“Ke Fakatumau te Va Filemu mo Tino Katoa”

1. Se a te polopolokiga i te Tusi Tapu e ‵tau o fakagalue aka ne tatou i te taimi e fetaui ei tatou mo tino kaitaua i olotou fale?

¹ E a‵lofa eiloa a tino o Ieova ki te filemu, kae ko te ‵tou galuega foki se galuega filemu. (Isa. 52:7) Kae i nisi taimi, e fetaui tatou mo tino kolā e se fia‵fia ona ko te mea e olo atu tatou ki olotou fale. Ne a mea ka fesoasoani mai ke fakatumau ne tatou te filemu i vaegā tulaga penā?​—Loma 12:18.

2. Kaia e tāua ei ke maua ne tatou te loto malamalama?

² Ke Loto Malamalama: E kaitaua mai a nisi tino ona ko te ‵teke mai ki te munatonu, ko nisi tino e mafai o fakaasi mai te lotou se fia‵fia ona ko nisi pogai kolā e se aofia i ei ‵tou fekau. Kāti e se ko te taimi ‵lei tenā ke āsi atu tatou. E mafai o se fiafia mai te tino i te fale ona ko ana fakalavelave totino. Kafai e kaitaua mai a ia ona fua ko te tala ‵lei, e ‵tau o masaua ne tatou me e saga mai a ia penā ona ko te mea kāti ne faka‵segina a ia. (2 Koli. 4:4) A te mauaga o te loto malamalama ka fesoasoani mai ke tumau tatou i ‵tou uiga filemu kae ke mo a ma mafaufau me e kaitaua mai ki a tatou.​— Faata.  19:11.

3. E mafai pefea o fakaasi atu ne tatou a te āva ki te tino i te fale?

³ Ke Fakaasi Atu te Āva: E tokouke a tino i te koga talai e puke ‵mautakitaki eiloa ki olotou talitonuga. (2 Koli. 10:4) E maua ne latou a te saolotoga ke filifili aka me ka fakalogo‵logo mai latou io me ikai. Ke mo a eiloa ma fakamasei ne koe a talitonuga a se tino i te fale io me e fakaasi atu se uiga fia sili. Kafai e ‵tuli ne ia tatou, e ‵tau eiloa o faka‵logo tatou mo te āva ki ei.

4. Se a te mea e fakauiga ki ei a te ata faipati atu?

⁴ Ke Ata Faipati Atu: Kafai foki loa e laku mai a pati ‵mafa ki a tatou, e ‵tau eiloa o fakaasi atu i ‵tou tali a te loto maulalo mo te ata faipati. (Kol 4:6; 1 Pe. 2:23) I lō te tosina atu ki se kinauga, taumafai o ‵sala se mea telā e lotoma‵lie tasi koulua ki ei. Kāti e mafai ne tatou o fesili atu mo te atafai e uiga ki pogai e ‵teke atu ei te tino i te fale. Kae ko te mea ke ‵kalo keatea mai te fakaitaita atu, i nisi taimi e sili atu i te ‵lei ke mo a ma taumafai o faka‵soko atu te sau‵talaga.​—Faata. 9:7; 17:14.

5. Ne a mea aoga e maua mai i te fakatumauga o te filemu i te galuega talai?

⁵ Kafai e uiga filemu tatou, e mafai o masaua ne te tino i te fale ‵tou faifaiga atafai kae fai ei ke fakalogo mai a ia i te suā taimi e taumafai ei a te suā tino o talai atu ki a ia. (Loma 12:​20, 21) Kafai foki loa e foliga mai me e ‵mautakitaki a ia i tena ‵tekemaiga, e mafai eiloa o fai fakamuli a ia mo fai se taina. (Kala. 1:​13, 14) Faitalia me saga mai a ia ki te munatonu io me ikai, ka fakaaloalo atu eiloa tatou ki a Ieova kae fakagaligali ne tatou ‵tou akoakoga māfai e puke ‵mau ki te loto pulea kae fakaasi atu a uiga filemu.​— 2 Koli. 6:3.