Fakamasauaga mō te Fono o te Atufenua

◼ Taimi o te Polokalame: Ka ‵tala a mataloa o te Fale Tapuaki i te 8:00 i te taeao. Ka kamata o fakatagi‵tagi a pese i te 9:20 i te taeao i aso katoa e lua. I te taimi tenā, ko ‵tau katoa mo tatou o saga‵saga i ‵tou nofoga ko te mea ke kamata te polokalame i se auala āva. Ka usu a te pese fakaoti mo te ‵talo i te 4:55 i te fakaafiafi o te Aso Ono mo te 3:45 i te fakaafiafi o te Aso Sa.

◼ ‘‵Viki Atu ki a Ieova i Pese: Ne ‵viki atu a tino o te Atua i aso mua ki a Ieova e auala i pese, kae ko fai eiloa nei a pese e pelā me se vaega tāua o te tapuakiga tonu i ‵tou aso nei. (Sala. 28:7) E kamata a vaega takitasi o te fono o te atufenua ki pese fakatagi‵tagi. A pese konei e se ne pese fua e fakatagi‵tagi mo fakalogo‵logo kae ne fakatoka eiloa ke mafai o tauloto kae tapuaki atu ki a Ieova. I te taimi e faka‵pula mai ei ne te takitaki fono me ka kamata o fakatagi‵tagi a pese, tenā foki eiloa te taimi ke saga‵saga ki ‵tou nofoaga, kae fakalogo‵logo mo te loto fia‵fia ki pese fakatagi‵tagi. Kafai e fai tatou penā e fakaasi atu ei te fakatāua ne tatou a taumafaiga ne fai ne tino ‵fatu pese i te ‵tou laumua. E fakalua taimi i te tausaga e fakaaoga ne taina mo tuagane olotou tupe totino ke faima‵laga ki Patterson, i New York, ko te mea ke faite aka ei a ‵tou pese ‵gali. Mai tua o te fakalogologo faka‵lei atu ki pese fakatagi‵tagi, ko ‵tu fakatasi ei tatou katoa ki luga o usu atu a tavaega ki a Ieova e auala i pese o te Malo.

◼ Koga Faka‵tu Mea Fakateletele: A koga kolā e faka‵tu ei a mea fakatele‵tele i taimi o fono ka seai eiloa se ‵togi. E se manakogina ke uke a mea fakateletele e faka‵tu i koga konā me foliki fua te avanoaga i ei. Ko tino fua kolā e saoloto mo tino se katoatoa ‵lei e mafai o faka‵tu olotou mea fakatele‵tele i te koga tenā.

◼ Tausiga o Nofoaga: I te taimi e ‵tala ei a mataloa o te Fale Tapuaki i te taeao, sa taumafai o fakatau‵fai mo taina mo tuagane i koga e saga‵saga ei tatou. Fakamolemole ke masaua foki ne tatou a nisi tino e auala i te fakamuamua ne tatou ‵tou taina i lō tatou. A te fakaasiatuga o te alofa sē fakapito mai te ‵saga atu ki te ‵lei o nisi tino se fakailoga me i a tatou ne Kelisiano ‵tonu kae fai ei ke faka‵malu ne tino maimoa te Atua. (Ioa. 13:34, 35; 1 Koli. 13:4, 5; 1 Pe. 2:12) E ‵tau fua o taofi aka ne koe a nofoaga mō tou kāiga io me ko tino kolā ne aumai tasi mo koe io me ko au akoga faka-te-Tusi Tapu. Fakamolemole ke sa fakalavelave ne koe a nofoaga kolā e se fakaaoga ne koe. A ‵tou ‵lago atu i te feitu tenei ka fai ei ke mafai o fakaavanoa atu a nofoaga konā ki nisi tino. E isi ne nofoaga fakapito mō tino ma‵tua penā foki mo tino sē katoatoa ‵lei. Ona me se uke a nofoaga, e manakogina fua se tino e tokotasi io me tokolua ke mafai o sagasaga fakatasi kae fesoasoani atu ki a latou.

◼ Gatu ‵Lei: E ‵tau o mata ‵lei a ‵tou gatu i te taimi o te fono, kae ke sē fakaata mai i ei a teuga fai fakaa‵tea kolā e lauiloa i te lalolagi. (1 Timo. 2:9) Kafai foki e olo atu ki te fale talimālō mo taimi e mānava ei mai mua io me mai tua o te fono, e manakogina foki loa ke fai faka‵lei ne tatou a ‵tou gatu. Kae ka fakamata‵mata foki tatou ke pei ne tatou te pine kae ke mo a e ‵ma ke talai atu māfai e maua te avanoaga. Ka se fakaasi atu fua ne tatou i ‵tou teuga mo amioga ‵lei i taimi o te fono me avatu ne tatou te fekau o fakaola tino mai te Tusi Tapu kae e avatu foki i ei ne tatou a te fiafia ki a Ieova.—Sefa. 3:17.

◼ Fakaasi Atu te Āva Māfai e Fakaaoga a Telefoni mo Nisi Mea Aka: E fakaasi atu eiloa ne tatou te āva māfai ko fai te polokalame e auala i te faiga o ‵tou telefoni mo nisi vaegā mea penā ke se fakalavelave atu ki nisi tino. Kafai e fakaaoga tau mea pei ata, mea puke fakavitio, tablet mo nisi mea aka penā, e ‵tau mo tatou o masaua ke mo a e ‵pono io me fakalavelave atu ki nisi tino. E fakaasi atu foki ne tatou te āva mai te sē lafolafo atu o fekau io me meli i te taimi e fai ei te polokalame.

◼ Te ‵Kaiga i te Fakatutonu: Fakamolemole ke pukepuke mai otou mea‵kai i lō te tiakina ne koutou a te koga e fai ei te fono i te fakatutonu. E mafai o fakaaoga a mea tausi mea‵kai fo‵liki kolā e mafai o tuku mai lalo o nofoga. A mea tausi mea‵kai ‵lasi kolā e fakaaoga sale i pikiniki mo fagu kilasi ‵lasi e tapu i loto i te koga e fai ei a te fono.

◼ Meaalofa: E mafai o fakaasi ne tatou a te ‵tou fia‵fia mai te tukuatuga o meaalofa ke ‵lago atu ki te galuega i te lalolagi kātoa i te koga telā e fai ei te fono. So se tieki telā e tuku fakameaalofa atu e ‵tau o tusi ki te “Christian Congregation of Jehovah’s Witnesses.” E mafai o fai a meaalofa e auala i te fakaaogaga o debit io me ko credit card.

◼ Vailakau Fa‵kaimasaki: Kafai e isi ne vailakau e manakogina ne koe i te taimi tenā, e ‵tau eiloa o puke atu ne koe me e seai ne vailakau e mafai o maua ne koe i te koga e fai ei te fono. A ‵suki mo nila kolā e fakaaoga ne tino sukā e ‵tau o tuku faka‵lei kae ke se ‵pei ki loto i tulamu kaiga i te koga e fai ei te fono io me i fale talimālō.

◼ Mea Puipui i Fakalavelave: Se mea ‵lei ke fakaeteete mai mea kolā e mafai o faka‵pakia ei tatou. E uke a fakalavelave i tausaga takitasi e māfua mai te fakaaogaga o taka, pelā mo taka muli loa. Se mea ‵lei ke filifili faka‵lei a vaegā taka kolā e se mafai o ‵mole ei koe māfai ko sasale i luga i se kakega mo nisi koga aka.

◼ Mea Fakalogo‵logo Kolā e Fakaaoga ne Tino ‵Tuli: Ka puke a te polokalame i te taimi e fai ei te fono. E manakogina ke puke mai au patule mo mea fakalogologo ke mafai o lagona ne koe a te polokalame.

◼ Kā Pepe mo Nofoaga o Tamaliki: E se ‵tau o avatu a kā pepe ki te koga e fai ei te fono. E mafai o fakaaoga a nofoaga konei māfai e saga‵saga i tafa o olotou mātua.

◼ Sausau: A te ukega o fono o te atufenua e fai sale i koga kolā e ‵pui kātoa. Tela la, se faiga poto ke mo a ma fakaaoga a sausau kolā e ma‵losi olotou ma‵nogi kae fai ei ke sē manava ‵lei a tino io me ko nisi fakalavelave penā.—1 Koli. 10:24.

◼ Please Follow Up (S-43) Forms: A te pepa ko te Please Follow Up e ‵tau o fakaaoga ke fakamau ei so se fakamatalaga e uiga ki so se tino fiafia ne talai koe ki ei i te taimi o te fono o te atufenua. E mafai o tuku atu a pepa kolā ko oti ne faka‵fonu ki taina kolā e tausi ne latou a tusi io me ko te failautusi o tau fakapotopotoga.

◼ Fale‵kai: Ke faka‵malu te igoa o Ieova e auala i au amioga ‵lei i fale‵kai. Fakaasi atu i ou teuga i a koe se Kelisiano. Ke tuku atu fua se tamā meaalofa māfai te mea tenei se tuu masani.

◼ Fale Talimālō:

(1) Fakamolemole ke mo a ma taofi aka ne koe a potu e uke atu i potu kolā ka fakaaoga tonu ne koe, kae e se ‵tau o tokouke a tino e ‵nofo i tou potu e ‵tusa mo te aofaki ne talia mai.

(2) Ke mo a e fakaseaoga ne koe te fakatokaga ne fai ki potu, vagana fua māfai e isi se fakalavelave tupu fakafuasei, kae ke fakailoa fakavave atu ki te fale talimālō ko te mea ke mafai o fakaaoga ne nisi tino kolā e ma‵nako ki potu. (Mata. 5:37) Kafai ko se manako koe ki te potu, ke fakamautinoa me ko oti ne fakaseai tau fakatokaga telā ne fai. Kafai e se fakailoa atu mai mua o te 48 itula, ka se mafai o faka‵foki mai au tupe.

(3) Fakamolemole kafai e fakaaoga ne koe se debit io me se credit card ke fakamau tou igoa i te fale talimālō, se faifaiga masani ke tausi ne te fale talimālō au tupe i tau akauni ke mafai ei o ‵togi ki ei tou potu mo nisi mea ma‵sei i te taimi e nofo atu koe i ei. Ka se mafai o fakaaoga ne koe au tupe i se fia o aso ke oko ki te taimi ne ‵togi ei a mea katoa.

(4) Ke fakaaoga te kā e aveave ei ou kope māfai fua ko toka koe ke fakaaoga, kae fakafoki fakavave atu ke mafai o fakaaoga ne nisi tino.

(5) Ke tuku atu se meaalofa ki te tino e ave ne ia ou kope mo te tino ‵teu potu māfai te mea tenā se tuu masani i tou atufenua.

(6) Ke kuka fua i potu kolā e saoloto o kuka i ei.

(7) Ke mo a e fakaaoga ‵se a mea kolā ne fakatoka ne te fale talimālō e pelā mo kofe, mo poloka i aisa mai te avatu ki te koga telā e fai ei a te fono.

(8) Ke fakaasi atu i taimi katoa a fuataga o te agaga tapu i au faifaiga ki tino ga‵lue i te fale talimālō. E tausi atu latou ki mālō e tokouke kae loto fakafetai latou ki ‵tou uiga atafai, kufaki mo te loto malamalama.

(9) E ‵tau o tausi atu faeloa mātua ki olotou tamaliki i taimi katoa i fale talimālō, e aofia ei a lift, swimming pool, koga e oloolo ei a tino, potu fakamalosilosi mo nisi mea aka.

◼ Galuega Fakavolenitia: So se tino telā e fia volenitia e ‵tau o fakailoa atu ne ia ki te Matagaluega o Volenitia i te fono. E mafai foki ne tamaliki mai lalo o te 16 tausaga o ‵lago atu mai te ga‵lue mai lalo i te takitakiga a se mātua, io me se tino matua telā ne talia ne te mātua.