Ke na Fakaasi Atu ‵Tou Loto Fakafetai Ke Fai te Fakamanatuga i te po 17 o Apelila
1. Ne a lagonaga o te faisalamo kolā e fetaui ‵lei ki te vaitaimi o te Fakamanatuga?
1 Ona ko te loto fiafia ki faifaiga e uke o te alofa o Ieova mo tena faka‵saoga, ne fesili atu ei te faisalamo: “Se a taku mea ka avatu ma te Aliki mo taui atu tena aga‵lei ki a au?” (Sala. 116:12) I aso nei, e uke atu a pogai e maua ei ne tavini a te Atua a te loto fiafia. I te fia o senitenali mai tua o te tusiga o pati fakaosofia konei, ne tuku mai ne Ieova ki tino a te ‵toe meaalofa sili—ko te togiola. I te taimi e fakatoka ei tatou ke fakamanatu a te mate o Keliso i te po 17 o Apelila, e maua ne tatou se pogai ‵lei ke fakaasi atu ‵tou loto fakafetai.—Kolose 3:15.
2. Ne a nisi pogai e loto fakafetai ei tatou ki te togiola?
2 Fakamanuiaga Mai i te Togiola: E auala i te togiola, ko mafai ei “o fakamagalogina foki o ‵tou agasala.” (Kolose 1:13, 14) E fai ne te mea tenei ke mafai ei o tapuaki atu tatou ki a Ieova mo se loto lagona ‵ma. (Epe. 9:13, 14) E mafai o ‵lei ‵tou lagonaga māfai ko fai‵pati atu tatou ki a Ieova i te ‵talo. (Epe. 4:14-16) A latou kolā e fakatuanaki ki te togiola e maua eiloa ne latou te fakamoemoega ki te ola se-gata-mai!—Ioane 3:16.
3. E mafai pefea o fakaasi atu ne tatou te ‵tou loto fakafetai ki a Ieova mō te togiola?
3 Ke Fakaasi Atu te Loto Fakafetai: A te auala e tasi ke fakaasi atu ei ‵tou loto fakafetai ko te mafau‵fau ki tusi fai‵tau i te Tusi Tapu mō te Fakamanatuga i aso takitasi kae mafau‵fau ‵loto ki ei. A te mataupu i te Watchtower i a Fepuali 1, 2011, telā e fakaulutala penei “Are You Prepared for the Most Important Day of the Year?” ne fakatoka eiloa ke fesoasoani mai ki a tatou i te feitu tenei. E mafai foki o fai atu tatou mai i ‵tou loto ki a Ieova a te lasi o te fakatāua ne tatou a te togiola. (1 Tesa. 5:17, 18) A te ‵tou ‵kau atu ki te faiga o te Fakamanatuga i te ‵tou faka‵logo ki te fakatonuga a Iesu e fakaasi atu ei a te loto fakafetai. (1 Koli. 11:24, 25) E se gata i ei, e mafai o fakaakoako atu tatou ki te alofa lasi o Ieova kae ‵kami atu a tino e tokouke e mafai ne tatou ke ‵kau fakatasi mo tatou.—Isa. 55:1-3.
4. Se a te fakaikuga e ‵tau o fai ne tatou?
4 Ka se mafau‵fau a tavini loto fakafetai a Ieova ki te Fakamanatuga e pelā me ko te suā fakatasiga fua. Ko te ‵toe fakatasiga tāua eiloa i te tausaga! I te taimi ko pilipili mai ei a te Fakamanatuga, ke na ‵pau eiloa ‵tou fakaikuga mo te mea telā ne tusi mai ne te faisalamo: “Toku agaga, tavae atu ki te Aliki [ko Ieova], kae sa puli foki te lasi o tena alofa.”—Sala. 103:2.