Se a te Tulaga o Latou?

A te mea tenā se fesili ‵lei ke ‵sili ifo ne tatou e uiga ki so se tusi e mafau‵fau tatou ke ofo atu. So se mea telā ko matafitafi atu a tena ‵lanu, ‵siu, io me ko masaesae, ka mafai o fakaasi atu i ei se ata sē ‵lei o te ‵tou fakapotopotoga kae fai ei a te tino i te fale ke se saga faka‵lei atu ki te fekau gali kae fakaola tino i loto i tusi.

E mafai pefea o fakatumau ne tatou a te ‵ma o ‵tou tusi? E fesoasoani atu ki tino e tokouke a te fakatoka faka‵lei olotou ato talai mai i te tuku fakatasi o tusi kolā e ‵pau. E pelā mo te tuku fakatasi o tusi i se koga e tasi, kae ko te suā koga ko mekesini mo polosiua, kae ko te suā koga e tuku i ei a tamā pepa, mo nisi mea aka foki penā. I so se taimi e faka‵foki atu ei olotou Tusi Tapu mo so se tusi ki olotou ato talai e fai faka‵lei eiloa ne latou penā ko te mea ke mo a ma fakama‵sei i ei a tusi. E tausi ne nisi tino talai olotou tusi i se faela. Faitalia me se a te auala e fakaaoga ne tatou, e se ma‵nako tatou o tuku atu ki se tino se pogai sē ‵lei ke taku fakamasei ei ne ia ‵tou galuega talai mai i te tuku atu o tusi ma‵sei ki a ia.—2 Koli. 6:3.