A te Akoga mō Tino Talai i te 2015 e Fesoasoani Mai ke Apo i te Akoako Atu”

¹ Ne tusi mai te faisalamo ko Tavita: “Te Aliki, toku lafiga mo toku fakaolataga, ke talia mai ne koe aku muna mo oku mafaufauga!” (Sala. 19:14) E ma‵nako foki tatou ke fakafiafia atu a Ieova e auala i ‵tou pati me e fakatāua ne tatou a te tauliaga ke fai‵pati ki te munatonu i loto i te fakapotopotoga mo te galuega talai. A te Akoga mō Tino Talai se auala e tasi e akoako ei ne Ieova tatou mō te galuega talai. A te akoakoga tenei e fai loa i vaiaso takitasi i fakapotopotoga e silia atu mo te 111,000 i te lalolagi kātoa. Ne fesoasoani atu ki taina mo tuagane mai telega kese‵kese i te lalolagi kātoa ke fai pelā me ne tino talai apo o te tala ‵lei, kolā ko toka o akoako atu mo te loto talitonu, te atamai mo te loto toa.​—Galu. 19:8; Ko. 4:6.

² E aofia i te fakasologa o te akoga mō te 2015 a mataupu kolā ne suke‵suke ki ei i polosiua konei, Ko oi e Fai ne Latou te Loto o Ieova i Aso Nei? mo Te Tala ‵Lei Mai te Atua! E se gata i ei, ko oti ne fakamafuli a te leva o te taimi e fai ei te tofiga e uiga ki mea tāua mai te faitauga ki te Tusi Tapu mo te Tofiga Napa 1. E fakaasi mai i palakalafa mai lalo a ‵fuliga konei fakatasi mo pati fakatonutonu e uiga ki te faiga o tofiga o te akoga.

³ Mea Tāua Mai te Faitauga ki te Tusi Tapu: A taina kolā e fai ne latou te vaega tenei ka fakaasi mai ne latou i se lua minute se manatu gali kae aoga mai te Tusi Tapu i te faitauga ki te Tusi Tapu i te vaiaso. Ka iku atu a te fakatoka faka‵lei ki te fakaasi atu o se manatu tāua ki te fakapotopotoga i te taimi telā e manakogina. Ka oti, ko fakaavanoa atu ei ki te fakapotopotoga se ono minute ke fai olotou manatu tāua mai te faitauga o te Tusi Tapu i te vaiaso mō se 30 sekone te leva io me mu‵tana ifo. E manakogina a fakatokaga mo te loto pulea ke mafai o fai ne koe se manatu tāua i se 30 sekone, kae ko te faiga tenā se fakaakoakoga ‵lei mō tatou. E fai ei ke mafai foki ne nisi tino o fai olotou manatu ki mea ne tauloto ne latou mai i olotou sukesukega totino.

⁴ Tofiga Napa 1: Ko oti ne fakamafuli a te taimi e fai ei te faitauga ki te Tusi Tapu ki te tolu minute io me mu‵tana ifo kae ka mu‵tana fua a fuaiupu e faitau. E ‵tau mo latou kolā e aofia i te tofiga faitau o fakaakoako faeloa mai te faitau atu i se leo maluga kae saga faka‵lei atu ki te faka‵leoga o pati i se auala manino, ko te mea ke faka‵mafa atu ei a manatu tāua mo te malamalama. E ‵tau mo tino katoa o Ieova o taumafai o fai‵tau faka‵lei, me i te faitau se vaega tāua o te ‵tou tapuakiga. Se mea fakafiafia ke lavea atu me e tokouke a ‵tou tama‵liki e apo i te fai‵tau faka‵lei! E ‵tau o fakamālō atu ki mātua mō taumafaiga a‵lofa ne fai ne latou ke fesoasoani atu ki olotou tama‵liki ke fai pelā me ne tino e apo i te fai‵tau.

⁵ Tofiga Napa 2: Ka fai a te tofiga tenei ne se tuagane mō se leva e lima minute. E ‵tau o fakaaoga a te matua telā ne filifiligina. Kafai e fakavae se tofiga ki se mataupu i te polosiua ko te Tala ‵Lei Mai te Atua!, e ‵tau eiloa o fakaaoga ki se fakanofonofoga i te galuega talai telā e aoga i te ‵tou koga talai. Ka filifili ne te ovasia o te akoga se tino fesoasoani.

⁶ Tofiga Napa 3: Ka fai a te tofiga tenei ne se taina io me se tuagane mō se leva e lima minute. Kafai e fai ne se tuagane, e ‵tau eiloa o fai te tofiga tenei e pelā mo te Tofiga Napa 2. Kafai e fai ne se taina, e ‵tau o fai a te tofiga telā e fakavae ki mataupu i te polosiua Ko oi e Fai ne Latou te Loto o Ieova i Aso Nei? pelā me se lāuga kae ke mafaufau me ko oi a tino fakalog‵logo kolā e fai ki ei tena lāuga. E ‵tau o fakamatala faka‵lei atu ne te tino akoga a te matua, filifili a tusi siki kolā e ‵lei ke fakaaoga, kae fakaasi atu a mea e mafai o tauloto mai te tumau i te faiga te loto o te Atua.

⁷ Pati Fakatonutonu: Ka fakaaoga ne te ovasia o te akoga se lua minute mai tua o tofiga takitasi ke fakamālō atu kae tuku atu a pati fakatonutonu aoga kolā e fakavae mai te tusi ko te Benefit From Theocratic Ministry School Education. Kafai e faka‵pula atu ne te ovasia o te akoga te tofiga o se tino akoga i te polokalame, e se fai atu ne ia te manatu fakatonutonu telā e galue ki ei te tino akoga. Mai tua o tofiga takitasi, e ‵tau o tuku atu ne te ovasia a pati fakamālō, fakaasi atu te manatu fakatonutonu telā ne galue ki ei te tino akoga mo te pogai e gali ei tena tofiga, io me fakamatala atu mo te atafai te pogai e aoga ei ke saga faka‵lei atu a te tino akoga ki te manatu fakatonutonu tenā.

⁸ E maua ne tino a‵koga a pati fakatonutonu i te itulau e 79 ki te 81 o tena ‵kopi totino o te tusi ko te Ministry School. Kafai ko oti te tofiga o se tino akoga, ka fakamailoga ne te ovasia o te akoga a te tusi a te tino akoga ko fesii atu ei me ne fakagalue ne ia a manatu fakatonutonu konā. A pati fakamālō mo manatu fesoasoani e mafai o tuku atu ki se tino akoga māfai ko oti te fakatasiga io me i se suā taimi. A manatu fakatonutonu kolā e maua ne te tino akoga mai te akoga se avanoaga ke fesoasoani atu ei ke gasolo a ia ki mua i te feitu faka-te-agaga.​—1 Timo. 4:15.

⁹ Kafai ko silia te taimi e fai ei ne te tino akoga tena tofiga, e ‵tau o fai ne te ovasia o te akoga io me ko te tino fesoasoani se fakailoga ke fakaasi atu ei i se auala āva me ko tā te taimi o te tino akoga. E ‵tau eiloa o fakaoti fakavave ne te tino akoga ana pati e fai kae tiaki te tulaga māfai ko lavea ne ia te fakailoga tenā.​—Ke onoono ki te tusi ko te Ministry School, itu. 282, pala. 4.

¹⁰ E fakamalosi atu ki a latou katoa kolā ko fetaui ‵lei ke na ‵kau atu ki te Akoga mō Tino Talai. (Ke onoono ki te tusi ko te Ministry School, itu. 282, pala. 6.) Ne fai ne akoakoga kolā e maua mai te akoga tenei ke mafai ne tino o Ieova o talai kae akoako atu te tala ‵lei o te Malo mo te loto tali‵tonu, te fakaaloalo, mo te alofa. E mautinoa eiloa me e fiafia a Ieova ke tavaegina a ia ne latou katoa kolā e maua ne latou a mea aoga mai akoakoga faka-te-agaga konei!​—Sala. 148:12, 13; Isa. 50:4.