Ke Akoako Atu i se Auala Faigofie
1. Se a te feitu tāua e tasi o te faiga o akoakoga ma‵nino kae ma‵goi?
1 A te auala faigofie se mea tāua e tasi i te faiga o akoakoga ma‵goi. A te mafaufau ki te auala ne akoako atu ei a te Faiakoga Sili, ko Iesu, e mafai o fesoasoani mai ke momea aka te ‵tou apo i te “akoako atu.”—2 Timo. 4:2; Ioane 13:13.
2. Ne a mea e aofia i te akoako atu i se auala faigofie, kae ne a ikuga o te vaegā akoakoga penā?
2 Ke Faipati Atu i se Auala Faigofie: E aofia i te Lauga i luga i te mauga a nisi muna‵tonu tafasili i te ‵loto kolā e seki faipati mai aka eiloa muamua ne se tino, kae ne fakamatala mai katoa i se auala faigofie. (Mata., mata. 5-7) A te vaitino kolā ne fakalogo‵logo atu ki a Iesu ne “ofo masei . . . i ana akoakoga.” A ofisa kolā ne uga atu ke puke fakapagota mai a ia ne fakaosofia ke fai mai: “E seki iai eiloa se tagata ne faipati pelā mo te tagata tenei.” (Mata. 7:28, 29; Ioane 7:46) E se ‵tau o fakaaoga ne tatou a pati ‵gali, fuaiupu faiga‵ta, io me ko tala fakatusa likiliki ke fakatalitonu atu ei te munatonu ki nisi tino. E mafai eiloa o fakamatala atu a te munatonu i se auala manino mai i te fakaaogaga o tugapati masani.
3. Kaia e ma‵nako ei a nisi tino ke tuku atu a fakamatalaga e uke, kae e mafai pefea o ‵kalo keatea mai te mea tenei?
3 Ke Fakaiku Aka a te Uke o Fakamatalaga e ‵Tau o Fai Atu: Ne mafaufau a Iesu ki ana tino fakalogo‵logo ke fakaiku aka ei a te uke o fakamatalaga ke fakaasi atu ki a latou i te taimi e tasi. (Ioane 16:12) E ‵tau o iloa kae fakafetaui aka ‵tou fakamatalaga ki manakoga o tino e fai‵pati atu tatou ki ei, maise eiloa māfai ko talai atu tatou ki kāiga, tino fia‵fia ‵fou, io me ko tama‵liki. E ‵tau o fakaeteete tatou ke mo a ma tō uke a fakamatalaga e tuku atu ne tatou ke oko foki eiloa māfai e foliga mai me ko oko eiloa te fakalogo‵logo mai o latou. A tino loto fakamaoni ka tumau eiloa i te taumafai ke iloa ne latou a te Atua tonu e tokotasi, ko Ieova.—Ioane 17:3; 1 Koli. 3:6.
4. Kaia e aoga ei ke saga tonu atu fua ki manatu tāua i lō fakamatalaga likiliki?
4 Ke ‵Saga Tonu Atu ki Manatu Tāua: Ne seki faka‵numi atu a akoakoga a Iesu mai i te aofia ne ia o fakamatalaga kolā tō uke. I te taimi ne fai atu ei a ia: “Latou katoa kolā e i loto i tanuga, . . . ka ulu mai ei latou ki tua,” e se ko te taimi tenā ke tuku atu a fakamatalaga e uke e uiga ki fakamoemoega e lua o tino kolā e toe‵tu. (Ioane 5:28, 29) I te taimi e fai ei a akoga faka-te-Tusi Tapu, e ‵tau o ‵saga tonu atu tatou ki manatu tāua kae ke ‵kalo keatea mai i te tukuatuga o fakamatalaga kolā e se aofia i te mataupu ke sau‵tala ki ei.
5. Se a te fakamanuiaga e mafai o maua ne tatou māfai e akoako atu i se auala faigofie?
5 Ko oko eiloa i te ‵tou fia‵fia me e akoako mai ne Ieova i se auala faigofie a mea katoa kolā e ‵tau o iloa ne tatou! (Mata. 11:25) Ke na fai foki tatou penā mai i te akoako atu i se auala faigofie kae ke maua a te fiafia i te uke o fuataga e maua mai i te galuega talai.