Mea Kolā e ‵Tau o Fakamuamua ne Tatou
1. Ne fakaasi atu pefea ne Iesu me ne tāua te galuega talai ki a ia?
1 A te galuega talai ko te mea telā ne fakamuamua ne Iesu. Ne galue malosi a ia, mai i te sasale atu i te fia selau o maila i Palesitina kātoa ke talai atu ki tino e tokouke e mafai o maua ne ia. Ne tumau a ia i se olaga faigofie ko te mea ke uke atu a taimi e fakaaoga ne ia ki te galuega talai. (Mata. 8:20) I taimi ne taofi aka ei a ia ne te vaitino ko te mea ke faka‵lei aka olotou ma‵saki, ne fai atu a ia: “E ‵tau mo au o takutaku atu te Tala ‵Lei o te Malo o te Atua ki nisi fa‵kai, me tenā eiloa te mea ne uga mai ei au ne te Atua, ke vau o fai.”—Luka 4:43.
2. Kaia ne tāua malosi ei te galuega talai ki a Iesu?
2 Kaia ne tāua malosi ei te galuega talai ki a Iesu? A te mea tāua telā ne manavase a ia ki ei ko te faka‵maluga o te igoa o Ieova. (Mata. 6:9) Ne alofa a ia ki tena Tamana faka-te-lagi kae ne manako malosi a ia ke fakataunu Tena loto kae fakalogo ki Ana fakatonuga katoa. (Ioane 14:31) E se gata i ei, ne atafai tonu eiloa a ia ki tino kae ne manako foki ke fesoasoani atu ki a latou.—Mata. 9:36, 37.
3. E fakaasi atu pefea ne tatou me e ‵saga tonu atu tatou ki te galuega talai?
3 Fakaakoako ki a Iesu: A te tumau foki i te fakamuamua ne tatou o te mea telā ne fakatāua ne Iesu e mafai o faigata ona ko te mea e manako malosi foki te lalolagi ki ‵tou taimi kae e tuku mai foki i ei a mea e uke ke fakalavelave mai. (Mata. 24:37-39; Luka 21:34) Tela la, e ‵tau o fakamautinoa aka ne tatou a mea kolā e sili atu i te tāua, mai i te fakatoka o taimi ke fakatoka faka‵lei kae ‵kau atu foki faeloa ki te galuega talai. (Fili. 1:10) E taumafai tatou ke fakatumau se olaga faigofie kae ‵kalo keatea mai i te fakaaogaga katoatoa o te lalolagi.—1 Koli. 7:31.
4. Kaia e tāua ei ke fakatumau te fakamuamua o mea kolā e ‵tau o fai i aso nei?
4 Kafai e se lava te taimi, ka fai eiloa ne se tino poto a te mea telā e tāua atu. Kafai e iloa ne ia me ko pili mai se matagi malosi fakamataku, ka fakaaoga eiloa ana taimi mo tena malosi ki te faiga o fakatokaga ke puipui faka‵lei ei tena kāiga kae fakailoa atu foki ne ia ki ana tuakoi. E mafai eiloa o taofi aka a nisi mea kolā e se tāua malosi. Ko gasolo ifo eiloa ki lalo a te taimi e ‵toe a koi tuai o oko mai a Amaketo. (Sefa. 1:14-16; 1 Koli. 7:29) Ko te mea ke faka‵sao tatou mo tino kolā e faka‵logo mai ki a tatou, e ‵tau o ‵saga tonu ifo faeloa tatou ki a tatou eiloa mo ‵tou akoakoga, ki tino i loto mo tua foki o te fakapotopotoga. (1 Timo. 4:16) E tonu, e faka‵na eiloa ‵tou ‵sao atu ki te tumau i te fakamuamua o te galuega talai!