Ke Fakatalofa Atu ki a Latou!
1. Se a te taimi e maua ei se avanoaga tafasili i te ‵lei ke tuku atu se molimau, kae kaia?
1 E seai aka foki se taimi e tuku mai i ei se avanoaga ‵lei ke tuku atu se molimau i lō te vaitaimi o te Fakamanatuga i te tausaga. Mafaufau ki te mea tenei: E fakamoe‵moe eiloa me ka silia atu i te sefulu miliona o tino ‵fou ka ‵kau atu ki te Fakamanatuga kae ke fakalogo‵logo ki fakaasiga sili e lua o te alofa e auala i te togiola. (Ioa. 3:16; 15:13) Ka tauloto latou e uiga ki fakamanuiaga ne mafai o maua ne latou ona ko te meaalofa a Ieova. (Isa. 65:21-23) Kae e se ko te failauga fua telā ka tuku atu ne ia se molimau i te taimi tenei. Ka maua foki ne latou katoa kolā e ‵kau atu a te avanoaga ke tuku atu se molimau sili mai i te fakatalofa atu mo te alofa ki tino ‵fou.—Loma 15:7.
2. E mafai pefea o fakatalofa atu mo te alofa ki tino ‵fou?
2 I lō te ‵sala atu fua ki tou nofoaga kae sagasaga filemu i ei ke oko ki te taimi e kamata ei te polokalame, kaia e se fanatu ei koe o fakatalofa ki tino kolā e ‵nofo ‵pili atu ki a koe? E mafai o manava‵se a tino ‵fou kae e se iloa ne latou me ne a olotou mea e ‵tau o fai. A te fakamisikata mo te fakatalofa atu ka fai ei ke tokagamalie a lagonaga o latou. Ke salasala ki tino kolā ne ‵kau atu ona ko te pepa ‵kami, kae mafai o fesili atu koe me e mata, tenei eiloa tena taimi muamua ke kau mai ki se fakatasiga a tatou io me e mata e masani a ia mo se tino i loto i te fakapotopotoga. Kāti e mafai o ‵kami ne koe a ia ke saga‵saga fakatasi koulua kae fakaaoga tasi a tau Tusi Tapu mo te tusi pese. Kafai ko ‵lei ke fakaaoga te Kingdom Hall, e mafai ne koe o fakamatamata malie atu a ia i ei. Mai tua o te lāuga, ke fakaavanoa ne koe a koe eiloa ke tali aka ana fesili. Kafai e ‵tau o olo fakavave atu tau fakapotopotoga ko te mea ke avanoa mō te suā fakapotopotoga, e mafai ne koe o fai atu: “Ko oko eiloa i te fia iloa ne au ou mafaufauga e uiga ki te polokalame. E mata, e isi se auala e mafai o fesokotaki atu au ki a koe?” Ko fai ei a fakatokaga ke toe foki atu ki te tino fiafia. Ka ma‵nako malosi eiloa a toeaina ke matapula‵pula latou o fakamalosi atu a tino talai vāi‵vai kolā ne ‵kau atu.
3. Kaia e tāua ei ke gasue‵sue muamua tatou o fakatalofa atu ki tino ‵fou i te Fakamanatuga?
3 Mō tino ‵fou e tokouke, tenei eiloa te taimi muamua ke maua ne latou se lagonaga fiafia, filemu, mo te fealofani i te palataiso faka-te-agaga telā e maua ne tatou e pelā me ne tino o Ieova. (Sala. 29:11; Isa. 11:6-9; 65:13, 14) Se a te kilokiloga ka maua ne tino ‵fou? E fakalagolago eiloa a te ukega o mea ki te ‵tou gasue‵sue muamua o fakatalofa atu ki a latou.