E Mafai Eiloa O Maua Te Fiafia I Se Kāiga ‵Nofo Mavae‵vae

“Ko oi e iloa ne ia me ka fakasao ne koe tau avaga?”—1 KOLINITO 7:16.

E MAFAI NE KOE O MAUA A TALI KI EI?

Ne a mea e mafai o fai ne tino tali‵tonu ke ati aka te filemu i loto i se kāiga telā e mavae‵vae i mea fakalotu?

Ka fesoasoani atu pefea se Kelisiano ki tino sē tali‵tonu o te kāiga ke puke ‵mau ki te tapuakiga tonu?

Ne a mea e mafai o fai ne nisi tino ke fesoasoani atu ki taina tali‵tonu kolā e ‵nofo i kāiga e mavae‵vae i mea fakalotu?

1. Ne a mea aoga e maua ne te kāiga māfai e talia ne latou te fekau o te Malo?

I TE taimi e tasi ne uga atu ei ne Iesu ana apositolo, ne fai atu a ia: “Olo o talai atu penei: ‘A te Malo o te lagi ko pili mai.’” (Mataio 10:1, 7) Ka aumai ne te tala ‵lei tenei a te filemu mo te fiafia ki a latou kolā e talia ne latou mo te loto fakafetai. E ui i ei, ne fakailoa atu ne Iesu ki ana apositolo me e tokouke a tino ka ‵teke atu ki te lotou galuega talai. (Mataio 10:16-23) Kae kafai e ‵teke mai a tino o te kāiga ki te fekau o te Malo, e sili atu te faka‵mae o te mea tenā.—Faitau te Mataio 10:34-36.

2. Kaia e se faigata ei ke maua te fiafia ne Kelisiano kolā e ‵nofo atu i kāiga e mavae‵vae i mea fakalotu?

² E mata, e fakauiga i ei me ne seki maua ne soko o Keliso kolā e ‵nofo atu i kāiga e mavae‵vae i mea fakalotu a te fiafia? Ikai loa! E tiga eiloa te faigata o ‵tekemaiga mai i kāiga i nisi taimi, e se tenā faeloa te pogai e se maua ei te fiafia. A ‵tekemaiga foki mai kāiga e se tumau. E fakalago‵lago eiloa a te ukega o mea ki te auala e tali atu ei a tino tali‵tonu ki ‵tekemaiga io me ko te sē fia ‵saga mai o tino. E se gata i ei, e fakamanuia eiloa ne Ieova a tino kolā e a‵lofa fakamaoni ki a ia, e fai ne ia ke fia‵fia latou faitalia a fakanofonofoga sē fakafiafia. E mafai eiloa ne tino tali‵tonu o fakaopoopo atu ki te lotou fiafia (1) mai te taumafai malosi o ati aka te filemu i loto i te fale kae ko te (2) mai te taumafai malosi o fesoasoani atu ki kāiga sē tali‵tonu ke puke ‵mau ki te tapuakiga tonu.

KE ATI AKA TE FILEMU I LOTO I TE FALE

3. Kaia e ‵tau ei o ati aka a te filemu ne se Kelisiano telā e nofo i se kāiga e mavae‵vae?

³ Ko te mea ke ‵fua mai a fuaga o te amiotonu i loto i se kāiga, e ‵tau o maua a fakanofonofoga filemu i loto i te fale. (Faitau te Iakopo 3:18.) Kafai foki e seki ‵kaufakatasi se kāiga Kelisiano i te tapuakiga ‵ma, e ‵tau eiloa mo tou tagata o fai se taumafaiga loto finafinau ke ati aka te filemu i loto i te fale. E mafai pefea o fai a te mea tenei?

4. E mafai pefea o fakatumau ne Kelisiano a te filemu i loto i a latou?

⁴ E ‵tau eiloa o fakatumau ne Kelisiano a te filemu i loto i a latou. E manakogina i ei a te ‵talo mo te loto kātoa ke maua i ei ne tatou a te “filemu o te Atua” telā e se fuafuagina. (Filipi 4:6, 7) E maua eiloa te fiafia mo te filemu mai te mauaga o te iloaga e uiga ki a Ieova kae fakagalue aka a fakatakitakiga mai te Tusi Tapu i ‵tou olaga. (Isaia 54:13) E tāua foki a te kau atu mo te loto finafinau ki te galuega talai mo te faiga o tusaga i fakatasiga a te fakapotopotoga māfai e fia maua ne tatou a te fiafia mo te filemu. E mafai eiloa ne tino tali‵tonu kolā e ‵nofo atu i kāiga mavae‵vae o ‵kaufakatasi i galuega faka-Kelisiano i nisi feitu. E pelā me se fakaakoakoga, ke mafaufau ki a Enza,a telā e ‵teke malosi atu tena avaga tagata kae sauā. E kau atu tou fafine ki te galuega ko te faiga o soko māfai ko oti ne fai ne ia ana tiute katoa i te fale. Muna a Enza, “Ko oti ne fakamanuia malosi au ne Ieova fakatasi mo ikuga ‵lei i taimi katoa e taumafai ei au o talai atu te tala ‵lei ki nisi tino.” E mautinoa eiloa me i vaegā fakamanuiaga penā e maua mai i ei a te filemu, te loto malie, mo te fiafia.

5. Ne a tulaga faiga‵ta e fakafesagai sale atu ki ei a tino tali‵tonu i loto i kāiga mavae‵vae, kae se a te fesoasoani e mafai o maua ne latou?

⁵ E manakogina ke fai ne tatou se taumafaiga loto finafinau ke ati aka se fesokotakiga filemu mo tino sē tali‵tonu i loto i te kāiga. E se taumate ka fakafesagai atu tatou ki se tulaga faigata ona ko mea kolā e ma‵nako mai latou ke fai ne tatou e fe‵paki eiloa mo fakatakitakiga i te Tusi Tapu i nisi taimi. Kāti ka sē fia‵fia a tino sē tali‵tonu o te kāiga i a tatou e taofi ‵mau ki fakatakitakiga ‵tonu, kae ko te tumau i ei e fakamalosi aka i ei a te filemu i se taimi leva ‵ki. E tonu, a te ‵mautakitaki ki se mea telā e se soli i ei a fakatakitakiga mai te Tusi Tapu e fakamafua aka fua i ei se kinauga telā e se manakogina. (Faitau te Faataoto 16:7.) Kafai e fakafesagai atu ki se tulaga faigata, se mea tāua ke ‵sala atu ki polopolokiga faka-te-Tusi Tapu mai lomiga a te tavini fakamaoni kae poto mo toeaina.—Faataoto 11:14.

6, 7. (a) Kaia e ‵teke atu ei a nisi tino ki tino o te kāiga kolā ko kamata o a‵koga fakatasi mo Molimau a Ieova? (e) E ‵tau o tali atu pefea se tino akoga ki te Tusi Tapu io me se tino talitonu ki ‵tekemaiga mai i kāiga?

⁶ A te atiakaga o te filemu i loto i se kāiga, e manakogina i ei a te tali‵tonu fakamaoni ki a Ieova mo te iloa ‵lei o lagonaga o tino sē tali‵tonu o te kāiga. (Faataoto 16:20) E mafai foki o fakaasi atu ne tino ‵fou kolā e a‵koga ki te Tusi Tapu a te loto malamalama i te feitu tenei. Kāti ka sē ita a nisi tāgata io me ko fāfine māfai e a‵koga olotou avaga ki te Tusi Tapu. Kāti ka iloa aka ne latou me se mea ‵lei tenā ki te kāiga. Kae ka fakaasi mai ne nisi tino a te sē fia‵fia. Ne fai mai a Esther telā se Molimau nei, me ne “kaitaua tonu” eiloa a ia i te taimi ne kamata ei o fai a te akoga faka-te-Tusi Tapu a tena avaga fakatasi mo Molimau a Ieova. Muna a tou fafine, “au ne mafaufau me ka ‵pei ne au tena tusi io me ‵sunu.” E fai mai a Howard telā ne ‵teke muamua atu ki te akoga faka-te-Tusi Tapu a tena avaga fafine: “E tokouke a tāgata a‵vaga ko ma‵taku i te mea ko oti ne fakaloiloigina olotou avaga ke ‵kau atu ki se potukau fakalotu. Kāti e se iloa ne se tagata avaga a te auala e fakafesagai atu ei ki te tulaga tenei, telā ko fai ei ke kilo fakataklialia atu ki ei.”

⁷ E ‵tau eiloa o fesoasoani atu ki se tino akoga telā e ‵teke tena avaga ke matea ne ia me e se ‵tau eiloa o tiaki a tena akoga. Ka mafai eiloa o faka‵lei aka ne ia a te feitu tenā māfai e se ita vave kae fakaasi atu a te āva ki tena avaga sē talitonu. (1 Petelu 3:15) Muna a Howard, “Ko oko eiloa i toku fiafia me ne filemu eiloa a taku avaga kae seki kaitaua mai!” E fakamatala mai tena avaga fafine: “Ne manako a Howard ke taofi a taku akoga faka-te-Tusi Tapu. Ne fai mai a ia me i toku mafaufau ko oti ne fakamasei. I lō te kinau atu, ne fai atu au me e mafai eiloa o tonu a ia, kae toe fai atu foki au ki tou tagata me e se matea tonu ne au me ne fakamasei pefea. Tenā ne fakamolemole atu ei au ki tou tagata ke faitau aka ki te tusi telā ne akoga au ki ei. Ne faitau eiloa a ia ki ei kae ne lotomalie ki mea kolā e fai mai i ei. Ne pokotia masei eiloa tou tagata i te mea tenei.” Se mea ‵lei ke masaua ne tatou me i avaga sē tali‵tonu, e mafau‵fau i a latou ko tiakina io me ma‵taku māfai ko olo olotou avaga i galuega faka-Kelisiano, kae ko te fakatalitonu atu i se auala alofa e tumau eiloa tena aoga mō se taimi leva ke faka‵noga aka ei a vaegā lagonaga penā.

FESOASOANI ATU KI A LATOU KE PUKE ‵MAU KI TE TAPUAKIGA TONU

8. Se a te polopolokiga ne tuku atu ne te apositolo ko Paulo ki Kelisiano kolā e se tali‵tonu olotou avaga?

⁸ Ne fakailoa atu te apositolo ko Paulo ki Kelisiano ke sē tiaki olotou avaga ona fua ko latou taki tokotasi konā e se ne tino tali‵tonu.b (Faitau te 1 Kolinito 7:12-16.) E mafai o fesoasoani atu ki te tino talitonu ke fakatumau tena fiafia faitalia me nofo atu i se kāiga mavaevae, māfai e masaua faeloa ne ia me e mafai o fai se avaga sē talitonu mo fai se Kelisiano. I te taumafai ke oko atu a te fekau o te munatonu ki te tino sē talitonu, e ‵tau eiloa o fakaeteete malosi i ei, e pelā mo te mea telā e lavea atu i tala kolā e ‵soko mai.

9. Se a te mea e ‵tau o fakaeteete malosi i ei māfai ko faipati atu ne koe a te munatonu i te Tusi Tapu ki tino sē tali‵tonu i te kāiga?

⁹ I te ‵toe mafaufau ki ana faifaiga ne fai ke tauloto ki muna‵tonu mai te Tusi Tapu, e fai mai a Jason, “au ne manako o faipati ki tino katoa!” Kafai e loto fakafetai se tino akoga ki te Tusi Tapu ki te ‵tonu o mea kolā ne akoako a ia ki ei mai te Tusi Tapu, kāti ka fiafia ‵ki eiloa tou tagata me ka faipati faeloa a ia e uiga ki ei i taimi katoa. Kāti e fakamoemoe tou tagata me ka talia fakavave ne tino o te kāiga kolā e se tali‵tonu a te fekau o te Malo, kae e agai atu eiloa ki te tala ‵lei se tali e ‵fuli fakakotua. Ne pokotia pefea te avaga a Jason i te safega o tena matagi i te kamataga? “Ne silia ‵ki eiloa toku fiafia,” ko mea e masaua ne tou fafine. E tokotasi te fafine ne talia ne ia te munatonu i te 18 tausaga mai tua o te faipatiga a tena avaga penei, “au, i au eiloa, e manakogina ke tauloto malielie ki ei.” Kafai e fai nei ne koe se akoga faka-te-Tusi Tapu mo se tino telā e se fia kau atu tena avaga ki te tapuakiga tonu, kaia e se fai i ei se fakaakoakoga ke fesoasoani atu ki te tino akoga ke poto i te fakafesagai atu ki tulaga penā? Muna a Mose: “Aku akoakoga ka ‵to pelā me ne motiga vaiua, kae ka pelā me se sau o te vaveao i te lalolagi. Aku pati ka ‵to pelā me se afuga vaiua ki luga i lakau fo‵liki, e pelā me ne vaiua fo‵liki ki luga i mouku malu‵lu.” (Teutelonome 32:2) E masani o uke atu a mea ‵lei e fai ne motimotiga o muna‵tonu kolā e tuku atu i te taimi tonu i lō te ‵ligi kātoa atu i se taimi e tasi.

10-12. (a) Se a te fakatakitakiga ne tuku atu ne te apositolo ko Petelu ki Kelisiano kolā e se tali‵tonu olotou avaga? (e) Ne iloa pefea ne se tokotasi o tino akoga ki te Tusi Tapu o fakagalue aka a te fakatakitakiga i te 1 Petelu 3:1, 2?

¹⁰ Ne tuku mai ne te apositolo ko Petelu a polopolokiga fakaosofia mō avaga fāfine Kelisiano kolā e ‵nofo i kāiga mavae‵vae i mea fakalotu. “Ke faka‵logo koutou ki otou avaga,” ne tusi mai tou tagata, “ko te mea kafai e isi ne tino i a latou e se faka‵logo ki te muna, e mafai o tosina mai latou e aunoa mo se pati ona ko amioga a olotou avaga, me ko oti ne lavea ne latou otou amioga ‵ma mo te lasi o te otou āva.” (1 Petelu 3:1, 2) Kāti e mafai eiloa ne se fafine avaga o ‵futi mai tena avaga tagata ki te tapuakiga tonu e auala i te fakalogo mo te āva malosi ki a ia, māfai foki eiloa e fai masei a ia ne tou tagata. E penā foki loa, e ‵tau o fai ne se tagata avaga talitonu ana amioga i auala fakaatua kae fai mo fai se ulu o te kāiga telā e alofa faitalia so se ‵tekemaiga e fakafesagai atu a ia ki ei mai tena avaga sē talitonu.—1 Petelu 3:7-9.

¹¹ E uke a fakaakoakoga i aso nei e fakaasi mai i ei a te tāua ke fakagalue aka a te polopolokiga a Paulo. Mafaufau ki te tulaga o Selma. I te taimi ne kamata ei o suke‵suke fakatasi tou fafine mo Molimau a Ieova ki te Tusi Tapu, ne sē fiafia ‵ki eiloa tena avaga ko Steve. Ne fai mai tou tagata, “Au ne kaitaua, masalosalo, solopū, kae sē tokagamalie.” E fai mai a Selma: “A koituai foki o maua ne au a te munatonu, a te ‵nofo tasi mo Steve e ‵pau eiloa pelā me e sasale i luga i atigi fuamoa. Ko ia loa ko ita malosi. I te taimi ne kamata ei au o tauloto ki te Tusi Tapu, ne gasolo aka eiloa o masei atu a te uiga tenei.” Se a te mea ne fesoasoani mai?

¹² E masaua ne Selma se mataupu ne tauloto ne ia mai te Molimau telā ne a‵koga mo ia. “I te aso fua e tasi,” muna a Selma, “Ne seki manako au ke fai taku akoga faka-te-Tusi Tapu. I te po mai mua atu, ne pago au ne Steve me ne taumafai au o fakatalitonu atu ki a ia se manatu, kae ne fanoanoa ‵ki eiloa au i ei. I te otiga ne fai atu ne au ki te tuagane a te mea ne tupu mo oku lagonaga, fai mai ei tou fafine ke faitau ne au a te 1 Kolinito 13:4-7. I te taimi ne faitau ei au, kamata ei au o fakasakosako atu, ‘E seki fai mai eiloa ne Steve se faiga alofa penei ki au.’ Kae ne fai ne te tuagane ke ‵kese te mea e mafaufau au ki ei e auala i te fesili mai penei, ‘E fia a faiga a‵lofa konā ne fakaasi atu ne koe ki tau avaga tagata?’ Taku tali ki ei, ‘E seai, me ko oko eiloa te faigata ke ‵nofo fakatasi mo ia.’ Ne fai atu te tuagane mo te leo malū, ‘Selma, ko oi te tino i konei e taumafai ke fai pelā me se Kelisiano? Ko koe io me ko Steve? Ne ‵talo atu au ki a Ieova ke fesoasoani mai ke momea aka te fakaasiatuga ne au o uiga a‵lofa ki a Steve i te taimi ne iloa aka ei me manakogina ke fakatonutonu aka toku mafaufau. Ne kamata o mafuli‵fuli malie a mea.” Ne talia ne Steve a te munatonu i te 17 tausaga mai tua ifo.

TE AUALA E MAFAI EI O FESOASOANI MAI A NISI TINO

13, 14. E mafai pefea o fesoasoani atu a nisi tino i te fakapotopotoga ki a latou kolā e ‵nofo atu i kāiga e mavae‵vae i mea fakalotu?

¹³ E tokouke a tino taki tokotasi i loto i te fakapotopotoga e fesoasoani atu ke maua ne Kelisiano i loto i kāiga mavae‵vae a te fiafia e pelā mo motigā ua kolā e fakasiusiu i ei a te laukele kae fesoasoani atu ke ola a lakau. “A te mea telā ne fesoasoani mai ke tu ‵mautakitaki au i te munatonu ko te a‵lofa o oku taina mo tuagane,” ko muna a Elvina i Brazil.

¹⁴ E otia eiloa te loto o se kāiga sē talitonu māfai e lavea atu a te mataa‵lofa mo te matafia‵fia i luga i nisi tino i loto i te fakapotopotoga. E fai mai se tagata avaga i Nigeria telā ne talia ne ia te munatonu i te 13 tausaga mai tua o te taimi ne fai atu ei tena avaga ki a ia: “I te taimi ne olo tasi ei au mo se Molimau, ne mate te motoka a tou tagata. Ne ‵sala atu a ia ki taina Molimau i fa‵kai ‵pili mai kae ne fakaafe ne latou a māua i te po tenā. Ne tausi mai latou ki a māua e pelā eiloa me ne masani matou mai te fo‵likiga. I konā loa, lagona ei ne au a te alofa faka-Kelisiano telā ko leva ne faipati mai taku avaga e uiga ki ei.” E masaua ne se fafine avaga i Egelani telā ne vau ki loto i te munatonu i te 18 tausaga mai tua ifo o te faiatuga a tena avaga: “Ne ‵kami a māua ne Molimau ke ‵kai fakatasi matou. E isi faeloa se lagonaga i a au e taliagina.”c E fai mai se tagata avaga i te fenua foki eiloa tenā kae ne fai fakamuli mo fai se Molimau: “E āsi mai a taina mo tuagane ki a māua io me ‵kami atu māua ki olotou fale, kae ne matea ne au me e isi se uiga atafai i a latou. Ne lavea ‵lei eiloa te mea tenei i te taimi ne ulu ei au i te fakaimasaki kae tokouke ne o‵mai o āsi mai ki au.” E mata, e mafai ne koe o ‵sala foki ne avanoaga penā ke fakaasi atu se matafiafia tai ‵pau ki tino sē tali‵tonu i te kāiga?

15, 16. Se a te mea e mafai o fesoasoani atu ki se tino talitonu ke tumau i te fiafia māfai a nisi tino o te kāiga e tumau eiloa i te fai pelā me ne tino sē talitonu?

¹⁵ E tonu, e se ko avaga, tama‵liki, mātua, io me ko nisi kāiga aka katoa kolā e se tali‵tonu e mafai o puke ‵mau ki te tapuakiga tonu, faitalia te uke o tausaga e fakamaoni ei se tino talitonu i ana amioga e fai kae e apo malosi foki i te molimau atu. E tumau eiloa a nisi tino i te sē fia ‵saga mai io me ‵teke mai faeloa. (Mataio 10:35-37) Kafai e fakaasi atu ne Kelisiano a auala fakaatua, e mafai eiloa o ma‵goi a ikuga e maua mai i ei. E fai mai se tagata avaga telā ne seki talitonu muamua: “Kafai ko kamata o fakaasi manino mai ne se avaga talitonu a uiga a‵lofa konā, e se iloa ne koe me se a te mea ka oko ki te mafaufau mo te loto o te tino sē talitonu. Tela la, ke mo a eiloa e ‵fiu vave koe i tau avaga sē talitonu.”

¹⁶ Kafai foki e tumau eiloa se tino o te kāiga i te fai mo fai se tino sē talitonu, e mafai eiloa o fiafia a te tino talitonu. E tiga eiloa ne seki talia ne tena avaga tagata a te fekau o te Malo mai tua ifo o tausaga e 21 ne taumafai ei a ia, e fai mai se tuagane e tokotasi: “Ne mafai eiloa ne au o fakatumau toku fiafia mai te taumafai ke fakafiafia atu ki a Ieova, e auala i te fakatumauga o toku alofa fakamaoni ki a ia, mo te galue ke fakamalosi aka toku feitu faka-te-agaga. A te fakalavelave malosi o oku i mea faka-te-agaga—ko sukesukega totino, ‵kau ki fakatasiga, te gauega talai, mo te fesoasoani atu ki nisi tino i te fakapotopotoga—ne fai ei ke pili malosi atu au ki a Ieova kae puipui ei toku loto.”—Faataoto 4:23.

KE MO A E ‵FIU VAVE!

17, 18. E mafai pefea o tumau se Kelisiano i te fakamoemoe, i loto foki loa i se kāiga telā e mavae‵vae i mea fakalotu?

¹⁷ Kafai koe se Kelisiano fakamaoni e nofo atu i se kāiga telā e mavae‵vae i mea fakalotu, ke mo a e ‵fiu vave. Masaua me “e se mafai ne ia o tiakina koutou, me ko oti ne filifili a ia ke fai koutou mo ona tino tonu.” (1 Samuelu 12:22) Ka fakatasi atu a ia ki a koe māfai e ‵piki ‵mau faeloa koe ki a ia. (Faitau te 2 Nofoaiga Tupu 15:2.) Tela la, “‵sala tou manuia ki te Aliki.” E tonu, “tuku atu katoa a koe ki te Aliki; fakatuanaki ki a ia.” (Salamo 37:4, 5) Ke “‵talo faeloa,” kae fakatuanaki me e mafai ne ‵tou Tamana alofa faka-te-lagi o fesoasoani atu ki a koe ke kufaki i mea faiga‵ta katoa.—Loma 12:12.

¹⁸ Akai atu ki a Ieova ke fesoasoani atu tena agaga tapu ke fakamalosi aka ne koe a te filemu i loto i te fale. (Epelu 12:14) Ao, e mafai eiloa o fakamalosi aka a tulaga filemu kolā e mafai o oko fakamuli atu ki loto o tino sē tali‵tonu i te kāiga. Ka maua eiloa ne koe a te fiafia mo te filemu o te loto mo te mafaufau māfai e “fai a mea katoa mō te vikiga o te Atua.” (1 Kolinito 10:31) I taumafaiga katoa konei, ko oko eiloa i te fakamalosi loto ke iloa atu me e ‵lago atu ou taina mo tuagane i te fakapotopotoga Kelisiano ki a koe mo te loto a‵lofa!

[Fakamatalaga fakaopoopo]

[Ata i te itulau e 30]

Filifili aka te taimi tonu ke fakamatala atu ou talitonuga

[Ata i te itulau e 31]

Saga tonu atu ki avaga sē tali‵tonu