Ke Momea Aka Faeloa ‵Tou Atamai i te Galuega Talai—Ke Ofo Atu te Tusi ko te Akoakoga a te Tusi Tapu

Te Pogai e Tāua ei: A te tusi ko te Akoakoga a te Tusi Tapu se mea faigaluega fakavae telā e aoga mō fai a akoakoga. Kae mai mua o fakaaoga ne tatou a te tusi tenei ke suke‵suke fakatasi ki ei mo se tino, e ‵tau o tuku atu muamua ne tatou ki a ia. Tela la, e ‵tau mo tatou katoa o taumafai ke ata‵mai i te ofoatuga o te tusi ko te Akoakoga a te Tusi Tapu i te galuega talai. (Faata. 22:29, NW) E uke auala e mafai o ofo atu ei te tusi, kae ‵tau mo tino talai o fakaaoga a auala kolā e fetaui ‵lei mo tino kolā e talai atu tatou ki ei.

Te Auala e Fai ei:

Ke fakasae aka se fesili telā e fakamalosi aka ei te fiafia o te tino, kae e mafai o takitaki atu ei a ia ki se mataupu i te tusi. E mafai foki o filifili aka ne koe se fesili i te kamataga o mataupu takitasi. Kafai ko oti ne tali mai a te tino i te fale, ko faitau atu ei a te tusi faitau telā e fetaui ‵lei kae fakaasi atu ki a ia se palakalafa i te matataupu tenā, ko sau‵tala fakatasi ei koulua ki ei.
A te suā auala ko te fakaaogaga o manatu i te itulau kamata, ke fakamalosi aka ei te fiafia o te tino i te fale, ko fakaasi atu ei ki a ia te auala e maua ei i te tusi a te tali mai te Tusi Tapu. E pelā me se fakaakoakoga, e mafai o fakaaoga ne koe se fakalavelave ne fatoā tupu telā ne sae mai i tala i te letio, ko fakamatala atu ei me e tokouke a tino e ‵sala ki tali o fesili i te itulau e 3. Io me mafai o fai atu koe, me e asi atu koe ki ou tuakoi o fakaasi atu ki a latou se kilokiloga ‵lei e uiga ki aso mai mua. Ko fakaasi atu ei a ata i te itulau e 4-5 kae fesili atu penei, “Tefea te valoaga i konei e manako malosi koe ke fakataunu?” A te suā auala e mafai o fakaaoga ne koe, ko te fai atu ki te tino i te fale me e asi fakavave mai fua koe, ke fesoasoani atu ki tino ke maua ne latou a tali ki toe fesili tāua i te olaga nei. Ka oti ko fakaasi atu ei ki te tino i te fale a fesili i te fakaotiga o te itulau e 6, ko ‵sili atu ei me tefea te fesili e fiafia malosi a ia ki ei.
Ke fai ‵tonu atu ki te tino i te fale ke kamata se akoga faka-te-Tusi Tapu. E mafai o fai atu koe, penei: “E fakaasi atu eiloa ne matou ki omotou tuakoi a te tusi tenei e fai ki ei a motou akoga faka-te-Tusi Tapu. E mata, kai lavea aka eiloa ne koe muamua? [Faka‵tali ki se tali.] Kafai koi isi ne minute koi ‵toe, e fiafia eiloa au o fakaasi atu ki a koe a te auala e mafai ei o fakaaoga a te tusi tenei fakatasi mo tau Tusi Tapu.”

Ke Tofotofo ki te Mea Tenei i te Masina Kātoa:

Ke fai ne fakaakoakoga i taimi o tapuakiga a kāiga.
I te taimi o te galuega talai, ke fakaasi atu ki nisi tino talai a pati kolā e manako koe o fai atu. (Faata. 27:17) Ke fakamafuli‵fuli au pati fakatomua māfai e se ma‵goi.