E Mata, e Taumafai Malosi Koe o Fesoasoani Atu ki Tau Avaga sē Talitonu?

1. Kaia e se fai ei pelā me ko Kelisiano fua kolā e mavae‵vae olotou kāiga i mea tau lotu e ma‵nako ke fesoasoani atu ki olotou avaga sē tali‵tonu ke talia te munatonu?

¹ E mata e isi ne tino talai i tau fakapotopotoga e isi ne olotou avaga tagata io me ne avaga fafine kolā e sē tali‵tonu? Kafai e isi, seai eiloa se fakalotolotolua me e ma‵nako malosi a tino talai konei ke ‵kau atu olotou avaga ki te tapuakiga tonu. Kae e se ko latou fua e ma‵nako ke fai penā. E fakaasi mai ne te fakapotopotoga kātoa a te manakoga o Ieova ke “ola tino katoa, ka ke iloa foki ne latou te munatonu.” (1 Timo. 2:4) E mafai pefea o fesoasoani atu tatou ki avaga sē tali‵tonu a tino talai i loto i te ‵tou fakapotopotoga?

2. E fai pefea ne te poto ke mafai ne tatou o fesoasoani atu ki se avaga sē tali‵tonu?

² Muamua la, e ‵tau o taumafai tatou ke malamalama muamua i kilokiloga a tino sē tali‵tonu. A te tokoukega o tino avaga sē tali‵tonu e a‵lofa ki olotou kāiga kae taumafai ke fai latou e pelā me ne tino a‵vaga mo mātua ‵lei. Kāti la, e ‵kese ki eiloa a olotou talitonuga mai i a tatou. E mafai o mu‵tana olotou mea e iloa e uiga ki Molimau a Ieova i tafa o pati a tino kolā e se iloa ne latou tatou kae fakakese‵kese tino. E se fia‵fia a nisi tino ki olotou avaga me ko fakaaoga ne latou a te taimi muamua telā ne fakamāumāu mo olotou kāiga ki te tapuakiga. Ka fesoasoani mai a te poto ke fai faka‵lei ne tatou a tino sē tali‵tonu mo te atafai mo te āva kae ‵kalo keatea mai te manava‵se malosi māfai ko ‵nofo atu i olotou tafa.​—Faata. 16:20-23.

3. Se a te ‵toe auala lei ke manumalo ei koe i se tino sē talitonu?

³ Te Amanaia Tonu: A te ‵toe auala sili ke ‵taki mai ei se avaga sē talitonu ki te munatonu, i te taimi muamua, kāti e auala i ‵tou faifaiga, kae e se ko sau‵talaga faka-te-Tusi Tapu. (1 Pe. 3:1, 2) A te mea tāua i konei ko te fakaasiatuga o te amanaia tonu. E mafai o fakaasi atu ne tuagane i te fakapotopotoga a te amanaia ki se avaga fafine sē talitonu, kae e mafai foki ne taina o fai a te mea tenā ki se avaga tagata sē talitonu. E pefea la?

4. E fakaasi atu pefea ne tatou a te amanaia tonu?

⁴ Kafai e seki fetaui koe mo te avaga sē talitonu, e mafai o fanatu koe ki ei māfai ko oti ne sau‵tala faka‵lei koe mo tena avaga Kelisiano. Sa kaitaua māfai a te tino sē talitonu e se saga faka‵lei atu ki a koe i te taimi muamua. A ‵tou mata fia‵fia mo te amanaia e mafai o fai ei ke momea aka tena fiafia ki Molimau a Ieova. (Loma 12:20) E mafai ne nisi Kelisiano ma‵tua ‵lei o ‵kami mai a te tino sē talitonu mo tena kāiga ke ‵kai fakatasi latou i te afiafi, mo se kilokiloga ke fakamasani faka‵lei latou kae ke ‵kalo keatea foki mai te uiga ko te fakakese‵kesega o tino. E sau‵tala latou ki mea kolā e fia‵fia sāle ki ei te avaga sē talitonu, i lō te ‵saga malosi atu ki mataupu faka-te-Tusi Tapu. Fakamuli ifo, kafai a te avaga sē talitonu ko tai kauga mai, ko mafai ei o fakasae aka se sau‵talaga faka-te-Tusi Tapu, māfai e mafai. Io me e mafai ne ia o talia se ‵kamiga ke kau mai ki se fakatasiga a tatou ke onoono a ia ki mea kolā e tauloto ki ei tena avaga fafine, maise eiloa māfai e iloa ‵lei ne ia a nisi tino i te fakapotopotoga. E tiga eiloa e seki toka a ia ke iloilo aka te mea tonu, kae e mafai o fakamālō atu a ia ki te fesoasoani telā ne tuku atu ki tena avaga talitonu.

5. E fakamalosi atu pefea a toeaina ki tino sē tali‵tonu?

⁵ E ‵tau eiloa mo toeaina o fesoasoani atu ki avaga sē tali‵tonu konei kae ‵sala atu foki ki ne avanoaga ke tuku atu se molimau ‵lei ki a latou. E mafai eiloa ne te avaga sē talitonu telā seki fakatoka aka eiloa ki se sau‵talaga faka-te-Tusi Tapu o fakalogologo ki fakamalosiga faka-te-Tusi Tapu i te taimi e nofo i ei i te fa‵kaimasaki io me masaki malosi ‵ki. Kafai e isi se fakalavelave i loto i se kāiga telā e mavae‵vae olotou talitonuga, e pelā me se mate o se kāiga, e mafai ne toeaina o ‵kami mai te avaga sē talitonu ke kau atu ke fakalogologo ki fakamalosiga kolā e tuku atu ne latou ki te kāiga.

6. Ne a pogai e ‵tau ei mo tatou o fakamalosi atu ki tino a‵vaga sē tali‵tonu?

⁶ Ke mafaufau la ki te fiafia telā ka maua ne Kelisiano i te ‵tou fakapotopotoga, māfai ko ‵saga mai olotou avaga kae au‵mai ki loto i te munatonu! A te vaegā fiafia tenā e avatu ne ia te fiafia ki a Ieova, ki agelu, e penā foki eiloa ki te fakapotopotoga kātoa. (Luka 15:7, 10) Kae kafai e seki kau mai a te tino sē talitonu tenā i te taimi muamua, e mafai eiloa o fia‵fia tatou me e fakafiafia atu a ‵tou taumafaiga ki a Ieova, telā e se “manako a ia ke malaia se tino, tenā te pogai e fakatuai ei a ia o fakataunu ana folafolaga, ko te mea ke lava se taimi e sala‵mo ei a tino.”​—2 Pe. 3:9.

[Fakamatalaga o te Ata i te itulau e 6]

A te ‵toe auala sili e mafai ei ne koe o ‵taki mai se avaga sē talitonu ki te munatonu i te taimi muamua, e auala i ‵tou faifaiga, kae e se ko sau‵talaga faka-te-Tusi Tapu