o ‵tou galuega tāua tenei.
20 Mai te faiga o fakatokaga pelā foki mo te ‵kau atu ki fakatasiga mo te fakagaluegāga o mea kolā ne tauloto ne tatou e pelā me ne faiakoga, ko maua ei ne tatou a akoakoga e uke atu. Kae koi isi aka foki a nisi akoakoga. E isi foki ne fakatasiga tai ‵lasi atu a tatou—tamā fono mo fono ‵lasi—kolā ne fakatokagina ke fai ei tatou e pelā me ne faiakoga atamai o te Muna a te Atua. E fakamoe‵moe katoa tatou ke fakalogo‵logo faka‵lei ki ei kae ke fakagalue aka a pati fakatonutonu i ei!—Luka 8:18.
21 E mata, ne ma‵goi a akoakoga kolā ne fakatoka ne Ieova? Ke na iloilo aka tatou ki fakamaoniga e uiga ki ei. Ko oti ne fesoasoani atu ki te fia selau afe o tino ke tauloto ki akoakoga fakavae mai te Tusi Tapu kae ke ola e ‵tusa mo mea kolā e manako ki ei te Atua ke fai ne latou. Ko gasolo aka nei ki luga te ‵tou fuainumela, kae e seai eiloa se tino i a tatou e fakamatamata ona ko te mea tenā. E ‵tau o ‵pau ‵tou ‵kilokiloga mo te kilokiloga a Iesu ki te mea tonu. Ne fai mai a ia: “E se mafai ne se tino o vau ki a au, seiloga ne mafua tona vau mai te Tamana tela ne uga mai ne ia au.” E pelā mo te kau apositolo i aso mua, e fai a te tokoukega o tatou e pelā me ne tino seki a‵koga. (Ioane 6:44; Galuega 4:13) E fakalago‵lago atu a te ‵tou manuia ki a Ieova, telā e takitaki mai ne ia a tino loto fakamaoni ki te munatonu. Ne fai faka‵lei mai a Paulo, penei: “Ne toki ne au te fuaga o te tala ‵lei, ka ko Apolo ne fakasiusiu ne ia te lakau, ka ko te Atua ne fakaola ne ia ke ola te lakau.”—1 Kolinito 3:6.
22 Ao, e gasuesue malosi a Ieova i te ‵tou galuega e pelā me ne faiakoga o tena Muna. E mafai o oko mai a te lagonaga me e se lava ‵tou atamai ke fai pelā me ne faiakoga. Kae masaua me ko Ieova telā e takitaki ne ia a tino ki a ia mo tena Tama. Ko Ieova eiloa e tuku mai ne ia te atamai ke molimau atu ki tino ‵fou e auala i tena Muna, tena agaga tapu mo tena fakapotopotoga i te lalolagi. Ke na ‵saga tonu atu tatou ki akoakoga a Ieova mai te fakagaluegaga o mea ‵lei konei ne fakatoka mai ne ia ko te mea ke toka ‵lei tatou o fai pelā me ne faiakoga o te Muna a te Atua!
Ka Tali Mai Pefea ne Koe?
• E fakatoka pefea tatou ne te Tusi Tapu mō te galuega talai?
• Se a te tusaga e fai ne te agaga tapu ke tuku mai te atamai ki a tatou ke fai pelā me ne faifeau?
• I auala fea ne fesoasoani atu ei a te fakapotopotoga a Ieova i te lalolagi ke toka ‵lei koe ke fai pelā me se tino talai o te tala ‵lei?
• Kaia e ‵tau ei o loto malosi tatou i te ‵kau atu ki te galuega talai?
[Fesili mo te Sukesukega]
1, 2. Ne a taumafaiga ko oti ne fai ke talai atu, kae kaia e se manuia ei?
3. Se a te tugāpati telā e sae fakatolu mai i te 2 Kolinito 3:5, 6, kae se a te mea e fakauiga ki ei?
4. (a) E fakaasi mai pefea ne te fakaakoakoga a Paulo me e se ko nāi tino fua e manakogina ke fai ne latou te galuega faka-Kelisiano? (e) Ne a auala e tolu e tuku mai ei ne Ieova te atamai ki a tatou ke fai pelā me ne faifeau?
5, 6. Se a te aogā o Tusitusiga Tapu ki Kelisiano ‵tonu?
7, 8. E ‵kese pefea a faifaiga a Iesu ki te Muna a te Atua mai takitaki lotu i ana aso?
9. E fakaaogā pefea ne Kelisiano ‵tonu a te Tusi Tapu?
10. Se a te aogā o te fekau fakaosofia a te Tusi Tapu ki a tatou?
11. Kaia e fetaui ‵lei ei ke fai a te agaga tapu o Ieova e pelā me se “fesoasoani”?
12, 13. (a) Kaia e tāua ei ke ‵talo atu tatou mō te agaga tapu ke fesoasoani mai ki te ‵tou galuega talai? (e) Ne fakaasi mai pefea ne te kau Falesaio me e se galue a te agaga tapu i a latou?
14. E fakamalosi mai pefea ki a tatou a te fakaakoakoga a Iesu i te fakaasiatuga o te alofa?
15. Ne fakauiga pefea a pati i te Isaia 61:1-3 ki a Iesu kae e fakaasi mai foki i ei a faifaiga a faiakoga ‵loi mo te kau Falesaio?
16. Se a te loto talitonu o tino o Ieova i aso nei e uiga ki te lotou atamai ke fai pelā me ne faifeau?
17-19. E fesoasoani mai pefea a fakatasiga e lima i te vaiaso kolā ne fakatokagina ne te fakapotopotoga a Ieova ke mafai o fai ei tatou e pelā me ne faifeau?
20. E maua pefea ne tatou a mea tāua mai fakatasiga mo fono?
21. Ne a fakamaoniga e fakaasi mai ei me e aogā ‵tou akoakoga, kae ko oi e ‵tau o tavae atu tatou ki ei?
22. Kaia e se ‵tau ei o loto vāi‵vāi tatou i te ‵kau kātoatoa atu ki te galuega talai mo Kelisiano?
[Ata i te itulau e 17]
E pelā me se faiakoga o te Muna a te Atua, ne fakaasi mai ne Iesu a tena alofa mō tino