Te ‵Tou Fakatuatusi Tonu i te Itaneti—Ne Fakatoka ke Aoga ki a Tatou mo Nisi Tino
Ne fakatonu ne Iesu tatou ke talai atu te tala ‵lei o te Malo “ki te lalolagi nofoaki kātoa mo fai se molimau ki atufenua katoa.” (Mata. 24:14) Ko te mea ke fesoasoani mai i te ‘fakataunuga katoatoa o ‵tou galuega,’ ko oti eiloa ne tuku fakatasi katoa a fakatuatusi konei i te itaneti, ko te watchtower.org, jw-media.org, mo te jw.org mai lalo o te igoa tenei jw.org.— 2 Timo. 4:5.
“Ki te Lalolagi Nofoaki Kātoa”: Kāti e nofo ki te tasi-vae-tolu o tino i te lalolagi ko fakaaoga ne latou te Itaneti. Ko oti ne fai mo fai te koga fakavae e maua ei ne tino e tokouke a fakamatalaga, maise eiloa a talavou. E tuku atu ne te ‵tou fakatuatusi i te itaneti a tali o fesili faka-te-Tusi Tapu ki tino kolā e fakaaoga ne latou te Itaneti. E fakamasani ei latou ki te fakapotopotoga a Ieova kae ko faigofie foki ki a latou o fakamolemole atu mō se akoga faka-te-Tusi Tapu sē ‵togi i te fale. Tela la, ko mafai o fakaoko atu te tala ‵lei ki koga kolā e se uke a avanoaga mō tino ke faka‵logo ki te fekau o te Malo.
“Ki Atufenua Katoa”: Ko te mea ke mafai o tuku atu se molimau ki “atufenua katoa,” e ‵tau o fakailoa atu a muna‵tonu i te Tusi Tapu i ‵gana kese‵kese. A tino kolā e onoono atu ki te jw.org e mafai o mauagofie ne latou a fakamatalaga i ‵gana e silia atu i te selau, i lō nisi fakatuatusi i te Itaneti.
Ke Fakaaoga Faka‵lei: A te ‵toe fakatokaga o te jw.org ki te itaneti e seki fai fua ke talai atu ki tino sē tali‵tonu. Ne fakatoka ke fakaaoga foki ne Molimau a Ieova. E fakaasi atu mai lalo a nai manatu fesoasoani ki te auala ke fakaaoga ei. Kafai e mafai o fakaaoga ne koe te itaneti, e fakamalosi atu matou ke fakamasani koe ki te jw.org.
[Diagram on page 3]
(For fully formatted text, see publication)
Ke Tofotofo Aka ki ei
1 Ke taipa atu te www.jw.org ki te koga telā e masani o faulu ki ei a fakatuatusi i te Itaneti i luga i tau komupiuta
2 Ke onoono ki mea katoa i te fakatuatusi tenā mai i te ‵toko atu i ulutala takitasi, mea kese‵kese kolā e mafai o onoono koe ki ei, mo nisi mea aka foki
3 Taumafai ke fakaaoga ne koe te jw.org i tau selefoni telā e isi se itaneti i ei. A te itulau e mafai o fakamafuli ke ofi ‵lei i se tamā komupiuta, kae e ‵pau eiloa a fakamatalaga i ei.