Ka Tuku Atu i ei se Molimau Sili

1. I tafa o te lauga, se a te suā mea e mafai o ofo i ei a tino ‵fou i te Fakamanatuga? Fakamatala mai.

¹ Māfea? I te po o te Fakamanatuga. E manakogina a taumafaiga e uke ke ‵kami atu a tino ke ‵kau mai ki a tatou. A mea e lagona ne tino ‵fou e se ko te mea fua e tasi e fai ei ke ofo latou. Mai tua o te kauatuga ki te Fakamanatuga, ne tavae ne se fafine tokotasi se mea fakapito ne lavea ne ia—ko te mata fia‵fia o tino katoa mo te gali, te ‵ma o te fale telā ne faite kae tausi ne tino ga‵lue fakavolenitia. Tela la, a tatou katoa, e se ko te failauga fua, e tuku fakatasi atu ne tatou se molimau i te ‵toe taimi tāua eiloa tenei o te tausaga.—Efe. 4:16.

2. E mafai pefea o tuku atu ne tatou taki tokotasi se molimau ki tino ‵fou?

² Ke Fakatalofa Atu mo te Atafai ki Tino ‵Fou: A te ‵tou fakamisikata atu mo te fakatalofa atu mo te mata fia‵fia ki tino ‵fou ka tuku atu i ei se molimau. (Ioane 13:35) Kafai foki eiloa e se mafai ne koe o faipati atu ki tino katoa, e mafai eiloa o taku atu tou igoa ki tino kolā e pili atu ki a koe. (Epe. 13:1, 2) Ke matapulapula koe ki tino kolā e foliga mai e se iloa ne latou so se tino. Kāti ne maua ne latou se ‵kamiga i te taimi ne fai ei te galuega fakapito. E mafai o fesili atu koe, “E mata, tenei eiloa te taimi muamua ke kau mai koe?” ‵Kami atu ke saga‵saga fakatasi koutou, kae tuku atu se tali ki so se fesili e mafai o ‵sili mai ne latou. Kafai e ‵tau o olo fakavave atu tau fakapotopotoga ko te mea ke fakaaoga ne te suā fakapotopotoga a te koga tenā, e mafai ne koe o fai atu: “E fia iloa ne au me ne a ou mafaufauga e uiga ki te polokalame. E mata, e isi se auala e mafai o fesokotaki atu ei au ki a koe?”

3. E mafai pefea o talia ne tatou mo te fia‵fia a tino vāi‵vai?

³ Ke Talia mo te Fiafia a Tino Vāi‵vai: E seai se fakalotolotolua me ka ‵kau mai foki a tino talai kolā ko vāi‵vai, e aofia i ei a tino kolā ne taofi aka te lotou ‵kau mai ki te fakapotopotoga, kae na ko te lotou ‵kau mai ki te Fakamanatuga i tausaga katoa. Ke talia mo te fiafia a latou, kae ke fakailoa atu me e fiafia tonu eiloa koe ke lavea atu latou. (Loma 15:7) E mafai o toe āsi fakavave atu fakamuli a toeaina ki olotou fale ke fakamalosi aka latou ke toe ‵kau mai ki te fakapotopotoga. E ‵talo eiloa tatou ke fakamalosi aka a tino e tokouke kolā e ‵kau mai ke se tavae atu fua ki te Atua ona ko mea e lagona ne latou kae ona foki ko mea e lavea ne latou ‘a ikuga o ‵tou amioga ‵lei.’—1 Pe. 2:12.