E Manakogina ke ‵Sala Atu Mua, a Koi Tuai o Talai
1. Kaia e fakatoka ei a koga talai a te fakapotopotoga i koga e uke a ‵gana i ei e ‵tusa loa mo ‵gana konā?
1 I te Penitekoso i te 33 T.A., mai tua o te mauaga o te agaga tapu, ne “kamata ei o fai‵pati [a soko Iesu] ki ‵gana kese‵kese” ki tino kolā ne ‵kau atu mai koga kese‵kese o te lalolagi. (Galu. 2:4) Ne iku atu i ei ki te papatisoga o tino e toko 3,000. Se mea gali me e foliga mai i te tokoukega o tino kolā ne āsi atu e fai‵pati foki i se ‵gana masani, kāti ko te ‵gana Epelu io me te ‵gana Eleni. Kae ne filifili ne Ieova ke talai atu te fekau o te Malo ki a latou i olotou ‵gana eiloa. E mautinoa eiloa me i te pogai e tasi mō te mea tenei me i tino e masani o sili atu te lotou ‵saga atu ki te tala ‵lei māfai e lagona ne latou i olotou ‵gana eiloa. Tela la, i aso nei, e fakatokagina eiloa a koga talai a te fakapotopotoga i koga kolā e uke a tino e fai‵pati ki ‵gana kese‵kese e ‵tusa loa mo te lotou ‵gana.(Fakatoka, te itulau e 102-108, te itulau e 6, te palakalafa 1-2) E seai se koga talai mautinoa a potukau i ‵gana fakaatea, kae e talai atu latou ki tino kolā e fai‵pati ki te lotou ‵gana i te koga talai o te fakapotopotoga telā e tausi atu ki ei mo nisi fakapotopotoga aka foki i te kogā koga tenā.
2. (a) Se a te galuega ko te ‵sala atu, kae e manakogina ke fai i kogā koga fea? (e) E mafai pefea o fakatau fesoasoani a fakapotopotoga kolā e ‵nofo atu i koga kolā e uke a ‵gana i ei? (i) Ne a mea e ‵tau o fai ne tatou māfai ko maua ne tatou se tino telā e faipati ki se isi ‵gana kae e fiafia foki?
2 Kafai e nofo atu koe i se koga telā e fai‵pati a tino katoa i ei i se ‵gana e tasi, e mafai eiloa o talai atu koe mai te fale e tasi ki te suā fale. Kae e mafai o ‵kese tou tulaga māfai ko nofo atu koe i se koga telā e uke a ‵gana i ei. E mafai o talai atu foki a nisi fakapotopotoga i se isi ‵gana i te koga foki eiloa e tasi. E tiga eiloa e mafai o tuku atu ne fakapotopotoga a fakamatalaga e uiga ki tino kolā e maua ne latou kae fai‵pati i tau ‵gana, a te tiute muamua ke ‵sala atu ki tino e mafai o talai atu koe ki ei e panaki eiloa mo tau fakapotopotoga io me ko tau potukau (Ke onoono ki te pokisi “Ke Fakatau Fesoasoani.”) Tela la, e mafai o kau atu koe ki te galuega ko te ‵sala atu ki tino, telā e mafai ei ne koe o ‵sala atu ki tino kolā e fai‵pati ki se ‵gana telā e manako koe ki ei. E mafai pefea o fai a te galuega ko te ‵sala atu ki tino e fai‵pati ki ‵gana fakaa‵tea?
3. Se a te mea e fakaiku aka ki ei a te koga e ‵sala atu ei a te fakapotopotoga io me ko te potukau ki tino mo te uke o taimi e tuku atu ne latou ki te galuega tenei?
3 Te Fakatokaga o te Galuega ko te ‵Sala Atu: A te uke o taimi e fakaaoga ke ‵sala atu a tino i koga kolā e uke a ‵gana i ei e fakalagolago loa ki fakanofonofoga o te fakapotopotoga. E pelā mo te mea tenei, e pefea te tokouke o tino i te fenua e fai‵pati ki te ‵gana tenā? E tokofia a tino talai e fai‵pati ki te ‵gana tenā? Ko pefea te uke o fakatuatusi ko oti ne maua ne te fakapotopotoga io me ko te potukau tenā? E se manakogina ke ‵sala atu a te fakapotopotoga ki koga katoa i se auala telā e ‵pau katoa, kae e mafai o filifili aka ke ‵saga tonu atu ki koga e tokouke a tino i ei i olotou koga talai eiloa mo koga kolā e se tō ‵mao. Kae ko te faiga o fakatokaga ‵lei ke ‵sala atu e tāua ko te mea ke tokouke a tino e mafai o maua ne latou a te avanoaga ke ka‵laga atu ki te igoa o Ieova.—Loma 10:13, 14.
4. (a) E ‵tau o fakatoka pefea a te galuega ko te ‵sala atu ki tino kolā e fai‵pati i nisi ‵gana? (e) Ne a nisi auala ke ‵sala atu ki tino kolā e fai‵pati i tau ‵gana?
4 Ke ‵kalo keatea mai i te olo atu katoa ki koga kolā e manakogina a te faiga o te ‵salaatuga, e ‵tau mo te kau toeaina, maise eiloa te ovasia o te galuega talai, o fakatoka kae tausi atu ki te galuega tenā. (1 Koli. 9:26) I potukau kolā e fakaaoga i ei a ‵gana fakaatea, e mafai ne se taina telā e fetaui ‵lei, kāti se toeaina io me se tavini fesoasoani, telā ne filifili aka ne te kau toeaina o te fakapotopotoga telā e tausi ki ei, o fai ne ia a te takitakiga. E isi eiloa ne fakatokaga mautinoa e fakaaoga ne fakapotopotoga mo potukau e uke, kāti mai i te fakaaogaga o se tusi telefoni io me ko te Itaneti ke ‵sala atu ki igoa o tino masani kolā e fai‵pati ki te ‵gana tenā. Ko fai ei te galuega ko te ‵sala atu e auala i te telefoni atu io me se asiga ke fakamautinoa aka a fale kolā e ‵tau o aofia i te koga talai. Kafai e ‵lei ke fai penā, ko fakatoka ei ne te kau toeaina o te fakapotopotoga telā e tausi atu ki te potukau ke aofia a te fakapotopotoga kātoa i te ‵sala atu ki tino konā i nisi taimi.—Ke onoono ki te pokisi ko “Te Auala ke ‵Sala Atu ki Tino Kolā e Fai‵pati i Tau ‵Gana.”
5. (a) Ne a nisi manatu fesoasoani mō tino talai kolā e aofia i te galuega ko te ‵sala atu? (e) Ne a pati e mafai o fai ne tatou ki tino i te taimi e ‵sala atu ei?
5 E ‵tau o manino ‵lei ‵tou fakamoemoega i taimi takitasi e ‵kau atu ei tatou ki te galuega tenei ko te ‵sala atu ki tino. Ona ko te galuega tenei se vaega o te galuega talai, e ‵tau eiloa o fai faka‵lei ‵tou gatu e pelā me ne tino talai. E iloa ne tino e tokouke me i te fakaakoakoga o olotou pati fakatomua mo te fai‵pati ki te ‵gana tenā i te taimi e ‵sala atu ei latou e fakatumau aka ei te lotou loto finafinau kae e momea aka foki te lotou apo i te fai‵pati i te ‵gana tenā. E mafai o lau a taimi i te taimi e ‵sala atu ei tatou kae e se ko te taimi e fakatoka ei a mape mo te fakasologa o igoa o tino. Kafai e maua ne tatou se tino telā e faipati i te ‵gana, e ‵tau o taumafai tatou ke fakamatala atu te tala ‵lei kae fakailoa fakavave atu ki te ovasia o te galuega talai io me se tino ne ‵tofi aka ne ia ko te mea ke fakatonutonu aka a koga talai. E aoga eiloa te mea tenei faitalia me ko te tino tenā e fiafia io me ikai. E tiga eiloa e tāua a te galuega ko te ‵sala atu, e ‵tau o paleni ‵lei tatou kae ‵kau atu ki vaega katoa o te galuega talai.—Ke onoono ki te pokisi “Pati ke Fai Atu i te Galuega ko te ‵Sala Atu.”
6. Ne a mea faiga‵ta tu ‵kese i te ‵sala atu ki te tino ‵tuli?
6 Te ‵Sala Atu ki Tino Kolā e ‵Tuli: A te ‵sala atu ki tino ‵tuli e isi ne mea faiga‵ta tu ‵kese i ei kae e manakogina a taumafaiga e uke ‵ki mo te loto mau. E se mafai o iloa atu a te tino ‵tuli i te tusiga o tena igoa, i ana uiga faka-te-foitino, io me i ana gatu. E se gata i ei, e mafai eiloa o puipui faka‵lei ne kāiga mo taugasoa kae e se fia tuku mai ne latou a fakamatalaga ki tino talai kolā e fesilisili atu. Kāti e mafai o fesoasoani mai a manatu fesoasoani kolā e ‵soko mai i te ‵sala atu ki tino ‵tuli i te taimi e ‵sala atu ei ki tino kolā e fai‵pati.
7. (a) Ne a fesili e mafai o fai atu i koga ‵nofo o tino ke ‵sala atu ei ki tino ‵tuli? (e) E mafai pefea o fakafeoloolo aka ne tatou a te manavase o te tino i te fale?
7 Ko oti eiloa ne manuia a taumafaiga a fakapotopotoga mo potukau i te ‵gana fai tāga i te salasala atu i koga ‵nofo o tino. Kāti ne lavea ne te tino i te fale se tuakoi, se tino e ga‵lue tasi mo ia, io me se tamaliki ne a‵koga tasi lāua e faipati i te ‵gana fai tāga. Kāti ne lavea ne ia se fakailoga i te auala telā e fakailoa atu ki tuakoi me e isi ne tama‵liki ‵tuli i koga konā. Kāti e isi sena kāiga ‵tuli. Masaua me i te pogai o tau āsiga e mafai o fai ei a tino ke manava‵se. Kae e mafai eiloa o fesoasoani koe ki te tino i te fale ke mo a ma to manavase mai i te fakaasi atu o te mata fiafia tonu mo se fakamatalaga toetoe, tonu, kae tāua. Ne maua ne nisi tino a ikuga ‵lei mai i te fakaasi atu o te Tusi Tapu io me ko nisi DVD i te taimi e fesili atu ei me e iloa ne te tino i te fale se tino telā e ‵tuli io me ikai. Ko fai atu ei latou me e ma‵nako fua latou o fakaasi atu a te fakamoemoega i te Tusi Tapu ki tino penā. Kafai e se fia tuku mai ne te tino i te fale a fakamatalaga, kāti e loto fiafia a ia ke talia tou fakatuatusi io me se ‵kamiga ki fakatasiga a te fakapotopotoga ke tuku atu ki tena kāiga io me se taugasoa telā e ‵tuli.
8. E mafai pefea o fesoasoani atu se fakapotopotoga telā e pili atu ki se fakapotopotoga i te ‵gana fai tāga?
8 I se aso e tasi io me lua i te tausaga, e ‵kami atu ne te fakapotopotoga i te ‵gana fai tāga se fakapotopotoga i se isi ‵gana telā e pili atu ki a latou ke fesoasoani atu i te ‵salaatuga i fa‵kai ‵lasi. A te fakatasiga mō te galuega talai telā e fai ne te fakapotopotoga i te ‵gana fai ki lima e mafai o aofia i ei a fakatonuga mō te galuega tenei fakatasi mo se fakaasiga. I potukau takitasi i te motoka, e ‵tau o isi se tino talai mai i te fakapotopotoga i te ‵gana fai tāga kae tuku atu se mape telā e fakaasi atu ei se koga fakapito ke ‵sala atu i ei.
9. E mafai pefea o fai a te galuega ko te ‵sala atu i koga kolā e maopoopo kae ta‵fao sāle ei a tino ‵tuli io me ko koga e olo atu latou ke maua mai i ei a nisi fesoasoani?
9 E mafai foki o fai a te ‵salaatuga i koga kolā e maopoopo sāle ki ei a tino ‵tuli i olotou maopoopoga mo fakafiafiaga io me ke maua mai i ei a fesoasoani kolā e tuku mai ne tino i te fa‵kai. E ‵tau o ‵pei a tino talai ki gatu kolā e fetaui ‵lei mō te galuega tenā. Kāti e ‵lei atu ke sau‵tala mo se tino e tokotasi io me tokolua i lō te faipati atu ki se potukau kātoa kae ke poto foki koe. Kafai e ‵lei te sau‵talaga, kāti e mafai o fakatoka a te auala ke toe fesokotaki ei koutou.
10. E mafai pefea o ‵sala atu a tino talai i koga ga‵lue?
10 A te suā auala ko te fakatoka o mape kolā e fakaasi atu ei a pisinisi i te koga tenā kae fai a toe āsiga ki a latou i se taimi ‵lei. E aofia i te mape e tasi a nai koga utu penitini. A te suā mape ko koga e ‵ta ei a gatu, fale ‵kai, fale talimālō, io me ko nisi vaegā pisinisi aka foki. Kafai e maua atu a pisinisi tai ‵pau e uke i se mape e tasi, e mafai o fakaaoga ne tino talai a pati fakatomua foki eiloa konā kae fakamasani ke momea aka te atamai mo te apo. E pelā mo fale talimālō kolā e ‵nofo sāle i ei a tino ‵tuli, e mafai o fakamatala malie atu te ‵tou galuega ki te tino telā e galue i tafa o te mataloa kae ke ofo atu se seti DVD mo se pepa ‵kami ki fakatasiga a se fakapotopotoga ke tuku atu ne tino ga‵lue i te fale talimālō ki tino ‵tuli. I nisi pisinisi, e mafai o fesili atu tatou me e isi ne tino ga‵lue io me ne tino kolā e masani o olo atu ki konā e fakaaoga ne latou a te ‵gana fai tāga. Kafai e isi se akoga mō tino ‵tuli i tau koga talai, e mafai o tuku atu ne tatou a nisi DVD mō te lotou fatatusi.
11. Kaia e fai ei a te galuega ko te ‵sala atu mo fai se vaega tāua o te galuega talai?
11 Se Galuega Tāua: A te ‵sala atu ki tino i fale kolā e fai‵pati ki tau ‵gana e mafai o fakafi‵ta kae uke a taimi e ‵tau o fakamāumāu ki ei. E se gata i ei, e mafai eiloa o ‵fuli malosi a tulaga o nisi potukau o ‵gana kese‵kese ona ko te oloolo sāle o tino, telā e fakafaigata aka ei te tausiga o koga talai ke ‵tonu. E tiga eiloa te feitu tenā, a te galuega ko te ‵sala atu se vaega tāua o te galuega talai. A Ieova, telā ne tuku mai ne ia a te galuega ke talai atu, e se fakailoga tino. (Galu. 10:34) “E manako a ia ke ola tino katoa, ka ke iloa foki ne latou te munatonu.” (1 Timo. 2:3, 4) Tela la, ke na ga‵lue fakatasi tatou katoa mo Ieova i te ‵sala atu ki tino mai i ‵gana katoa kolā e “loto ‵lei.”—Luka 8:15.
[Ata i te itulau e 5]
Ke Fakatau Fesoasoani
Kafai e fia fesoasoani atu a te fakapotopotoga io me ko te potukau ke ‵sala atu ki tino kolā e mafai o talai atu latou ki ei i te lotou ‵gana, e mafai o fesokotaki atu a te ovasia o te galuega talai ki toeaina o fakapotopotoga i nisi ‵gana kolā e ‵pili mai. Kāti e ‵lei atu ke fesokotaki atu fua ki fakapotopotoga kolā e se tō ‵mao kae e tai tokouke a tino kolā e fai‵pati ki te ‵gana. E mafai o fakailoa atu ne fakapotopotoga kolā e fesokotaki atu ki ei ki olotou tino talai me kafai e maua ne latou se tino e faipati ki te ‵gana tenā, e ‵tau o tusi ne latou ki lalo te fakatuatusi kae tuku atu ki te ovasia o te galuega talai ke avatu ne ia ki te fakapotopotoga io me ko te potukau telā e fakamolemole atu mō se fesoasoani. A ovasia o te galuega talai o fakapotopotoga kolā e aofia i ei e mafai o ga‵lue fakatasi i te faiga o se fakatokaga ke ‵kava faka‵lei a koga talai kolā e uke a ‵gana i ei kae takitaki atu ei a tino fia‵fia ki te fakapotopotoga io me ko te potukau tonu.
Kafai e maua ne tino talai se tino e faipati ki se isi ‵gana telā e fiafia tonu (io me se tino ‵tuli), e ‵tau o faka‵fonu fakavave ne latou a te pepa ko te Please Follow Up (S-43) kae tuku atu ki te failautusi o te fakapotopotoga. Ka fesoasoani atu a te mea tenei ke maua fakavave ne te tino a te fesoasoani i te feitu faka-te-agaga.—Ke onoono ki te km 5/11 itu. 3.
[Ata i te itulau e 6]
Te Auala ke ‵Sala Atu ki Tino Kolā e Fai‵pati i Tau ‵Gana
• Ke fesili atu ki nisi tino—akoga faka-te-Tusi Tapu, kāiga, tino ga‵lue fakatasi koutou, mo nisi tino aka foki.
• Ke fakaaoga a te tusi telefoni ke ‵sala atu a igoa o tino kolā e fai‵pati i tau ‵gana. Kāti e mafai o maua a tusi telefoni kolā e tuku mai i ei a igoa e ‵tusa mo fakatuatusi i te Itaneti io me e auala i tusi telefoni o kamupane.
• Ke fesili atu mo te atamai i koga kolā e tuku atu ne latou a fesoasoani ki tino katoa, e pelā mo fale tusi, ofisa o te malo, mo akoga.
• Ke onoono ki te nusipepa mō faka‵pulaga e uiga ki faifaiga a tino kolā ne fakatoka ne tino kolā e fai‵pati i nisi ‵gana.
• Ke āsi atu ki sitoa mo koga ga‵lue kolā e tausi atu ki tino kolā e fai‵pati i nisi ‵gana.
• Kafai e talia ne tino pule, ke fakatu se taipola tusi i koga ga‵lue, i tafa o te iunivesiti, io me ko koga e ‵tu ei a mea fakatele‵tele kolā e olo sāle atu faeloa ki ei a tino kolā e fai‵pati ki te ‵gana tenā.
• Kafai e talia ne te tulafono i tou fenua, ke ‵togi se tusi telefoni io me se polokalame i mea tau komupiuta kolā e mafai o fakaaoga ke ‵sala atu i kogā koga katoa i te Itaneti.
[Ata i te itulau e 7]
Pati ke Fai Atu i te Galuega ko te ‵Sala Atu
A te faipati faka‵lei atu mo te mata fiafia tonu, ka fakagalo aka ei a te manavase o te tino. E fesoasoani sāle atu māfai e fakaasi atu muamua a tusi i te ‵gana a te tino tenā.
Kafai ko oti ne fakatalofa atu, e mafai ne koe o fai: “E salasala eiloa matou ki tino kolā e fai‵pati i te ‵gana ______ ko te mea ke fakaasi atu ne matou a te fakamoemoega i te Tusi Tapu mō latou. E mata, e iloa ne koe se tino telā e mafai o fai‵pati atu matou ki ei?”
Kafai e ‵sala atu ki tino ‵tuli, e mafai ne koe o fai atu: “Talofa. E mata, e mafai o fakaasi atu ne au se mea ki a koe? [Mai te fakaaogaga o se tamā ata vitio, ke fakaasi atu se fuaiupu mai te New World Translation—i te DVD.] A te mea tenei se vaega o te Tusi Tapu i te ‵Gana Fai Tāga faka-Amelika. I tafa o te Tusi Tapu, e isi ne nai ata fakavitio a matou e mafai o maua e aunoa mo se ‵togi kolā ne fakatoka ke fakafetaui aka ki manakoga faka-te-agaga o tino ‵tuli. E mata, e iloa ne koe se tino ‵tuli io me e se ‵logo ‵lei ana taliga kae e fakaaoga ne ia te ‵gana fai tāga?” Kafai e se mafai o masaua ne te tino i te fale so se tino, se mea ‵lei ke taku atu a nisi koga kolā e mafai o lavea atu ei se tino ‵tuli, e pelā mo koga ga‵lue, akoga, io me ko tuakoi.