E Mata, a Koe se Paenia Tumau Muamua?
1. Se a te tauliaga ne maua ne tino e tokouke, kae se a te mea ne mafai o fai ne nisi tino?
1 I te fia o tausaga, ne maua eiloa ne te fia afe o tino a te tauliaga gali ke “akoako atu kae lauga atu” a te tala ‵lei e pelā me ne faifeau talai tumau. (Galu. 5:42) Kae ne ‵tau o taofi aka ne nisi tino a te galuega fakapaenia ona ko pogai kese‵kese. Kafai ne paenia tumau muamua koe, e mata, ko oti ne iloilo aka ne koe ou fakanofonofoga nei ke lavea aka ei me ko mafai o toe kau atu koe ki te galuega fakapaenia?
2. Kaia e ‵tau ei o toe mafau‵fau a tino kolā ne paenia muamua ki olotou fakanofonofoga i aso nei?
2 Ko ‵Fuli a Fakanofonofoga: Kāti ko galo atu a te tulaga telā ne fakagata ei tau galuega fakapaenia. E pelā mo te fakagataga o tau paenia me ko se mafai ne koe fakakātoa a itula e 90 i te masina, e mata, ko mafai nei o toe faka‵soko tau paenia me ko oti ne tuku ifo ki lalo a te aofaki o itula ki te 70? E mata, ko mu‵tana ifo a mea e manakogina ke fai i tau galuega ‵togi io me ko tiute faka-te-kāiga i lō te taimi ne tiakina ei ne koe te galuega fakapaenia? E tokotasi te tuagane ne taofi aka tena paenia ona ko tena fakamasakisaki, ne mafai o toe faka‵soko tena paenia i te taimi ko 89 ei ana tausaga. Ne seki faulu a ia ki te fa‵kaimasaki mō se tausaga kae ne mafaufau a ia me ko mafai ne ia o toe paenia!
3. E mafai pefea ne tino i te kāiga o ga‵lue fakatasi ke fesoasoani atu ki se tino ke paenia?
3 Kāti e seki paenia aka eiloa koe, kae ne taofi aka ne se tino i tou kāiga tena galuega fakapaenia ke tausi atu ki se tino i te kāiga, e pelā me se mātua ko matua ‵ki. (1 Timo. 5:4, 8) Kafai e penā loa, e mata, e mafai ne koe io me ko nisi tino i te kāiga o fesoasoani atu ki te tino telā ne taofi aka tena galuega fakapaenia? Kaia e se sau‵tala fakatasi ei ki mea konā? (Faata. 15:22) Kafai e ga‵lue fakatasi a tino i te kāiga ko te mea ke mafai o paenia se tino e tokotasi i a latou, ko oko eiloa i te tāua o mea e fai ne tino katoa i ei.
4. Kae e a māfai e se mafai ne koe o toe kau atu ki te galuega fakapaenia i te taimi tenei?
4 Ke mo a ma loto vāivāi koe māfai e seki mafai eiloa o toe paenia koe ona ko ou fakanofonofoga nei. A tou toka o iloilo aka ou fakanofonofoga e fakafiafia atu ki a Ieova. (2 Koli. 8:12) Ke fakaaoga a atamai ne maua ne koe e pelā me se paenia i tau galuega i te vaitaimi nei. Ke na ‵talo atu eiloa e uiga mō tou manakoga tenā, kae ke matapulapula ki avanoaga ke fakama‵fuli ou fakanofonofoga. (1 Ioane 5:14) Kāti e se leva, ka ‵tala mai ei ne Ieova ki a koe ‘a avanoaga e uke’ ko te mea ke toe mafai o maua ne koe a te fiafia i te fai mo fai se paenia tumau!—1 Koli. 16:9.