Te Vitiō ko te Jehovah’s Witnesses —Faith in Action, Part 1: Out of Darkness

I te Tusi Tapu, e isi eiloa se fesokotakiga i te va o te mainaga mo te mea tonu, kae ko te pouliga mo te mea ‵se. (Sala. 43:3; Isa. 5:20) Ne fakaoko mai ne Satani a te pouliga ki te lalolagi i te taimi ne fakaloiloi ei ne ia a Eva, kae fakamuli loa, ne ‵pei atu ei ne ia a tino ki loto i te pouliga tagataga. (Faka. 12:9) A te vitiō ko te Jehovah’s Witnesses—Faith in Action, Part 1: Out of Darkness e maua i ei a fakamatalaga e uiga ki te auala ne kamata ei o sae aka a te mainaga faka-te-agaga mai i te pouliga. (Isa. 60:1, 2) Kafai ko oti ne onoono ki te vitio, e mata, e mafai o tali mai ne koe a fesili konei?

(1) Ne tupu aka pefea a te pouliga tagataga mai tua o te taimi ne ‵mate atu ei a te kau apositolo? (2) E kamata mai i tausaga talu mai te 1100, ne a atiakaga ne fesoasoani atu ki tino ke iloa ne latou me ko ‵seke a lotu mo te auala tonu? (3) Ko oi a Henry Grew mo George Storrs? (4) Ne a mea ‵tupu i te olaga o Siale Lasalo kolā ne lasi te fakamalosiga ki a ia? (5) Ne tumau pefea a te Taina ko Lasalo, tena tamana, mo nai taugasoa i te faiga o sukesukega faka-te-Tusi Tapu, kae ne a fakamatalaga faka-te-Tusi Tapu ne maua ne latou? (6) Ne ‵kau fakatasi pefea a te potukau sukesuke ki te Tusi Tapu tenei mo te potukau a Nelson Barbour, kae se a te pogai ne ‵vae keatea ei a te Taina ko Lasalo mai i ei? (7) Se a te mea ne tupu i a Iulai i te 1879 telā ne kamata mai i ei se vaitaimi fou mō te mainaga faka-te-agaga? (8) Mai tua ifo i ei, ne a mea ne fai ne a‵koga faka-te-Tusi Tapu kolā ko gasolo aka o tokouke ke fakasalalau atu a te tala ‵lei? (9) I tausaga mai mua atu i ei, se a te mea ne fakamoe‵moe a Tino A‵koga i te Tusi Tapu ke tupu i te 1914? (10) Ne a mea faiga‵ta ne fe‵paki mo Tino A‵koga i te Tusi Tapu mai tua o te matega o te Taina ko Lasalo? (11) Ne a mea ne fai ne Tino A‵koga i te Tusi Tapu mai tua o te fakasaolotoga o te Taina ko Latafoti mo ana taugasoa mai i te falepuipui? (12) Ne ati aka pefea ne te vitio tenei a tou loto fakafetai ki te fakapotopotoga a Ieova? (13) Ne fakamalosi aka pefea ne te vitiō tenei a tau fakaikuga ke tumau i te talai atu mo te loto finafinau faitalia a mea faiga‵ta? (14) E mafai pefea o fakaaoga ne koe a te vitio tenei ke fesoasoani atu ki ou kāiga, akoga faka-te-Tusi Tapu, mo nisi tino?

Ko oko eiloa i te tāua o te meaalofa faka-te-agaga ne tuku mai ne Tino A‵koga i te Tusi Tapu mua konei ki a tatou! I se lalolagi telā e pouli tagataga i te feitu faka-te-agaga, ne fai eiloa latou mo fai ne tino loto ma‵losi kae loto finafinau i te fakasalalauatuga o te mainaga. Ke na fakaakoako atu tatou ki te lotou fakaakoakoga kae ke “tumau la i te sa‵sale e pelā me ne tama o te mainaga.”—Efe. 5:8.