Fesoasoani Atu ki te Tino i te Fale ke Mafaufau Faka‵lei

1. Se a te ‵toe auala ‵lei ke faipati atu ei i te galuega talai?

¹ Se a te auala e sili atu i te magoi ke faipati atu i te galuega talai—ko te pati ‵toko atu io me ko te fesoasoani atu ki te tino i te fale ke mafaufau faka‵lei kae ke mafai ei ne ia o fai a fakaikuga ‵tonu? Ne fakaaoga ne te apositolo ko Paulo a te auala fakamuli i te taimi ne faipati atu ei a ia ki te kau Iutaia i Tesalonia, telā ne “isi ne tino o latou ko tali‵tonu.” (Galu. 17:2-4) Se a te mea e aofia i te faiga o nisi tino ke mafaufau faka‵lei?

2. E tau‵tali atu pefea tatou ki te fakaakoakoga a Paulo i te taimi e talai atu ei ne tatou a te tala ‵lei?

² Mafaufau ki Olotou Lagonaga mo Tupuakaga: A te auala ‵lei ko te mafaufau faka‵lei ki lagonaga o tino i te koga talai. Ne kamata ne Paulo se lauga ki tino Eleni sē tali‵tonu i te Aleopako mai i te taku atu o mea kolā kāti ne iloa kae talia ne latou. (Galu. 17:22-31) Tela la, i te taimi e fakatoka ei au pati fakatomua, ke mafaufau ki talitonuga masani mo te kese‵kese o tino i ‵tou koga talai. (1 Koli. 9:19-22) Kafai e fakasae aka ne te tino i te fale se manatu ‵teke, taumafai o fakasino atu ki se mea telā e lotoma‵lie tasi koulua ki ei, kae ke ati aka i ei a te lū sau‵talaga.

3. E mafai pefea o momea aka te ‵tou ma‵goi i te faiga o nisi tino ke mafaufau faka‵lei mai i te fakaaogaga o fesili mo te atamai?

³ Ke Fakaaoga mo te Atamai a Fesili: E se mafai o tuku atu ne tatou ki se tino faimalaga a te fesoasoani ke oko atu ki te koga e fanatu a ia ki ei seiloga ke iloa ne tatou a te koga e nofo i ei a ia. E penā foki loa, e se mafai o fesoasoani atu tatou ki se tino i te fale ke oko atu a ia ki se fakaikuga ‵lei seiloga ke iloa ne tatou tena kilokiloga. A koi tuai o sau‵tala mo se tino fakalogologo, ne masani o ‵sili atu ne Iesu a fesili ke iloa aka ei a mafaufauga o te tino. E pelā mo te taimi ne fesili atu ei se tino ki a Iesu, “Se a te mea e ‵tau o fai ne au, ko te mea ke maua ne au a te ola se gata mai?,” ne taumafai a Iesu ke iloa ne ia a te kilokiloga a te tagata tenā a koi tuai o tali atu a ia. (Luka 10:25-28) I te suā taimi ne tuku atu ei ne Petelu se tali ‵se, ne fakaaoga mo te atamai ne Iesu a fesili ke faka‵tonu aka ei ana mafaufauga. (Mata. 17:24-26) Tela la, kafai e ‵sili atu ne te tino i te fale se fesili io me e fakaasi atu ne ia se kilokiloga ‵se, e mafai o fakaaoga ne tatou a fesili ke fesoasoani atu ki a ia ke mafaufau faka‵lei ki te mataupu tenā.

4. Kaia e ‵tau ei o taumafai tatou ke fesoasoani atu ki te tino i te fale ke mafaufau faka‵lei?

⁴ Kafai e fesoasoani atu tatou ki te tino i te fale ke mafaufau faka‵lei, e fakaakoako atu tatou ki te Faiakoga Sili, ko Iesu, e pelā foki mo nisi tino talai apo i te senitenali muamua. E faka‵malu i ei ne tatou a te tino i te fale kae e fakaasi atu foki ei ne tatou a te āva ki a ia. (1 Pe. 3:15) E mafai o iku atu ei ki te faiga ke momea aka te loto fiafia o tou tagata ke toe ‵foki atu tatou.