“Ke Tuku Atu se Molimau Katoatoa”
1. Se a te fakaakoakoga ‵lei ne tuku mai ne Paulo i te galuega talai?
1 “Ke fakaoti faka‵lei tau taviniga.” (2 Timo. 4:5, Byington) E mautinoa eiloa me ne ‵lei a lagonaga o te apositolo ko Paulo i te taimi ne tuku atu ei ne ia a te fakamalosiga tenei ki a Timoteo. A te ‵tonuga loa, i te va o tausaga ko te 47 mo te 56T.A., ne fakaoti ei ne Paulo te tolu o ana malaga fakamisionale. Ne taku mai faeloa i te tusi o Galuega a te “molimau katoatoa” atu o Paulo. (Galu. 23:11; 28:23) E mafai pefea o fai tatou penā i aso nei?
2. E mafai pefea o tuku atu ne tatou se molimau katoatoa i te taimi e talai atu ei tatou mai fale ki fale?
2 Mai Fale ki Fale: I se taumafaiga ke fesokotaki atu ki tino i fale kolā e seki lagona aka eiloa ne latou a te tala ‵lei, e mafai o āsi atu tatou ki a latou i taimi kese‵kese o te aso. E mafai o nofo atu a te tagata i te fale i te fakaafiafi io me ko te fakaotiga o te vaiaso. E ‵tau o taumafai tatou ke fai‵pati atu ki se tino i fale takitasi, kae ke āsi atu faeloa ki fale kolā e seki maua atu se tino i ei. Kae e a māfai e se iku manuia au taumafaiga ke maua atu se tino? Kāti ka maua mai eiloa ne ikuga ‵lei, māfai e tusi atu se tamā tusi io me e telefoni atu.
3. Ne a avanoaga e maua ne koe ke molimau atu i mua o tino katoa mo nisi taimi?
3 Te Talai Atu i Mua o Tino Katoa mo Nisi Taimi: E fakasalalau atu ne tavini a Ieova i aso nei a te “poto” tonu ki tino katoa kolā ka faka‵logo mai. I nisi taimi, e lagona atu “i auala” io me ko “maketi.” (Faata. 1:20, 21) I te taimi e fai ei ‵tou galuega masani i aso katoa, e mata, e mafau‵fau faeloa tatou ke tuku atu se molimau? E mata, e mafai o fai atu me e “‵saga malosi” tatou “o folafola atu a te muna”? (Galu. 18:5) Kafai e fai tatou penā, ko fakataunu eiloa ne tatou ‵tou tiute ke “tuku atu se molimau katoatoa.”—Galuega 10:42; 17:17; 20:20, 21, 24.
4. E fesoasoani mai pefea a te ‵talo mo te mafaufau ‵loto ki te tukuatuga ne tatou o se molimau katoatoa?
4 I nisi taimi, ona ko ‵tou vāivāiga faka-te-foitino io me ko te mata ma, e mafai o fakatalave tatou i te tukuatuga o se molimau. E mautinoa eiloa me e malamalama a Ieova i ‵tou vāivāiga. (Sala. 103:14) E tiga eiloa te feitu tenā, kafai e ‵sae aka a vaegā taimi penā, e mafai o ‵talo atu tatou ki a ia ke tuku mai te loto malosi ke faipati atu. (Galu. 4:29, 31) Kafai foki e fai a sukesukega totino kae mafau‵fau ‵loto ki te Muna a te Atua, e mafai o ‵saga tonu atu tatou ki te fakamalosiakaga o ‵tou loto fakafetai ki te sili atu o te tāua o te tala ‵lei. (Fili. 3:8) Ka fesoasoani mai te mea tenei ke folafola atu ne tatou te tala ‵lei mo te loto finafinau!
5. E mafai pefea o aofia tatou i te fakataunuga o te valoaga a Ioelu?
5 Ne ‵valo mai i te valoaga a Ioelu me i tino o te Atua e “olo faeloa ki mua” kae ka se talia ne latou so se mea ke fakavāivāi atu ki a latou i te faiga o te galuega talai. (Ioelu 2:2, 7-9) Ke na ‵kau katoatoa atu tatou ki te galuega ko te molimau atu telā ka se toe fai eiloa!