Se Fesili Ke Mafaufau ‵Loto Ki Ei

◼ Se a te mea e fakavae ki ei ‵tou fakaikuga me e ‵tau o tuku atu a tusi ki se tino io me ikai?

A te ‵toe mea tāua ke mafaufau ki ei ko te fiafia o te tino. Kafai e fakaasi mai ne ia a te fiafia tonu, e mafai o tuku atu ne tatou a mekesini e lua, se polosiua, se tusi, io me ko nisi tusi kolā e ofo atu ne tatou. E mafai eiloa o fai a te mea tenei māfai foki loa e mu‵tana io me e seai ne tupe ke tuku fakameaalofa atu ki te galuega i te lalolagi kātoa. (Iopu 34:19; Faka. 22:17) I te suā feitu la, e se tuku atu ne tatou ‵tou tusi tāua ki tino kolā e se fakatāua ne latou.—Mata. 7:6.

E fakaasi mai pefea ne te tino i te fale a te fiafia? A te loto fiafia o sau‵tala mai ki a tatou se fakamaoniga ‵lei e tasi. E saga tonu mai a ia i te taimi e fai‵pati ei tatou, e talitali mai ki fesili, mo te fakaasimaiga foki o se manatu i te taimi e sau‵tala ei tatou. A te tautali atu ki te Tusi Tapu i te taimi e fai‵tau ei ne tatou a te Tusi Tapu e fakaasi mai i ei a te āva ki te Muna a te Atua. E fesoasoani sāle mai ki a tatou a te fesili tonu atu me e mata ka faitau a ia ki te tusi telā e ofo atu. E ‵tau o fakaaoga ne tino talai a faka‵tauga ‵lei ke fakaiku aka ei a te fiafia o te tino. I te taimi e talai atu ei i auala, e se ‵lei māfai e tuku valevale atu fua ne tatou a mekesini, polosiua, io me ko tusi ki so se tino e fetaui mo tatou. Kafai e se iloa ne tatou me e fiafia tonu te tino io me ikai, se mea ‵lei ke tuku atu fua se pepa ‵kami io me se tamā pepa.

E penā foki loa, a te aofaki o tusi e puke mai ne se tino talai i te koga e tausi ei a tusi e ‵tau o fakavae ki mea e manakogina ne te tino talai ko te mea ke fai ei tena galuega talai, e se ko te aofaki o tupe e mafai o tuku fakameaalofa atu ne ia. A meaalofa e se ‵togi fua i ei a tusi kae e ‵lago atu ki vaega katoa o te ‵tou galuega talai i te lalolagi kātoa. Faitalia me se a te ‵tou tulaga i mea tau tupe, a te loto fakafetai ka fakamalosi aka ei tatou ke tuku atu ‵tou meaalofa mo te lotomalie, kae e se mai i ‵tou tupe silia, ke ‵lago atu ei ki manakoga o te Malo. (Male. 12:41-44; 2 Koli. 9:7) Ka fakamalosi aka foki ei tatou ke puke fua ne tatou a te aofaki o tusi kolā e manakogina ne tatou, ko te mea ke se fakamāumāu ei a meaalofa tupe kolā ne ‵togi ki ei.

[Manatu tāua i te itulau e 2]

E ‵tau o fakaaoga ne tino talai a faka‵tauga ‵lei ke fakaiku aka ei a te fiafia o te tino