E Mata, ka Paenia Lagolago Koe?
1. Kaia e fai ei te vaitaimi o te Fakamanatuga mo fai te ‵toe taimi gali ke fakalauefa atu ei te ‵tou galuega talai?
1 A te vaitaimi o te Fakamanatuga ko te ‵toe vaitaimi gali ke fakalauefa aka ei te ‵tou galuega talai. Ko te taimi telā e fakaasi atu ei ne tatou te lasi o te alofa o Ieova e auala i te tukumaiga o tena tama e pelā me se taulaga. (Ioa. 3:16) E fai ne te mea tenei ke tupu aka te fiafia i ‵tou loto, mo te fia fakamatala atu foki ki nisi tino e uiga ki a Ieova mo ana mea ne fai ki tino. (Isa. 12:4, 5; Luka 6:45) Se taimi gali foki mō tatou ke fakaoko atu te ‵kamiga tenei ki tino kolā e masani tatou, e penā foki ki tino katoa i te koga talai kolā ne ‵kau fakatasi tatou i te Fakamanatuga. Mai tua ifo i ei ko taumafai tatou o ati aka te fia‵fia o tino kolā ne ‵kau atu ki te Fakamanatuga. E mata, e mafai o fakalauefa atu tau galuega talai mai te paenia lagolago i te masina o Mati, Apelila mo Me?
2. Kaia e fai ei a te masina o Mati mo fai te ‵toe masina gali ke paenia lagolago i ei?
2 Ke Fai a Mati mō Masina Fakapitoa: E fai a Mati mo fai te ‵toe masina gali ke paenia lagolago. A latou kolā e fia paenia lagolago e mafai o filifili aka ke paenia mō itula e 30 io me 50. Kafai e pakū te asiga a te ovasia o te fenua ki te masina o Mati, e mafai ne paenia lagolago o ‵kau atu ki te fono kātoa telā ka fai ne ia mō paenia tumau mo paenia fakapito. A te tufaatuga o te pepa ‵kami ki te Fakamanatuga, telā e kamata sāle i te Aso Lua, Mati 26, 2013, ko oti ne fai se fakamafuliga ki ei ke kamata i a Mati po 1. E se gata i ei, e lima foki a vaiaso i te masina o Mati. Tela la, kaia e se mafaufau ei koe ke fakaaoga faka‵lei a te masina fakapito tenei i te tausaga?
3. Ne a palani e mafai o fai ne tatou ko te mea ke momea aka te uke o ‵tou mea e fai i te galuega talai?
3 Ke Fai Nei se Palani: Tenei eiloa te taimi ke toe iloilo faka‵lei aka tau fakasologa kae fai ne fakamafulifuliga ki ei ko te mea ke paenia lagolago koe. E tāua ‵ki te fesoasoani o tino i te kāiga, tela la, ke fakaaoga a taimi i te otou Tapuakiga a Kāiga i Afiafi ke sau‵tala fakatasi ki otou fakamoemoega kae ke fai se fakasologa. (Faata. 15:22) Kafai e se mafai ne koe o paenia lagolago, sa loto vāivāi. E mata, e mafai ne koe o fai ne fakama‵fuliga ki tau fakasologa ko te mea ke mafai o tai uke atu ou taimi e fakaaoga i aso e talai sāle ei koe? E mata, e mafai ne koe o fakaopoopo atu se isi aso ki aso e fanatu ei koe i te galuega talai?
4. Ne a mea ‵gali ka iku mai i te momea aka o ‵tou mea e fai i te galuega talai i a Mati, Apelila mo Me?
4 Kafai e momea aka te uke o ‵tou mea e fai i te masina o Mati, Apelila, mo Me, ka momea aka foki te fiafia mo te lotomalie telā e maua mai te tavini atu ki a Ieova mo te talai atu ki tino. (Ioa. 4:34; Galu. 20:35) Kae sili atu ei, ko te ‵tou a‵lofa sē fakapito telā e fai ei ke fiafia a Ieova.—Faata. 27:11.