Ke Fiafia ki Fua o Au Galuega

1. Se a te mea e mafai o ave keatea i ei ‵tou loto finafinau?

¹ Ne faite eiloa te tagata ke “fakafiafia ki mea ko oti ne maua ne ia i ana galuega.” (Fai. 2:24) Kae kafai e se lavea ne tatou a ikuga ‵lei o ‵tou galuega talai, e mafai o ave keatea ne te loto vāivāi a te fiafia mai i a tatou kae galo atu ei ‵tou loto finafinau. Ne a mea e mafai o fesoasoani mai ke fakatumau aka ei se kilokiloga aoga?

2. Kaia e ‵tau ei mo tatou o fai ne fakamoemoega ‵lei e uiga ki te kilokiloga a tino ki te ‵tou galuega talai?

² Ke Fai ne Fakamoemoega ‵Lei: Masaua me e tiga eiloa ne mu‵tana fua a tino ne talia ne latou a Iesu, kae e mautinoa eiloa me ne iku manuia te faiga o tena galuega. (Ioa. 17:4) I tena tala fakatusa e uiga ki te tino ‵toki saito, ne ‵valo mai ne Iesu me ka se talia eiloa fakamuli ne te ukega o tino a te fekau o te Malo telā e fai pelā mo te fuaga. (Mata. 13:​3-8, 18-22) E tiga eiloa te feitu tenā, koi uke ‵ki eiloa a mea ne fakataunu ona ko ‵tou taumafaiga mo te loto fiafia.

3. E mafai pefea ne tatou o fai ke “‵fua” mai a fuaga faitalia foki eiloa me e se lavea malosi ne tatou a ikuga o ‵tou galuega talai?

³ Te Auala ke ‵Fua Mai i ei a Fuaga e Uke: E ‵tusa mo te tala fakatusa a Iesu, a latou kolā e talia ne latou a te fekau ka “fua” mai i ei a fuaga e uke. (Mata. 13:23) Kafai ko ola kae tupu aka se kausaito, e se ‵fua mai i ei se tamā kausaito, kae se fuaga fou. Tela la, a te fuaga telā e fua mai ne Kelisiano ga‵lue malosi, e se ko soko ‵fou, kae ko fuaga e uke o te Malo kolā ne ‵toki​—ko te ‵tokiga faeloa o fuaga e uke e auala i ‵tou galuega talai e uiga ki te Malo. E iku mai i te mea tenei a mea “‵lei” e uke kolā e maua mai ei ne tatou a te lotomalie, faitalia me ne a kilokiloga a tino. E fesoasoani atu tatou ki te faka‵maluga o te igoa o Ieova. (Isa. 43:​10-12; Mata. 6:9) E maua eiloa ne tatou a te tauliaga ke fai mo fai ne tino e ga‵lue fakatasi mo te Atua. (1 Koli. 3:9) Kae ko vaegā “fuaga [penā] o ‵tou gutu” e fakafiafia atu ki a Ieova.​—Epe. 13:​15, 16.

4. Ne a ikuga e mafai o maua mai ‵tou galuega e aunoa mo te iloa ne tatou?

⁴ E se gata i ei, e mafai foki o maua mai i ‵tou galuega e uke a ikuga kolā e se lavea ne tatou. Kāti e isi foki loa ne tino kolā ne lagona ne latou a te talaiga a Iesu kae ne seki fai latou mo fai ana soko ke oko ki te taimi mai tua o te palelega o tena galuega i te lalolagi. E penā foki loa, a fuaga o te malo kolā e ‵toki ne tatou e mafai o se ola kae e se ‵tupu aka foki i te loto o se tino i te taimi tenā, kae e mafai eiloa o vau fakamuli a ia ki te munatonu e aunoa mo te iloa ne tatou. A te ‵tonuga loa, e fakataunu eiloa ne te ‵tou galuega a mea ‵lei e uke. Tela la, ke na tumau tatou “i te ‵fua malosi mai” kae ke fakamaoni atu me i a tatou ko soko o Iesu.​— Ioa. 15:8.