E ‵Tau mo Tino Katoa o ‘Puke ‵Mau ki te Muna mo te Loto Fia‵fia’!
1 E lau i miliona o tino e suke‵suke ki te Tusi Tapu fakatasi mo Molimau a Ieova. Ko te mea ke maua te ola se-gata-mai, e ‵tau mo latou o ‘puke ‵mau ki te muna mo te loto fia‵fia,’ kae tenā eiloa te mea ne fai ne te toko 3,000 tino kolā ne sala‵mo kae papatiso i te Penitekoso 33 T.A. (Galu. 2:41) Kae se a te galuega e ‵tau o fai ne tatou i aso nei?
2 E ‵tau o fesoasoani atu tatou ki ‵tou akoga faka-te-Tusi Tapu ke fakamalosi aka latou ki te taviniga ki a Ieova. (1 Timo. 4:7-10) I te ‵Tou Galuega Talai i a Iuni i te 1996, mataupu fakaopoopo mo te palakalafa e 20, e fai mai penei: “I te sukesukega kātoa, onoono ki avanoaga ke ati aka a te amanaia o te tino akoga mō uiga o Ieova fakaasi atu ou lagonaga ‵loto eiloa mō te Atua. Fesoasoani atu ki te tino akoga ke mafaufau e uiga ki te atiakaga o se fesokotakiga totino ‵lei mo Ieova.”
3 Te Mea Faigata e Fakafesagai mo Tatou: A te tokoukega o tino ko ‵mau i olotou mafaufau a akoakoga a lotu ‵se, telā ko lotoma‵lie fua latou ki vaegā tapuakiga kolā e mu‵tana fua olotou taimi mo malosi e fakamāumāu ki ei kae seai ne ‵fuliga e lavea atu i olotou olaga. (2 Timo. 3:5) A te mea faigata telā e fakafesagai tatou ki ei ko te fesoasoani atu ki ‵tou akoga faka-te-Tusi Tapu ke lavea ne latou me e uke atu a mea e aofia i te tapuakiga tonu i lō te fai fua pelā mo tino kolā e fakalogo‵logo ki te Muna a te Atua. E ‵tau o fakagalue ne latou olotou mea e tauloto i olotou olaga. (Iako. 1:22-25) Kafai e maua aka ne latou me isi ne olotou amioga kolā e se fetaui mo mea e manako ki ei te Atua, e ‵tau o iloa ne latou te lotou tiute ko te mea ke “‵fuli mai” kae fai te mea tonu mo te mea telā e fakafiafia atu ki te Atua. (Galu. 3:19) Ke maua ne latou te ola se-gata-mai, e ‵tau o ‘fakapalele olotou mafi’ kae tumau takitaki i te mea tonu.—Luka 13:24, 25.
4 Kafai e sau‵tala ki mea tau amioga, ke fesili atu ki tau akoga faka-te-Tusi Tapu me se a tena kilokiloga ki vaegā amioga penei kae ne a foki a ‵fuliga e manakogina ke fai ne ia i tena olaga. Ke fakaasi atu ki a ia a mea kolā e fai i te fakapotopotoga saukātoa i te taimi e suke‵suke ei koulua ki te munatonu kae fakamalosi atu ke kau atu faeloa ki fakatasiga.—Epe. 10:25.
5 Ke fai pelā me se fakamoemoega o tatou ke fakaoko atu ‵tou akoakoga ki te loto o te tino akoga. Ka fia‵fia eiloa tatou māfai e fakamalosi atu ne tatou a tino ‵fou ke puke ‵mau ki te muna a te Atua mo te loto finafinau kae papatiso!—1 Tesa. 2:13.