“Mea‵kai i te Taimi Tonu”
1 Mai tua o te ‵kauatuga ki te ‵tou fono fakapito, e masani sāle o fai atu tatou penei: “Tenei eiloa te mea ne ma‵nako matou ki ei!” Ne lipoti mai ne se ovasia o te fenua e tokotasi, me i te otiga ne fakalogo‵logo ki te polokalame o te fono, e isi ne tino i fakapotopotoga e āsi a ia ki ei, ne fakaasi atu ne latou te lasi o te lotou manakoga ke momea aka olotou mea e fai i te galuega talai. Ne fai mai se ovasia faimalaga e tokotasi, penei, “E fesoasoani mai te mea tenei ke toe mafaufau faka‵lei tatou me tefea nei te koga e ‵nofo tatou i ei, i te vaitaimi tenei e toe mafau‵fau ei ki ‵tou filifiliga i te olaga nei.” E fai mai te suā tino penei, “E tokouke a tino talai e fakaasi mai olotou manatu me i te mea tenei e fakamasaua atu ki a latou ke ‵saga tonu atu ki te ‵toe mea aoga, telā ko te galuega talai.” E fesoasoani atu pefea te fono fakapito tenei ki a koe?
2 A te polokalame mō te tausaga faka-te-taviniga tenei ma vau ka fetaui foki eiloa mo te mea e ma‵nako tatou ki ei. A te matua tenei “Ke na ‵Lafi Atu ki a Ieova,” ne siki mai i te Salamo 118:8, 9, Tusi Paia, Samoa. Konei la nisi mataupu kolā ka sau‵tala ki ei: E Mafai Pefea o Fai a Ieova e Pelā me se ‵Pui Malosi i Taimi Faiga‵ta,” “Fesoasoani Atu ki Nisi Tino ke ‵Lafi Mai Lalo i Lima o Ieova,” “Ke Fakaakoako Atu ki a Ieova Mai te Tuku Atu o se Puipuiga,” “Talavou, Ke na Tali‵tonu Katoatoa Koutou ki a Ieova!” mo te “‵Tou Palataiso Faka-te-agaga—Se Fakatokaga a Ieova mō Faka‵lafi ki ei.”
3 Ke Maua a Mea Aoga: Kafai ko faka‵pula mai te po masina telā ka fai i ei, ke na fai a palani mautinoa ke kau atu ki ei, kae ‵kami mai foki au a‵koga faka-te-Tusi Tapu ke ‵kau fakatasi koutou. Ko te mea ke “‵fua mai mo te loto mau,” e ‵tau o tumau te ‵tou faka‵logo ki mea ko lagona ne tatou. (Luka 8:15) Tela la, ke fakalogologo faka‵lei ki te polokalame, kae tusi ki lalo a nai manatu tāua e penā foki mo fakatonuga kolā e mafaufau koe o fakagalue aka i tou olaga mo te galuega talai. Ke fakaavanoa se taimi māfai ko oti te fono ke sau‵tala ki te polokalame e pelā me se kāiga, kae mafaufau ki auala kese‵kese kolā e mafai ne koe mo tou kāiga o fakaaoga a fakamatalaga konā.
4 E pelā eiloa me se meakai telā e momona kae aoga, e penā eiloa te fono fakapito telā ko oti ne fakatoka i te alofa mo te mafaufau ‵loto ki ei. Ka fakamanuia ne Ieova au taumafaiga ke kau atu kae ke maua foki a mea aoga mai i “mea‵kai i te taimi tonu” ke fakamalosi aka ei i te feitu faka-te-agaga a faifeau Kelisiano.—Mata. 24:45.
[Fesili mo te Sukesukega]
1. E fesoasoani atu pefea a te polokalame o te fono fakapito ki a koe penā foki loa mo nisi tino?
2. Ne a mea ka sau‵tala ki ei i te polokalame o te tausaga faka-te-taviniga fou?
3. E mafai pefea o maua katoatoa ne tatou a mea aoga mai te ‵kau atu ki te fono?
4. Kaia e ‵tau ei o olioli malosi tatou ki te ‵tou aso mō te fono fakapito?