Aso e Tolu o Fakamalosiga Faka-te-Agaga
1. Ka aoga pefea ki a tatou a te fono i te atufenua mō te tausaga tenei?
1 I te lalolagi a Satani e aunoa mo fakamalosiga faka-te-agaga, e tumau eiloa a Ieova i te fakamalosiga o ana tavini. (Isa. 58:11) A te fakatokaga e tasi e fakaaoga ne Ieova ke fakamalosi aka ei tatou ko te fono i te atufenua i tausaga katoa. I te taimi ko pilipili atu ei tatou ki te fono mō te tausaga tenei, e mafai pefea o fakatoka tatou ke maua kae tuku atu foki a fakamalosiga faka-te-agaga?—Faata. 21:5.
2. Ne a fakatokaga e ‵tau o fakaiku fakavave aka ne tatou?
2 Kafai e seki fai ne koe, ke na fakaaoga nei a taimi ke fakatoka au galuega totino mo tau galuega ‵togi ke kau atu koe ki ei i aso katoa o te fono. Kai fakagalue aka eiloa ne koe a taimi e manakogina ke faimalaga atu ki te koga e fai ei te fono i aso takitasi ko te mea ke mafai o oko vave atu koe ki ei kae ‵sala atu ki tou nofoga a koi tuai o kamata te polokalame? E mautinoa eiloa me e se ma‵nako tatou ke ‵galo i so se vaega o te ‵kaiga faka-te-agaga fakamalosi loto telā ne fakatoka ne Ieova mō tatou! (Isa. 65:13, 14) E a, ko oti ne fai au fakatokaga mō tou koga nofo e pelā foki mo te auala e fanatu ei koe ki ei?
3. Ne a manatu aoga ka fesoasoani mai ki a tatou mo ‵tou kāiga ke maua katoatoa ne tatou a mea aoga mai i te polokalame?
3 Ne a mea ka fesoasoani atu ke mafai o saga tonu atu tou mafaufau ki te polokalame? Kafai e mafai, taumafai ke lava tau moe i po takitasi o aso e fai ei te fono. Ke saga tonu atu ki te failauga. Ke ‵suke ki tusi siki katoa i tau Tusi Tapu. Ke tusi ki lalo a nai manatu tāua. Se mea ‵lei ke saga‵saga fakatasi a kāiga ko te mea ke mafai o fesoasoani atu a mātua i te tausiga o olotou tama‵liki ke ‵saga tonu atu foki. (Faata. 29:15) Kāti e mafai o sau‵tala koutou ki manatu ‵gali o te polokalame i fakaafiafi takitasi e pelā me se kāiga. Ke mafai o tumau te malosi o tou kāiga mai tua foki eiloa o te fono, e mafai o fakaaoga a taimi i te Tapuakiga a te otou Kāiga ke mafau‵fau ki manatu fakapito ke fakagalue aka ne tou kāiga.
4. E mafai pefea o fesoasoani atu tatou ki nisi tino i ‵tou fakapotopotoga ke maua ne latou a fakamalosiga faka-te-agaga?
4 Fesoasoani Atu ki Nisi Tino ke Maua ne Latou a Fakamalosiga: E ma‵nako tatou ke maua foki ne nisi tino a fakamalosiga faka-te-agaga. E mata, e isi ne tino talai ma‵tua io me ko nisi tino i te fakapotopotoga kolā e ma‵nako ki se fesoasoani ko te mea ke ‵kau atu ki te fono? E mata, e mafai o fesoasoani atu koe ki a latou? (1 Ioa. 3:17, 18) A toeaina, maise eiloa a ovasia o potukau, e ‵tau o onoono faka‵lei me e maua ne vaegā tino talai penā a te fesoasoani e manakogina.
5. Ka tufa atu pefea a pepa ‵kami ki te fono? (Ke onoono ki te pokisi i te itulau e 4.)
5 E pelā mo aso mua, i se tolu vaiaso mai mua o te ‵tou fono, ka ‵kau atu tatou ki se galuega fakapito ke ‵kami atu a nisi tino ke ‵kau mai. E ‵tau o fakatoka ne fakapotopotoga se fakamoemoega ke tufa atu a te aofaki o olotou pepa ‵kami kae ke fakaoti faka‵lei a te koga talai ki te mea e mafai ne latou o fai. A pepa ‵kami ‵toe a te kāiga i te fakaotiga o te galuega fakapito e ‵tau o avatu ki te fono ke fakaaoga i taimi seki fuafuagina e talai atu ei koe. Ka tuku mai a nisi fakamatalaga e uiga ki te mea tenei i te polokalame i te Aso Lima. A pepa ‵kami kolā e se fakaaoga ne tou kāiga i te taimi e ‵nofo atu ei i te fono e ‵tau o tuku atu ki tino fesoasoani i te taimi e ulu atu ei koutou ki te koga e fai ei a te fono. Fakamolemole, ke tausi se kopi e tasi, me ka manakogina ke onoono ki ei i te ‵toe lauga eiloa i te Aso Sa.
6. E mafai pefea o maua kae tuku atu foki ne tatou a fakamalosiga i te taimi e sau‵tala ei tatou mo ‵tou taina?
6 Fesokotakiga Fakamalosi Loto: E tuku mai ne fono a nisi avanoaga ke mafai o ‵kau fakatasi e pelā me ne Kelisiano mo te kautaina i se auala fakamalosi loto. (Sala. 133:1-3) Kaia e se taumafai muamua ei koe ‘ke fakaasi atu foki te alofa’ kae ke fakafetaui atu ki taina mo tuagane kolā e ‵kau atu mai i nisi fakapotopotoga? (2 Koli. 6:13) E mafai o fai ne koe se fakamoemoega ke iloa ‵lei ne koe se tino e tokotasi io me se kāiga fou i aso takitasi. A te malōlōga i te tutonu e tuku mai i ei se avanoaga ‵lei ke fai a te mea tenei. Tela la, ke aumai fua ne mū meakai mō te tutonu kae ke mafai o ‵kai kae sau‵tala mo nisi tino i te koga e fai ei te fono i lō te fanatu o koe ke ‵togi mai ne meakai io me kai i se fale ‵kai pili mai. E mafai o iku atu a te mea tenei ki te mauaga o se fakamanuiaga ona ko taugasoa ‵fou kae tumau.
7. Kaia e ‵tau ei o fia fesoasoani atu tatou ke ga‵lue i te fono, kae e mafai pefea o fai tatou penā?
7 Ko oko eiloa i te fakamalosi loto ke ga‵lue fakatasi mo taina tapuaki i te taviniga tapu! E mata, e mafai o fesoasoani atu koe i nisi matagaluega io me e fesoasoani atu i taimi e ‵fulu ei tau fakapotopotoga? (Sala. 110:3) Kafai e seki ai sau galuega, fakamolemole, ke na mafaufau koe o fanatu ki te Matagaluega o Tino Fesoasoani i te fono. Ko te uke o lima ko te fakafiafia kae māmā foki a te galuega.
8. I te taimi ko pilipili mai ei a te fono, se a te mea e ‵tau o fakaiku aka ne tatou, kae kaia?
8 Ko pili mai eiloa a te fono mō te tausaga tenei. Ko oko eiloa i te uke o taimi mo taumafaiga ne fakaaoga i te faiga o te polokalame mo te koga e fai a te fono ke fakamalosi loto. Ke na taumafai eiloa koe ke kau atu ki aso e tolu, kae ke toka mō mea kolā ko oti ne fakatoka ne Ieova mo tena fakapotopotoga mō koe. Ke fakaiku aka ke fakamalosi atu foki koe ki nisi tino e auala i ou uiga ‵lei, sau‵talaga fakafia‵fia, mo amioga ‵lei. Ko mafai ei o ‵pau ou lagonaga, penā foki mo nisi tino mo lagonaga o se tino e tokotasi ne kau atu ki te fono i te tausaga ko teka, telā ne tusi mai, “E se mafai eiloa o masaua ne au se isi taimi telā ne maua ei ne au se lagonaga fiafia ‵ki!”
[Caption on page 3]
E pelā mo aso mua, i se tolu vaiaso mai mua o te ‵tou fono, ka ‵kau atu tatou ki se galuega fakapito ke ‵kami atu a nisi tino ke ‵kau mai
[Caption on page 4]
Ka Ofo Atu Pefea ne Tatou a Pepa ‵Kami?
Ko te mea ke fakaoti faka‵lei a te ‵tou koga talai, e ‵tau o fakatoe‵toe fua ‵tou fakamatalaga. E mafai o fai atu ne tatou se mea penei: “Talofa. Ko ‵kau atu matou ki se galuega telā e fai i te lalolagi kātoa ke tufatufa atu a te pepa ‵kami tenei. Tenei tau kopi. Ka maua ne koe a nisi fakamatalaga i te pepa ‵kami.” A te itulau i mua o te pepa ‵kami tenei e mafai o fakamalosi aka ei a te fiafia o te tino, tela la, ke tuku atu ki te tino i te fale i se auala telā e mafai o lavea ne ia. Ke loto finafinau koe. Kafai e kau atu koe ki te tufatufaatuga i fakaotiga o vaiaso, e ‵tau foki o ofo atu a mekesini māfai e ‵lei ke fai penā.
[Caption on page 4]
Ke fakaiku aka ke fakamalosi atu foki koe ki nisi tino e auala i ou uiga ‵lei, sau‵talaga fakafia‵fia, mo amioga ‵lei