“Ke Fai Faeloa te Mea Tenei” Se Fakamanatuga Telā e ‵Tau o Fai i a Apelila Po 5

1. Kaia e tāua ei a te Fakamanatuga?

¹ “Ke fai faeloa te mea tenei mo fai se fakamasauāga ki a au.” (Luka 22:19) Mai i pati konā, ne fakatonu atu ei a Iesu ki ana soko ke fakamanatu tena mate e pelā me se tāulaga. Ona ko mea katoa kolā ne fakataunu ne te togiola, e seai aka foki eiloa se isi aso e sili atu te tāua io me ko te gali mō Kelisiano i lō te aso o te Fakamanatuga i tausaga katoa. I te taimi ko pilipili atu ei ki te fakamanatuga i te tausaga tenei i a Apelila po 5, e mafai pefea o fakaasi atu ne tātou te ‵tou loto fakafetai ki a Ieova?—Ko. 3:15.

2. E mafai pefea o fakaasi atu ne tātou a te loto fakafetai mō te Fakamanatuga e auala i te faiga o sukesukega mo te mafaufau ‵loto ki ei?

² Fakatoka: E masani o fakatoka tātou ki mea kolā e mafau‵fau tātou me e tāua. E mafai o fakatoka ‵tou loto mō te Fakamanatuga mai i te mafau‵fau ki mea ne ‵tupu i aso fakaoti o Iesu i te lalolagi kae mafaufau ‵loto ki ei, e pelā me se kāiga. (Esela 7:10) E mafai o maua a te fakasologa o nisi tusi fai‵tau i te kalena mo te tamā tusi ko te Ke Sukesuke ki te Tusi Tapu i Aso Katoa.

3. E mafai pefea o fakaasi atu ne tātou ‵tou loto fakafetai ki te Fakamanatuga mai i te momea aka o ‵tou mea e fai i te galuega talai?

³ Talai Atu: E mafai foki o fakaasi atu ‵tou loto fakafetai mai i te ‵kau kātoatoa atu ki te galuega talai. (Luka 6:45) A te galuega fakapito i te lalolagi kātoa ke ‵kami atu a nisi tino ki te Fakamanatuga ka kāmata eiloa i te Aso Ono, i a Mati po 17. E mata, e mafai o fai a ‵fuliga ki te fakasologa o au mea e fai ko te mea ke momea aka te uke o taimi e fakamāumāu ne koe i te galuega talai, kāti e pelā me se paenia lagolago? Kaia e se sau‵tala ki te mea tenā i te taimi e fai ei te suā Tapuakiga a Kāiga a koutou?

4. Ne a mea aogā e mafai o maua ne tātou mai i te ‵kau atu ki te Fakamanatuga?

⁴ E maua pefea ne tātou a mea aogā mai i te ‵kau atu ki te Fakamanatuga i tausaga takitasi! E momea aka ei ‵tou a‵lofa ki te Atua i te taimi e mafau‵fau ei tātou ki te kaimalie o Ieova i te tukumaiga o tena Tama fagasele eiloa e tokotasi e pelā me se togiola. (Ioa. 3:16; 1 Ioa. 4:9, 10) E fakamālosi aka tātou ne te mea tenei ke se toe ola mō tātou eiloa. (2 Koli. 5:14, 15) E fakamālosi aka foki i ei ‵tou manakoga ke tavae atu ki a Ieova i mua o tino. (Sala 102:19-21) A te ‵tonuga loa, e olioli malosi eiloa a tavini loto fakafetai a Ieova ki te avanoaga ka maua ne tātou i te Fakamanatuga i a Apelila po 5 ke ‘folafola atu te mate o te Aliki.’—1 Koli. 11:26.