“E Gali Māfai Koe e Paenia!”

1. E pefea a lagonaga o se tuagane e uiga ki tena taviniga e pelā me se paenia?

¹ “E seai aka foki eiloa se isi galuega e mafai o maua ne au i ei a te lotomalie katoatoa io me maua ne au a mea ‵gali faka-te-agaga mai i ei.” Konā eiloa a pati ne fai mai ne Kathe B. Palm. Ne fai a ia e pelā me se paenia i te fia sefulu tausaga kae ne talai mai te feitu e tasi o Chile, i Amelika ki Saute ke oko atu ki te suā feitu. Kafai e mafaufau ki te olaga gali o latou kolā e ga‵lue i te taviniga tumau, kāti ko oti ne fai atu se tino ki a koe penei: “E gali māfai koe e paenia!”

2. Fakamatala mai te pogai e maua ei te lotomalie katoatoa mai te aofia malosi i galuega faka-te-agaga.

² Se Olaga Fakamalie Loto: Ne maua eiloa ne Iesu, te tino telā e fakaakoako tatou ki ei, a fakamalosiga aoga mai te faiga o te loto o tena Tamana. (Ioane 4:34) Tela la, ne akoako atu ne Iesu ana soko mo te loto fakamaoni me i te lotomalie katoatoa e maua fua mai te aofia i galuega kolā e isi se lotou sokoga ki te tapuakiga a Ieova. E lotoma‵lie eiloa tatou māfai e faka‵fonu ‵tou olaga ki galuega kolā e maua i ei te taliaga a Ieova. E se gata i ei, kafai e uke atu ‵tou taimi, malosi mo kope e fakaaoga ke fesoasoani atu ki nisi tino, ka lasi foki te fiafia e maua ne tatou.​—Galu. 20:31, 35.

3. Se a te fiafia e mafai o maua ne tatou mai te fakamāumāuga o taimi e uke i te galuega talai?

³ Ko te uke o taimi e fakamāumāu ne tatou i te galuega talai, ko te uke foki o avanoaga ke maua ne tatou te fiafia ona ko te faiga o akoga faka-te-Tusi Tapu. Kafai ko momea aka te atamai mo te apo o tatou i te faiga o te galuega talai, ka mafai o mafuli te ‵tou kilokiloga ki te ‵tou koga talai, ke oko foki eiloa ki koga talai kolā e se fia ‵saga malosi mai i ei a tino. E mafai o fakaaoga ne paenia a mea katoa ne tauloto ne latou mai te Akoga mō Paenia māfai ko oti ne paenia latou mō se tausaga e tasi. (2 Timo. 2:15) Kafai e loto ‵mau eiloa tatou, e mafai ne tatou o ‵toki a fuaga o te munatonu kolā ka ‵fua mai fakamuli.​—Fai. 11:6.

4. Ne a mea e ‵tau o mafaufau faka‵lei ki ei a talavou kolā ko pili o oti olotou akoakoga?

4 Talavou: I te taimi ko fakaotioti ei au akoakoga, e mata, ko oti ne mafaufau koe ki tou olaga i aso mai mua? Ke oko mai ki te taimi nei, e uke eiloa ou taimi e fakaaoga ki te faiga o mea a‵koga. Ne a mea ka fai ne koe ki taimi konā māfai ko oti au akoakoga? I lō te kausaki atu ki galuega ‵togi, kaia e se fai ei a te kausaki atu ki te taviniga faka-paenia e pelā me se mea ke fakamoemoe ki ei? A mea kolā ka tauloto ne koe​—te talai atu ki tino kolā ne ‵tupu aka i koga kese‵kese, te fakafesagai atu ki ou fakalavelave totino, te atiakaga o te loto pulea, e pelā foki mo te apo i te akoako atu​—ka aoga eiloa ki a koe i tou olaga kātoa.

5. E mafai pefea ne mātua e pelā foki mo te fakapotopotoga o fakamalosi aka te galuega paenia?

⁵ Mātua, e mata, e fai otou tusaga i te fesoasoani atu ki otou tama‵liki ke kausaki atu ki te taviniga tumau? Ka fesoasoani atu eiloa otou pati mo otou fakaakoakoga ‵lei ke fakamuamua ne latou a mea o te Malo. (Mata. 6:33) Ne fai mai a Ray, telā ne kamata o fai e pelā me se paenia i te otiga o ana akoakoga: “Ne iloa ne toku mātua me i te fai pelā me se paenia ka maua mai i ei te ‵toe olaga fakamalie loto.” E mafai o fakamalosi aka ne tino katoa i te fakapotopotoga a te faiga o te galuega faka paenia e auala i olotou pati mo te lotou ‵lago malosi atu. E fai mai a Jose, mai Sepania, penei: “Ne ‵kilo atu taku fakapotopotoga ki te galuega fakapaenia e pelā me ko te ‵toe galuega ‵lei eiloa mō talavou. Ne fai eiloa a olotou pati fakamalosi mo te lotou loto fakafetai ki te galuega fakapaenia fakatasi mo te lotou fesoasoani ke faigofie te kamataga o taku galuega fakapaenia.”

6. Ne a mea e mafai o fai ne tatou māfai e se fia paenia tatou?

⁶ Te Manumalo i Fakalavelave: Kae pefea la māfai e fai mai koe, penei, ‘Au la e se fia paenia.’ Kafai konā eiloa ou lagonaga i te taimi muamua, ke ‵talo ki a Ieova e uiga ki ou lagonaga konā kae fai atu, ‘E se iloa ne au me e ‵tau au o paenia io me ikai, kae e manako au o fai a te mea telā e fiafia koe ki ei.’ (Sala. 62:8; Faata. 23:26) Ko ‵sala ei koe ki tena takitakiga e auala i tena Muna mo tena fakapotopotoga. E tokouke a paenia tumau ne kamata o “tami” ki te paenia mai te fai pelā me ne paenia lagolago, kae ne fakamalosi atu a te fiafia telā ne maua ne latou ke kausaki atu ki se galuega i te taviniga tumau.​—Sala. 34:8, NW.

7. E mafai pefea o manumalo tatou i manatu fakalotolotolua e uiga ki te mauaga o itula e 70?

⁷ Kae e a, māfai e se mautinoa i a koe me e mafai o katoa ou itula e 70 io me ikai? Kaia e se faipati atu ei koe ki paenia kolā e tai ‵pau olotou fakanofonofoga mo koe? (Faata. 15:22) Ka oti ko tusi ei ne koe ki lalo a fakatokaga kolā e mafai o ‵tofo aka ne koe. E mafai o iloa aka ne koe me se mea faigofie fua ke fakaaoga a taimi kolā ne fakaaoga ke fai ki ei a nisi mea ki te faiga o te galuega talai.​—Efe. 5:15, 16.

8. Kaia e ‵tau ei o iloilo aka faeloa ne tatou a ‵tou fakanofonofoga?

⁸ Ke Iloilo Aka Ou Fakanofonofoga: E mafuli‵fuli faeloa a fakanofonofoga o tino. Se mea ‵lei ke toe iloilo ou fakanofonofoga i taimi kese‵kese. E pelā me se fakaakoakoga, e mata, ko pili koe o litaea mai tau galuega ‵togi? Ne fai mai a Randy, telā ne litaea vave, penei: “Ne fai ne taku fakaikuga tenei ke mafai o paenia fakatasi au mo taku avaga, kae ne maua foki i ei ne māua te avanoaga ke olo atu o tavini i se koga telā e manakogina i ei a tino talai o te Malo. Ko oti ne maua ne au a fakamanuiaga e uke ona ko taku fakaikuga, kae ko te ‵toe fakamanuiaga sili eiloa ko te mauaga o se loto lagona ‵lei.”

9. Ne a mea e ‵tau o mafaufau faka‵lei ki ei a taki tauavaga?

⁹ Mai tua o iloiloga kolā ne fai faka‵lei ne lāua, ko oti ne iloa aka ne nisi tauavaga me e se manakogina ke ga‵lue tumau lāua tokolua i se galuega ‵togi. E tonu, ka manakogina i ei ke fakafaigofie ne te kāiga te lotou olaga, kae ka aoga eiloa ke fai penā. Ne fai mai a Ioane, telā ne fatoa tiaki ne tena avaga a tena galuega ‵togi ko te mea ke mafai o uke atu ana mea e fai i te galuega talai, penei: “E seai eiloa se isi lagonaga e sili atu i te gali ke iloa atu me i taku avaga e aofia malosi i te faiga o mea faka-te-agaga i te aso kātoa.”

10. Ne a mea e fakamalosi atu ki Kelisiano ke mafau‵fau ki te galuega fakapaenia?

¹⁰ Se Fakaasiga o te Alofa mo te Fakatuanaki: Ko oti ne fai ne Ieova a te galuega talai e pelā me ko te ‵toe galuega tāua eiloa ke mafai o fai ne so se tino i a tatou. Ko pili fua o fakamasei atu a te olaga tenei, kae ko tino fua kolā e ka‵laga ki te igoa o Ieova ka ‵sao. (Loma 10:13) A te loto telā e ‵fonu i te alofa mō ia e pelā foki mo te loto fakafetai ki mea ko oti ne fai ne ia mō tatou ka fakamalosi aka ei tatou ke faka‵logo ki te fakatonuga ne tuku mai ne tena Tama ke talai atu mo te loto finafinau. (Mata. 28:19, 20; 1 Ioane 5:3) E se gata i ei, a te loto talitonu me ko ‵nofo atu tatou i aso fakaoti ka fakamalosi aka ei tatou ke fai so se mea e mafai ne tatou o fai i te galuega talai a koi maua se avanoaga, i lō te fakaaoga katoatoa ne tatou a te lalolagi.​—1 Koli. 7:29-31.

11. E ‵tau o ‵kilo atu pefea tatou ki se tino telā e fai mai me e gali māfai e paenia koe?

¹¹ A te fai pelā me se paenia tumau e se ko te talia fua ne koe a te fakamolemole a te fakapotopotoga ke fakaaoga a itula e uke i te galuega talai; kae se fakaasiga tenā o tou tuku katoatoa atu ki te Atua. Tela la, kafai e fai atu se tino ki a koe me e gali ma paenia koe, kilo atu ki ei e pelā me ne pati fakamalosi. Ko ‵talo ei koe kae mafaufau ‵loto e uiga ki tou kau atu ki a latou kolā e aofia i te faiga o te galuega fakamalieloto tenei.

[Fakamatalaga o te Ata i te itulau e 4]

Mātua, e mata, e fai ne koe tou tusaga i te fesoasoani atu ki au tama‵liki ke kausaki atu ki te taviniga tumau?

[Fakamatalaga o te Ata i te itulau e 5]

Ko oti ne fai ne Ieova a te galuega talai e pelā me ko te ‵toe galuega tāua eiloa ke mafai o fai ne so se tino i a tatou.