Se Auala ‵Lei ke Fakalogo‵logo ki Pese o te Malo

E ‵kilo atu eiloa a tavini a te Atua ki pese e pelā me se meaalofa gali mai i a Ieova. (Iako. 1:17) Ko oti eiloa ne fakatagi‵tagi malie ne fakapotopotoga e uke a Pese o te Malo mai mua mo mai tua o fakatasiga a te fakapotopotoga. A te faka‵tagiga o pese o te Malo se auala gali ke fakalogo‵logo ki ei kae koi tuai o kamata te fakatasiga. E fesoasoani mai ke fakatoka ‵tou mafaufau mō tapuakiga. E se gata i ei, a te fakatagi‵tagi o pese ‵fou mai i ‵tou tusi pese e fakamasani ei tatou ki pese kae fesoasoani mai foki ke usu faka‵lei atu ne tatou a pese. A te fakatagi‵tagi o vaegā pese penā mai tua o fakatasiga e fakatumau i ei a te tulaga ‵lei e mafai ei o fai a fesokotakiga fakamalosi loto. Tela la, e ‵tau o fai ne te kau toeaina a fakatokaga ‵lei ke faka‵tagi a pese mai i te Sing to Jehovah—Piano Accompaniment. E ‵tau o fakamautinoa aka ne latou me e se to maluga kae e se faigata foki i ei a te faiga o sau‵talaga.