E ‵Mana te Muna a te Atua

1. Se a te matua o te fono fakapito mō te tausaga faka-te-taviniga ko te 2014?

¹ E se pelā mo so se mea telā e māfua mai tino sē ‵lei katoatoa, e maua ne te Tusi Tapu a te ‵mana ke ‵fuli tatou, fakafetaui aka ‵tou manatu mo auala ki te loto o Ieova. E pefea te ‵mana o te Muna a te Atua? E mafai pefea o fakaaoga katoatoa ne tatou tena ‵mana i ‵tou olaga? E mafai pefea o fakaaoga ne tatou i se auala tai magoi atu ke fesoasoani ki nisi tino? E tali‵tonu matou me ka fakamalosi aka a tino katoa i te feitu faka-te-agaga i te taimi e mafau‵fau ei ki manatu konei i te polokalame o te fono fakapito mō te tausaga faka-te-taviniga ko te 2014. A te matua o te fono ko te “E ‵Mana te Muna a te Atua,” telā e fakavae ki te Epelu 4:12.

2. Ne a fesili e ‵tau o fakalogo‵logo tatou ki olotou tali?

² Ke ‵Sala a Tali ki Fesili Konei: I te taimi e fakalogologo ei koe ki te polokalame, ke tusi ki lalo a tali o fesili konei mai lalo.

• Kaia e ‵tau ei o tali‵tonu tatou ki te Muna a Ieova? (Sala. 29:4)

• E mafai pefea o lagona ne tatou a te ‵mana o te Muna a te Atua i ‵tou olaga? (Sala. 34:8)

• E fakagalue aka pefea ne koe a te ‵mana o te Muna a te Atua i tau galuega talai? (2 Timo. 3:16, 17)

• E mafai pefea o ‵kalo keatea tatou mai i te tosina atu ki te ‵mana faka‵se tino o te lalolagi a Satani? (1 Ioane 5:19)

• E mafai pefea ne koe e pelā me se talavou o manuia i te feitu faka-te-agaga? (Iele. 17:7)

• E mafai pefea o maua ne tatou a te malosi ke oko foki eiloa ki taimi kolā ko vāi‵vai ei tatou? (2 Koli. 12:10)

• Se a te auala tāua ke tumau i te faiga o ‵fuliga, ke oko foki eiloa ki faifaiga mo uiga ma‵sei kolā ko leva ne maua ne tatou? (Efe. 4:23)

3. I tafa o te fakalogologo ki te polokalame, ne a nisi auala e mafai ei o maua ne tatou a mea aoga mai i te fono fakapito?

³ Ka maua eiloa ne tatou a mea aoga mai te fakalogologo ki fakamatalaga tāua konei! E se gata i ei, a te fono fakapito, e pelā mo te fono o te fenua mo te fono o te atufenua, ka tuku mai i ei a avanoaga ke fakamasani atu ki nisi taina mo tuagane kae ke sau‵tala mo latou mai tua o te ‵tou fakapotopotoga. (Sala. 133:1-3; 2 Koli. 6:11-13) Ke fakaavanoa ne taimi ke sau‵tala mo taugasoa mua, kae ke fai foki ne taugasoa ‵fou. Kafai e isi se failauga asiasi e pelā mo te ovasia faimalaga o atufenua io me se taina mai i te Peteli ne ‵tofi aka ke kau atu ki te otou fono fakapito, kaia e se fakaaoga ei te avanoaga ke fakatalofa atu ki tou tagata mo tena avaga? A te ‵tonuga loa, e maua ne tatou a pogai e uke ke olioli ke na oko atu tatou ki te fono fakapito tenei!