KE OLA E PELĀ ME NE KELISIANO
Ga‵lue Tasi ke Talai Atu ki Tino e Fai‵pati ki ‵Gana Kese‵kese i ‵Tou Koga Talai
E masani sāle o ‵saga mai a tino mo te fia‵fia ki te fekau o te Malo māfai e lagona ne latou i olotou ‵gana totino. Kāti tenā te pogai ne fakatoka i ei ne Ieova i te Penitekoso i te 33 T.A., “a tāgata Iutaia tali‵tonu mai fenua katoa i lalo o te lagi” ke lagona ne latou te tala ‵lei i olotou “‵gana eiloa,” e tiga eiloa ne fai‵pati latou ki ‵gana masani, e pelā mo te ‵gana Epelu io me ko te ‵gana Eleni. (Gal 2:5, 8) I kogā koga kolā e ‵nofo i ei a tino kolā e fai‵pati ki ‵gana kese‵kese i aso nei, e mafai o isi ne koga talai o fakapotopotoga kolā e fai ne latou a fakatasiga i ‵gana kese‵kese i kogā koga konā. E mafai pefea ne tino talai i fakapotopotoga konā o ga‵lue tasi ke talai atu ki tino katoa kae ke ‵kalo kea‵tea mai te ‵toe galue a koga talai konā i te taimi eiloa e tasi ko fai ei ke sē fia‵fia a tino i fale?
Fai‵pati (Fat 15:22): E ‵tau mo te ovasia o te galuega talai o sau‵tala mo tino talai katoa kae ‵sala atu ki te ‵toe auala ‵lei mō fakapotopotoga katoa ke talai atu te tala ‵lei. Kafai e foliki te lotou koga talai, kāti ka ma‵nako a fakapotopotoga kolā e talai i nisi ‵gana ke faka‵seke ne tatou a fale kolā e aofia i te lotou koga talai. Kae, kafai e se mafai o fakaoti olotou koga talai i te taimi tonu me ko tō ‵mao a te koga talai, kāti e ma‵nako latou ke mo a ma fakaseke ne tatou so se fale, kae ke fakailoa atu ki a latou māfai e maua ne tatou se tino fiafia tonu i te lotou koga talai. (od 93 ¶37) Io me fakamolemole mai latou ke fesoasoani atu ‵tou fakapotopotoga ke ‵sala aka a tino e fai‵pati ki te ‵gana a te lotou fakapotopotoga ko te mea ke avatu a fakatuatusi o latou. (km 7/12 5, pokisi) Ke masaua me i nisi taimi, e silia atu mo te ‵gana e tasi e faipatigina i se fale. A te fakatokaga ke galue faka‵lei ‵tou koga talai e ‵tau o olo tasi mo tulafono o te fenua e uiga ki te auala e tuku atu i ei a fakamatalaga e uiga ki se tino mo tena fakatuatusi māfai e manakogina ke fai penā.
Ga‵lue Fakatasi (Efe 4:16): Ke faka‵logo faka‵lei ki so se fakatokaga e maua mai ‵tou ovasia o te galuega talai. E mata, e fai ne koe se akoga faka-te-Tusi Tapu mo se tino telā e se faipati ki te ‵gana e fai‵pati ki ei ‵tou fakapotopotoga? E mafai eiloa o gasolo vave ki mua tau tino akoga māfai e tuku atu ne koe ki se suā fakapotopotoga e pili atu ki a ia io me se potukau telā e fai‵pati ki tena ‵gana.
Fakatoka (Fat 15:28; 16:1): Kafai a te tino i te fale i ‵tou koga talai e faipati ki se ‵gana fakaa‵tea, taumafai malosi ke fakaoko atu te tala ‵lei ki a ia. E mafai o fakatoka muamua koe ki ‵gana kese‵kese kolā e mafai o fakafesagai atu koe ki ei i tou koga talai mai te ‵kopi ne koe se ‵fuliga o te Tusi Tapu i te ‵gana tenā io me ko vitio ki loto i tau tivaisi. E mafai ne koe o fakaaoga te app ko te JW Language ke tauloto ki te auala e fakatalofa atu ei koe i nisi ‵gana kese‵kese.