Ke Fakatalitonu Atu i te Auala e Akoako ei Koe
1. Ne a mea e aofia i te fakaaogaga o te Muna a te Atua i te galuega talai i se auala magoi?
1 Ne loto fakafetai a tino talai ma‵goi, e pelā mo Paulo me i te “akoako ‵tonu a te munatonu a te Atua” e aofia i ei a mea e uke atu i lō te siki mai fua ne ia a pati mai i loto i te Tusi Tapu. (2 Timo. 2:15) I te taimi e fakaaoga ei ne tatou a te Muna a te Atua, e mafai pefea o “fakatalitonu” atu ne tatou a ‵tou akoakoga?—Galu. 28:23, Tusitapu Tauloto.
2. E mafai pefea o fesoasoani atu tatou ki tino ke momea aka a te lotou loto fakafetai ki te Muna a te Atua?
2 Fakaasi Atu ki te Kau Fakalogo‵logo a te Muna a te Atua: Muamua la, ke ‵saga tonu atu ki te Tusi Tapu i se auala telā e fai ei ke iloa ne te tino fakalogologo me e aofia i ei a te poto mai te Atua. A te ‵tou loto tali‵tonu ki te Muna a te Atua e mafai o fakamalosi atu ki tino fakalogo‵logo ke saga tonu mai ki te faitauga o se tusi siki. (Epe. 4:12) E mafai fua o fai atu tatou penei: “Ko oti ne lavea ne au a te aoga ke maua a mafaufauga o te Atua e uiga ki te mea tenei. Mafaufau la ki pati e fai mai i tena Muna.” Kafai e mafai, ke fakaasi atu ki tino fakalogo‵logo a te Muna a te Atua mai te faitau ‵tonu atu mai loto i ei.
3. Kafai ko oti ne faitau atu se tusi siki, ne a mea e mafai o fai ke fesoasoani atu ki tino fakalogo‵logo ke maina i ei?
3 A te lua o mea, ke fakamatala atu a te tusi siki telā ne fakaaoga. E faigata ki tino e tokouke ke maina i se fuaiupu i te taimi muamua e fai‵tau ki ei. E manakogina faeloa ke fakamatala atu ne tatou a te auala e fetaui ‵lei ei se tusi siki mo te mataupu telā e sau‵tala ki ei. (Luka 24:26, 27) Ke faka‵mafa faka‵lei atu a pati i tusi siki kolā e ‵lago atu ki te manatu tāua e sau‵tala ki ei. E mafai o fai atu se fesili ke fakamaoni aka ei me e maina a te tino i te manatu tāua mai i te tusi siki io me ikai.—Faata. 20:5; Galu. 8:30.
4. Se a te ‵toe auala tāua e mafai ei o fakatalitonu atu ‵tou akoakoga?
4 Fakasakosako Atu Mai te Tusi Tapu: A ko te tolu o mea, taumafai ke oko ‵tonu atu ki te mafaufau mo te loto o te tino. Fesoasoani atu ke lavea ne te tino i te fale a te auala e aoga ei a fuaiupu takitasi ki a ia. A te fakasakosako atu mai te Tusi Tapu e fakamalosi aka ei a te tino ke ‵fuli ana mafaufauga. (Galu. 17:2-4; 19:8) E pelā me se fakaakoakoga, kafai ko oti ne faitau atu te Salamo 83:18 e mafai o fakasakosako atu tatou me e tāua ke iloa te igoa o te tino i te atiakaga o se fesokotakiga totino. Kae kāti e mafai o fesili atu, penei, “E mata, e talitonu koe me i te iloaga o te igoa o te Atua ka fai ei ke momea aka te aoga o au ‵talo?” A te fakafetaui aka ne tatou o te tusi siki mo te olaga o te tino i te feitu tenei e fakaasi atu i ei te tāua o te mea nei. A vaegā akoakoga fakamalosi loto penei mai te Muna a te Atua e fai i ei ke fakapili‵pili atu a tino loto ‵lei o tapuaki atu ki te Atua tonu telā e ola, ko Ieova.—Iele. 10:10.