E Fakamasani ne Ieova Tatou ki te Galuega Tenei
1. Kafai e tuku atu ne Ieova ki tino se galuega, se a foki a te mea e fai ne ia?
1 Kafai e tuku atu ne Ieova se galuega ki tino, e tuku atu foki ne ia ki a latou a te fesoasoani e manakogina ke fakaoti te galuega tenā. E pelā mo te faiatuga a Ieova ki a Noa ke faite se vaka, se mea telā ne seki fai aka eiloa ne Noa muamua, ne fai atu foki ne Ia me e ‵tau o fai pefea. (Kene. 6:14-16) I te taimi ne ‵tofi aka ei a te tausi mamoe loto maulalo ko Mose ke fanatu ki toeaina ma‵tua o Isalaelu mo Falao, ne fakatalitonu atu a Ieova ki a ia: “Ka fesoasoani atu au ki tau faipati, ka tukutuku atu foki ne au ki a koe a pati e ‵tau o fai.” (Eso. 4:12) Kae i te galuega foki tenei ke talai atu a te tala ‵lei, ne seki tuku mai eiloa ne Ieova ke fai ne tatou i a tatou eiloa. E fakamasani ne Ia a tatou mō te galuega tenei e auala i Te Akoga mō Tino Talai mo Te Fakatasiga mō te Galuega Talai. E mafai pefea o maua ne tatou a mea aoga mai i te akoga fakamasani tenei?
2. E mafai pefea o maua ne tatou a mea aoga mai i Te Akoga mō Tino Talai?
2 Te Akoga mō Tino Talai: Ke faitau kae sukesuke ki mataupu ne fakatoka ke fai a koi tuai o kau atu ki fakatasiga takitasi. Ko onoono koe ki te auala e fakaaoga ei ne tino talai a te fakamatalaga tenei i olotou lauga, ka mafai ei o tumau koe i te fakamasani ki te auala ke akoako atu. (Faata. 27:17) Ke aumai tau tusi ko te Ministry School ki te fakatasiga kae ke fakaaoga e pelā me se faoao. Kafai ko fakasino atu a te ovasia o te akoga ki ei mai tua o lauga a tino taki tokotasi, ke fakamailoga a manatu tāua kolā e fia fakagalue aka ne koe, kae ke fakaaoga a avanoaga i ei ke tusi ki lalo a manatu aoga. Kae ko te ‵toe auala ‵lei ke maua ne koe a mea aoga mai i te akoga tenei, ko te kau atu ki ei. E a, ko kau atu koe ki ei? Kafai e maua tou tofiga, fakatoka faka‵lei ki ei kae fakagalue aka a manatu fakatonutonu e maua ne koe. Kafai e fanatu koe i te galuega talai, ke fakaaoga a mea ko oti ne tauloto ne koe.
3. Ne a mea ka fesoasoani mai ke maua ne tatou a mea aoga mai i Te Fakatasiga mō te Galuega Talai?
3 Te Fakatasiga mō te Galuega Talai: Se mea ‵lei ke masaua eiloa ne tatou a manatu fesoasoani kolā e fakaasi mai i te fakatasiga tenei mai i te ‵toe faitau ki te mataupu a koi tuai o fanatu koe ki ei kae fakatoka foki o fai sau tali. Kafai e tumau tatou i te faiga o tali toe‵toe, ka mafai o uke atu a tino e fai olotou tali. Ke saga tonu atu ki fakaasiga, kae ke fakaaoga so se manatu fesoasoani e mafaufau koe me ka fai ei ke magoi tau galuega talai. Ke tausi se kopi o mataupu tāua mai i Te ‵Tou Galuega Talai ke mafai o fakaaoga i aso mai mua.
4. Kaia e ‵tau ei o fakaaoga faka‵lei ne tatou a akoakoga mai i te akoga mō tino talai?
4 E pelā mo galuega ne tuku atu ke fai ne Noa mo Mose, e faigata eiloa a te ‵tou galuega ke talai atu a te tala ‵lei ki te lalolagi nofoaki kātoa. (Mata. 24:14) E mafai eiloa o manuia tatou māfai e fakalagolago tatou ki a Ieova, te ‵Tou Faiakoga Sili, kae fakaaoga faka‵lei a te akoakoga e tuku mai ne ia.—Isa. 30:20.